B
FINENI’NA NA TINAITAI Is 35, 4-7a
Un tinaitai ginin i Lepblun i Prufeta as Isaiah
Taiguini ilek-ña i Saina:
Sangåni atyu siha i manluluhan kurason-ñiha:
Na’fanmetgut hamyu, ya cha’-miyu fanma’å’a’ñao!
Esti Guiya i Yi’us-miyu,
måfattu para u na’empas;
Måfattu para en fansinatba
nu i yini’usan na ayudu-ña.
Pues siempri u fanmababa i matan i mambåtchit,
ya u fangklåru i talangan i manangnga;
Pues siempri i mange’yao u fanmanggaloppi kalang binådu,
yan i hila’ i manudu u fangånta.
U fambulokbuk huyung milak hånum gi disiettu,
yan sadduk siha gi anglu na tånu’.
U fama’bañaderu i figan na unai,
ya i anglu na tånu’ u fama’be’bu’ hånum.
I finu’ i Saina.
INEPPIN I SÅTMU Ps 146, 7. 8-9. 9-10
R. ANTI-HU, TUNA I SAINA!
I Yi’us Jacob fiet para todu i tiempu,
ha nåna’i hustisia i manmapetsisigi,
yan nengkannu’ para i manñålang.
I Saina Ha sosotta i manmapreresu.
INEPPI…..
I Saina muna’fanmanlili’i’ i mambåtchit;
i Saina Ha håhatsa hulu’ atyu siha i manetekkun påpa’;
I Saina Ha guaiya i manunas;
i Saina Ha prutetehi i manistrangheru.
INEPPI…..
Ha susteteni i manai saina yan i mambi’uda,
låo Ha kokontra i kinalamtin i manailayi.
I Saina u fanggubetna para todu i tiempu,
i Yi’os-mu, Sion, para todu i hinerasion! Åleluia!
INEPPI…..
SIGUNDU NA TINAITAI Jas 2, 1-5
Un tinaitai ginin i Kattan Santiago
Hafañe’lus, kumu manmanhonggi hamyu gi Saina-ta as Jesukristo, i Sainan i gloria, ni nungka nai en tråta difirensiåo i taotåo put i pusision-ñiha. Siakåsu na un riku na tåotåo ni inaniniyu oru yan minagågagu måolik måttu gi huntan-miyu, ya måttu lokkui’ un popbli na tåotåo ni binahåhaki, yanggin un nå’i mås rispetu i minagågagu måolik ya ilek-mu nu guiya, “Fatå’chung guini gi mås måolik na siya,” låo ilek-mu ni pepbli na tåotåo, “Tohgi guihi guatu, patsino fatå’chung gi hilu’ såtgi gi fi’un addeng-hu,” pues manlachi hamyu ti en na parerehu tratamentun-miyu gi entri hamyu ya manmanhuhusga hamyu ginin i tinailayi.
Mangginifli’e’-hu na mañe’lu-hu, fanékkunguk! Na ada ti Ha atyik si Yu’us i mamopbli na tåotåo guini gi tanu’ para u fanriku gi hinenggi yan para u iyun-ñiha i rainu ni esta Ha prumeti atyu siha i gumufli’i’ Gui’?
I finu’ i Saina.
IBANGHELIU Mk 7, 31-37
ÅLELUIA Mt 4, 23
R. Åleluia. SUMETMUN SI JESUS NU I MAOLIK NA NUTISIA PUT I RAINU
YA HA NA’FANHOMLU’ TODU I MANMALÅNGU.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Ha dingu si Jesus i tanu’ i taotåo Tyre ya umisgin Sidon guatu gi Tasin Galileha para i distritun i Dies na Siudå. Unus kuåntus siha na tåotåo makonni’i Gui’ un låhi ni tangnga yan pahya’ kumuentus ya mafaisin Gui’ para u po’lu i kannai-ña gi hilo’-ña. Kinenni’ gui’ na maisa as Jesus guatu gi un bånda ya sumuha ginin i linahyan. Ha na’hålum si Jesus i kalulot-ña gi talangan i taotåo, pues tumo’la’, ya Ha patcha i hila’-ña; dispues tumalakhilu’ gi langit ya humågung tåddung. Ilek-ña nu guiya, “Ephphatha!” (kumeke’ilekña, “Un mababa!”) Gotpi mababa i talangan i taotåo; pumåra pumahya’, ya ha tutuhun kumuentus måolik. Pues Ha ingkåtga siha na cha’-ñiha fane’essangåni ni håyi; låo mientras mås Ha ingkåtga siha, mås masånganñaihun. Nina’fansen manman i taotåo siha, “Todu i bidå-ña manmåolik! Ha na’fanmanhunguk i manangnga yan Ha na’fanguentus i manudu!”
I Ibangheliun i Saina.
