FINE’NA NA TINAITAI Sir 3, 17-18, 20. 28-29
Un tinaitai ginin i Lepblun ‘Sirach’
Lahi-hu, na’humitdi håo yanggin un cho’cho’gui i che’cho’-mu,
ya siempri maguaiya håo mås ki atyu i mannåna’i rigålu.
Na’mås humitdi håo, ya un mås takkilu’,
ya siempri un sodda’ suettem-mu gi as Yu’us.
Cha’-mu ispipiha atyu i mampus takkilu’ para hågu,
mungnga ma’ega’ga’ atyu i ti un na’siña.
Ha agradesi manomtum na sinangan i ilun i såbiu,
gaigi i minaguf i temtum na tåotåo gi atendidu na talanga.
Ha pupunu’ i guafi i hanum,
yan i limosna ha na’e’empas i isao siha.
I finu’ i Saina.
INEPPIN I SÅTMU Ps 68, 4-5. 6-7. 10-11
R. GI MINAOLEK-MU, O YU’US, UN FA’TINÅSI I PEPBLI GIMÅ’-ÑA
I manunas na tåotåo u fanmaguf, u fanmaguf gi me’nan Yu’us;
u ma silebra yan un dångkulu na minaguf.
Kantåyi si Yu’us, kantåyi i yini’usan na na’ån-ña;
ni Saina na’ån-ña.
INEPPI…..
I tatan i manaisaina yan i dumifefendi i mambi’uda,
Guiya esti i Yi’us ni såntus i sagå-ña,
Ha nåna’i gima’-ñiha i ti manma’atetendi,
Ha kokonni’ i manmapreresu guatu gi ginefsaga,
INEPPI…..
Un na’uchan måtmu, O Yu’us, gi hilu’ i manerederus;
Un na’ta’lu tåtti i futtalesan i edda’ i tanu’-ñiha ni kansådu;
guennao nai nañåga i taotåo-mu;
gi minaolek-mu, O Yu’us, maguguf Un nå’i i mamopbli ni nisisidat-ñiha.
INEPPI…..
SIGUNDU NA TINAITAI Heb 12, 18-19. 22-24
Un tinaitai ginin i Katta para i ManHibrehu
Hafañe’lus:
Ti manmåttu hamyu gi una kosa ni siña mapatcha, taiguihi anai manmåttu i taotåo Israhet, gi mañiñila’ na guåfi gi Eksu’ Sinai, i hinemhum yan trinisti, i pakyu, i katin i kutneta, yan i súnidun un bos. Anai mahunguk ni taotåo i bos, manmanggågåo na mungnga siha humunguk ottru palåbra. Inlugåt manmåttu hamyu gi Eksu’ Sion yan gi siudån i lala’la’ na Yu’us, i linangitan na Hirusalen, anai manggaigi mit yan mit na manånghit. Manmåttu hamyu gi na’maguf na inetnun i primirisa na famagu’un Yu’us, ni manmatugi’ i na’an-ñiha gi langit. Manmåttu hamyu gi as Yu’us, ni Guiya i hues para interu i taotåo, yan para i espiritun i manmåolik na tåotåo ni mana’famprifektu. Manmåttu hamyu gi as Jesus, ni Guiya prumipåra i nuebu na kuntråta, yan gi masåtpin håga’ ni Ha prumeti mås minaolik ki i haga’ Abel.
I finu’ i Saina.
IBANGHELIU Lk 14, 1. 7-14
ÅLELUIA Mt 11, 29
R. Åleluia. UMA I KATGÅK-KU; ETYAK GIYA GUÅHU, SA’ PASENSIA YAN HUMITDI KURASON-HU.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Anai måttu si Jesus gi gima’ un må’gas na Farisehu para u chotchu, masen ripåra nu i taotåo siha håfa bidåda-ña.
Intonsis Ha sangåni si Jesus i kumbiti siha un fina’akumparasion, anai Ha ripåra na manmalagu’ manmatå’chung gi mås måolik na tå’chung: “Yanggin guaha kumumbida hamyu para i fandånggu, cha’-miyu a’atyik i mås yahululu’ na tå’chung gi lamasa sa’ atyu i u guaha ma kumbida ni takkilo’ña ki hagu. Ya siña ha’ måttu i kumumbida håo ya u åluk nu hågu, ‘Na’fatå’chung esti na tåotåo guennåo,’ ya siempri gi minamahlåo-mu sumigi håo guatu asta i yapåpapa’ na tå’chung. Yanggin manmakumbida hamyu fanmatå’chung gi yapåpapa’, kosaki yanggin måttu i kumumbida håo siempri ilek-ña nu hågu, ‘Amigu, maila’ ya un ge’hilu’.’ Taiguini na siempri mali’i’ håo nu i manamigu-mu ma’onra. Håyi muna’takkilu’ maisa gui’ u mana’takpapa’ ya håyi muna’takpapa’ maisa gui’ u mana’takkilu’.” Ha sangåni si Jesus i taotåo ni kumumbida Gui’, “Yanggin para un na’amotsa pat un ná’sena håyi na tåotåo, cha’-mu kumbibida i amigu-mu pat i che’lu-mu pat i parintes-mu pat i manriku na bisinu-mu. Siña ha’ kinembida håo ya umána’empas hamyu. Åhi’, yanggin gumuput håo, kumbida atyu siha i mane’egagåo gi chalan, i maninutit, i mange’yao yan i mambåtchit; ya siempri mabendisi håo sa’ ti siña ma’apasi håo tåtti. Si Yu’us un inapåsi yanggin mana’fanlå’la’ ta’lu i manunas.”
I Ibangheliun i Saina.
