B
FINENI’NA NA TINAITAI Jos 24, 1-2a. 15-17. 18b
Un tinaitai ginin i Lepblun Joshua
Ha na’fanetnun si Joshua todu i rasan Israhet giya Schechem, ya ha ågang todu i manåmku’, i manmå’gas, i hues siha yan i manufisiålis-ñiha. Anai mamila sigun gi mina’gas-ñiha gi me’nan Yu’us, ha kuentusi si Joshua i taotåo siha: “Yanggin ti manmaguf hamyu en setbi i Saina, disidi på’gu håyi para en setbi, kåo i yi’us i tatan-miyu gi ottru båndan Sadduk pat i yi’us i Amoritas siha na tåotåo ni manhahamyu. Sa’ guåhu yan i familiåk-ku, bai in setbi i Saina.”
Låo manmanoppi i taotåo siha, “Ni ngai’an nai bai in yiti’ñaihun i Saina put i para bai in setbi ottru na yu’us siha. Sa’ i Saina, i Yi’os-ta, kumonni’ hit yan i mañaina-ta ginin iya Ihipto anai maniståba hit manisklåbu. Ha cho’gui atyu siha i manna’manman na milågru gi me’nan i matåta, Ha prutehi hit duråntin i karerå-ta yan Ha na’fansåfu hit ginin atyu siha na tåotåo ni ta upus. Pues put ennåo na hami lokkui’ bai in setbi i Saina, sa’ Guiya i Yi’us-måmi.”
I finu’ i Saina.
INEPPIN I SÅTMU Ps 34, 2-3. 16-17. 18-19. 20-21
R. TAÑÑA’ YA EN LI’I’ I MINAOLIK I SAINA.
Bai hu tuna i Saina todu i tiempu;
i matuna-ña u gagaigi todu i tiempu gi pachot-tu.
Sotta ya u maguf i anti-hu gi Saina;
bai hu mahunguk ni manakpapa’ na tåotåo siha ya u fanmaguf.
INEPPI….
I Saina Ha adadahi i manunas,
ya Ha e’ékkunguk i inagang-ñiha.
I Saina Ha chatá’atan i manailayi
ya ti Ha na’fanmahahassu siha guini gi tanu’.
INEPPI….
I Saina Ha e’ékkunguk i inagang i manunas na tåotåo,
ya Ha akukudi siha ginin todu i achakin-ñiha.
Hihut i Saina para atyu siha i mampininiti kurason-ñiha,
Ha såsatba atyu siha i manmafigis espiritun-ñiha.
INEPPI….
Bula prubleman-ñiha i manunas na tåotåo,
låo nina’fanlilibri ni Saina ginin todudu ha’;
Si Yu’us Ha adadahi i te’lang-ñiha;
ya tåya’ ni unu u måhluk.
INEPPI….
SIGUNDU NA TINAITAI Eph 5, 21-32
Un tinaitai ginin i Kattan San Pablo para i taotåo Ephesus
Hafañe’lus:
Fana’osgi unu yan ottru put i ribirensian-miyu ni Kristo. Famalåo’an, pe’lu hamyu gi papa’ i åoturidåt i asaguan-miyu taiguihi yanggin en pe’lu hamyu gi papa’ i åoturidåt i Saina. I lahi guaha åoturidåt-ña gi asaguå-ña taimanu ha’ na guaha åoturidåt-ña i Kristo gi Gima’Yu’us; ya i Kristo mismu Guiya i Satbadot i Gima’Yu’us, era i tataotåo-ña. Put ennåo na debi i famalåo’an di u ma po’lu siha kabålis gi papa’ i asaguan-ñiha taimanu ha’ na i Gima’Yu’us Ha popo’lu gui’ gi papa’ i Kristo.
Lalåhi, gefli’i’ i asaguan-miyu taimanu ha’ na Ha gofli’i’ i Kristo i Gima’Yu’us ya Ha na’inñaihun i lina’lå’-ña put i Gima’Yu’us. Ha cho’gui esti put i para u didika i iklesia gi as Yu’us ginin i fino’-ña, dispues di Ha fa’gåsi gi hanum, put i para u prisenta i Gima’Yu’us giya Guiya yan todu i ginatbon-ña–sin måncha yan tåya’ difekton-ña, sin pekas patsino makalehlu patsino ottru klåsin difektu. I lalåhi siha debidi u ma guaiya i asaguan-ñiha taimanu ha’ i guinaiyan-ñiha ni tataotåo-ñiha. I taotåo ni ha guaiya i asaguå-ña ha guaiyan maimaisa gui’ lokkui’. Tåya’ nai guaha tåotåo ha chatli’i i tataotåo-ña mismu. Inlugåt, ha na’chotchuchu yan ha adadahi, taimanu ha’ i bidåda-ña i Kristo ni Gima’Yu’us; sa’ manmembrun i tataotåo-ña hit. Taimanu ha’ i Ha sångan i eskritura, “Put esti na rason na i lahi ha didingu si tatå-ña yan si nanå-ña ya dumadañña’ yan i asaguå-ña, ya siempri umunu ha’ i dos.” Uma’annuk guini na eskritura un tåddung na sikretu, ni sigun gi kinimprindek-ku siña ma’aplika gi Kristo yan i Gima’Yu’us.
I finu’ i Saina.
IBANGHELIU Jn 6, 60-69
ÅLELUIA
R. Åleluia. I FINO’-MU SIHA, O ASAINA, ESPIRITU YAN LINA’LA’,
HÅGU NAI GAIGI I FINIHU’ I TAIHINEKKUK NA LINA’LA’.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Meggai gi mandisipulun Jesus ilik-ñiha, “Makkat para ta sungun esti na klåsin fina’nå’gui! Håyi siña humonggi esti?” Låo si Jesus Ha gof tungu’ ha’ na i mandisipulu-ña manggogonggung put i fino’-ña. Ilek-ña nu siha, “Kåo maninistotba hinenggin-miyu? Håfa mohun ya en li’i’ i Lahin i Taotåo kumahulu’ guatu gi anai hagas iståba Gui’? I espiritu mannåna’i lina’la’; i sensin tai bali. I palåbras ni Hu sangåni hamyu Guiya esti i espiritu yan i lina’la’. Låo guaha giya hamyu ti manmanhonggi.” Gi magåhit, Ha tungu’ ha’ si Jesus desdi i tutuhun håyi ti manmalagu’ manmanhonggi, yan håyi para u trinaiduti Gui’. Pues Ha kuntinuha kumuentusi siha: “Estigui’ nai na Hu sangåni hamyu na tåya’ siña måttu giya Guåhu solu sinedi gui’ ni Tata.”
Desdi esti na tiempu, meggai gi mandisipulu-ña ma’apåtta siha ginin Guiya, ya ti manmalagu’ esta mañåonåo guini na inetnun. Pues ilek-ña si Jesus nu i Dossi, “Kåo para en dingu’ hit lokkui’?” Ineppi Gui’ as Simon Pedro, “Asaina, låo para månu ham guatu? Hågu nai gaigi i finihu’ i taihinekkuk na lina’la’. Esta manmanhonggi ham; sin duda magåhit, Hågu i santus ni ginin as Yu’us.
I Ibangheliun i Saina.
