FINE’NA NA TINAITAI Is 66, 18-21
Un tinaitai ginin i Lepblun i Prufeta as Isaiah
Taiguini ilek-ña i Saina:
Måttu yu’ para bai Hu na’fanetnun todu i nasion siha ni difirentis lingguåhin-ñiha; siempri manmåttu siha ya u mali’i’ i gloriå-hu. Bai Hu pu’luyi un siñåt gi me’nan-ñiha; bai Hu na’fanhånåo atyu siha i mansopbla ginin i entalu’-ñiha para i nasion siha: para Tarshish, para Put yan para Lud, para Mosoch, para Tubal yan para Javan, para i manchågu’ siha na tånu’ ni tåya’ nai mahunguk i na’manman siha na bidå-hu, yan tåya’ nai mali’i’ i gloriå-hu; ya siha para u pruklåma i gloriå-hu gi todu i nasion siha. Siha para u kinenni’ todu i mañe’lu-mu ginin todu i nasion kumu inifresi para i Saina, ya u fanmåttu manma’u’udai gi kabåyu, gi kalesa yan gi kareta, yan gi hilu’ buliku yan kameyu, mangguaguaguatu giya Hirusalen, i santus na sabanå-hu, ilek-ña i Saina, taiguihi ha’ yanggin machuchuli’ ni ManIsraelitas i inifresin-ñiha gi halum gåsgas nå’yan para i gima’ i Saina. Ilek-ña i Saina, unus kuåntu gi entri esti siha bai Hu atyik kumu mamåli’ yan Levites.
I finu’ i Saina.
INEPPIN I SÅTMU Ps 117, 1-2
R. (Mk 16, 15) FANHÅNÅO PARA TODU I TANU’
YA EN SANGÅNI NU I MAOLIK NA NUTISIA.
Tina i Saina, hamyu ni nasion siha!
Nå’i Gui’ gloria todu hamyu ni taotåo!
INEPPI…..
Sa’ fitmi i ginifli’e’-ña para hita;
ya fiet i Saina para todu i tiempu.
INEPPI…..
SIGUNDU NA TINAITAI Heb 12, 5-7, 11-13
Un tinaitai ginin i Katta para i ManHibrehu
Hafañe’lus:
Kåo manmaleffa hamyu ni palåbra siha ni mannåna’i ånimu ni mansinangåni hamyu as Yu’us kumu famagu’on-ña? “Patgon-hu, atendi i Saina yanggin Ha kurihi håo, ya mungnga dinisanima yanggin linalåtdi håo. I Saina Ha kuririhi todu i Ha guaiya, yan Ha kastitiga todu i Ha aksepta kumu patgon-ña.” Sungun håfa en padesi kumu kastigun un tåta; i pinadesin-miyu muna’a’annuk na si Yu’us Ha trårata hamyu kumu famagu’on-ña. Kåo guaha påtgun ti kinastiga as tatå-ña?
Yanggin manmakastiga hit, kalang mohun para hita guihi na mumentu una kosa ni para u na’fantristi hit, åhi’ ti para u na’fanmaguf hit. Låo dispues, atyu siha i manmakurihi ni ennåo na kastigu u magosa pasifiku na premiu gi tinas na lina’la’.
Intonsis, kåhat hulu’ i manyayas na kannai-miyu yan na’fanmetgut i manlålaolåo na temmun-miyu! Sigi ha’ manmamokkat gi dinanchi na chålan, kosaki i ke’yåo na ådding ti u inutit, inlugåt u mågung.
I finu’ i Saina.
IBANGHELIU Lk 13, 22-30
ÅLELUIA Jn 14, 6
R. Åleluia. ILEK-ÑA I SAINA, GUÅHU I CHALAN, I MINAGÅHIT YAN I LINA’LA’;
TÅYA’ MÅFATTU GI TATA SIN U ISGIN IYA GUÅHU.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Humånåo si Jesus mama’nåna’gui gi siudå yan gi sengsung siha, ya sigi ha’ humatguatu giya Hirusalen. Guaha fumaisin Gui’, “Asaina, kåo dididi’ ha’ para u fanmasåtba?” Manoppi Gui’, “Chagi humålum ginin i estretchu na potta. Bai Hu sangåni hamyu na meggai para u chinagi manhålum låo ti u fansiña. Yanggin kahulu’ i ma’gas i gima’ ya Ha kandålu i petta, ya gaigi håo gi sanhiyung, tumotohgi yan mandådakdak ya ilelek-mu, ‘Siñot, babayi ham,’ siempri manoppi Gui’, ‘Ti Hu tungu’ mangginin manu hamyu mågi.’ Pues siempri en tutuhun sumångan, ‘Manhihita mañotchu yan manggimin. Mama’nå’gui Håo gi chalan-måmi.’ Låo siempri manoppi Gui’, ‘Bai Hu sangåni hamyu, ti Hu tungu’ mangginin manu hamyu mågi. Ritira hamyu ginin Guahu, hamyu ni tailayi bidan-miyu.’ “Siempri guaha kasao yan chikchik nifin, yanggin en li’i’ na mansåfu gi Rainun Yu’us si Abrahan, si Isaac, si Jacob, yan todu i prufeta siha, ya hamyu manmarichåsa. Siempri manmåttu tåotåo siha ginin i sanhaya yan sanlagu, ginin i sangkattan yan sanlichan ya u fanmatå’chung gi sagan-ñiha gi giput i Rainun Yu’us. Guaha siha ni manuttimu u famfine’na yan guaha siha ni mamfine’na u fanuttimu.” I Ibangheliun i Saina.
