FINENE’NA NA TINAITAI Jer 38, 4-6. 8-10
Un tinaitai ginin i Lepblun i Prufeta as Jeremiah
Ilik-ñiha i prinsipi siha ni rai: “Debidi u mapunu’ si Jeremiah; ha na’fambåbaba sinientin-ñiha i sindålu ni mañopbla guini na siudå, yan kuntodu i taotåo siha, put i sinangångan-ña siha; ti intirisåo gui’ ni minaolik i taotåo, sinoki i binaban-ñiha ha’.” Manoppi i Rai as Zedekiah: “Gaigi gui’ gi papa’ i nina’siñan-miyu”; sa’ put i tåya’ i rai siña ha cho’gui yan siha. Pues makonni’ si Jeremiah ya mayuti’ hålum gi tipu’ ni iyun i Prinsipi as Malchiah, ni iståba gi halum i lugåt anai mañåsaga i guåtdia siha. Tåli ma’usa para u mana’tunuk gui’ påpa’. Tåya’ hånum gi tipu’, sino ki fachi’ ha’ ya mañokñuk si Jeremiah gi halum i fachi’.
Humånåo si Ebed-Melech ginin i palåsyu para i trångkan Benjamin ya ilek-ña nu i rai: “Siñot rai, gaigi i isao guini siha na lalåhi gi todu i bidan-ñiha nu i prufeta as Jeremiah, anai mayuti’ gui’ hålum gi tipu’. Siempri måtaiñålang gui’ guihi sa’ tåya’ esta nengkannu’ gi siudå.” Intonsis i rai ha otdin si Ebed-Melech, tåotåo Cushite, para u fangonni’ tres na lalåhi ya u malaknus si Jeremiah ginin i tipu’ åntis di u måtai.
I finu’ i Saina.
INEPPIN I SÅTMU Ps 40, 2. 3. 4. 18
R. (14) ASAINA, FÅTTU YA UN AYUDA YU’.
Hagas ha’ mannangga yu’, mannangga yu’ nu i Saina;
ya tumekkun Gui’ påpa’ para guåhu ya Ha ékkunguk i inagång-hu.
INEPPI…..
I Saina Ha hunguk i inagång-hu.
Ha laknus yu’ ginin i piligru na kantit,
ginin i fachi’ i sisonyan,
Ha na’tohgi yu’ gi hilu’ åtchu’,
ya Ha na’fitmi i addeng-hu,
INEPPI…..
Ya Ha pu’luyi un nuebu na kånta i pachot-tu,
un himnu para i Yi’os-ta.
Meggai siempri u fanmanatan ya u fanma’å’ñåo
ya u mapo’lu i inangokkun-ñiha gi Saina.
INEPPI…..
Maseha na’masi’ yu’ yan popbli yu’,
låo Ha hahassu ha’ yu’ i Saina.
Hågu umayuyuda yan muna’lilibri yu’;
Yu’os-su, cha-‘mu atrasåsao!
INEPPI…..
SIGUNDU NA TINAITAI Heb 12, 1-4
Un tinaitia ginin i Katta para i ManHibrehu
Hafañe’lus:
Para hami, un dångkulun linahyan tåotåo gi uriyan-måmi mantistigu. Intonsis, nihi ya ta na’suha giya hita i istotbu, yan i isao ni gumogo’ti hit mafñut, yan maila’ ya ta fanáchikak gi ditetminasion ni ta fåfana’. Nihi ya ta na’fitmi i inatan-ta gi as Jesus, anai gaigi na ha dipependi i hiningget-ta desdi i tutuhun asta i uttimu. Åhi’ ti nina’måhñåo Gui’ ni kilu’us! Sin imbåtgu, put i minaguf ni numanangga Gui’, ti hinalang Gui’ ni disgråsian i finatai gi kilu’us, ya på’gu gaigi Gui’ na matåta’chung gi agapa’ na bånda gi tronun Yu’us. Hassu håfa Ha fa’posgui; taimanu sungon-ña ni meggai chinatli’i’ ni ginin i mani’isao! Pues cha’-miyu sesedi na en fandinesanima ya para en fambåsta. Gi minimum-miyu kontra i isao trabiha ti måfattu chiña en rinunsia na en fanmapunu’.
I finu’ i Saina.
IBANGHELIU Lk 12, 49-53
ÅLELUIA Jn 10.27
R. Åleluia. ILEK-ÑA I SAINA, I GA’-HU KINILU SIHA
MA’E’EKKUNGUK I BOS-SU,
HU TUNGU’ SIHA YA MADALALAKI YU’. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Ilek-ña si Jesus ni mandisipulu-ña:
“Måttu Yu’ guini gi tanu’ para bai Hu fanotngi guåfi. Ya Hu diseseha na esta mohun mañiñila’. Guaha un båotismu para bai Hu risibi. Ya chachathinassu Yu’ asta ki munhåyan esti! Kåo hinassun-miyu na måttu Yu’ para bai Hu istapblesi pås guini gi tanu’? Bai Hu sangåni hamyu na åhi’; inlugåt, måttu Yu’ para bai Hu na’fanadispatta. Desdi på’gu para mo’na, i familia ni guaha singku u madibidi tres kontra dos yan dos kontra tres; u adispatta i tata kontra i lahi-ña yan i lahi-ña kontra i tata, i nana kontra i hagå-ña yan i hagå-ña kontra i nana, i suegra kontra i yetnåñ-ña yan i yetna kontra i suegråñ-ña.
I Ibangheliun i Saina.
