FINENE’NA NA TANAITAI Eccl 1, 2; 2, 21-23
Un tinaitai ginin i Lepblun Ecclesiastes
Banidå gi entalu’ i banidå siha, ilek-ña si Qoheleth,
banidå gi entalu’ i banidå siha! Todu i kosas siha banidå!
Estigui’ un tåotåo ni macho’chu’ ha u’usa i tinemtom-ña yan i tiningo’-ña yan kapås gui’ gi che’chu’, ya debidi u sotta i guinaha-ña para ottru tåotåo ni ti macho’chu’. Estigui’ lokkui’ banidå yan un dångkulun disgråsia. Ya håfa prubichon-ña i taotåo ginin todu i che’cho’-ña yan i chathinassun i kurason-ña anai machocho’chu’ gi halum somnak? Todu i ha’ani-ña inikukupa ni pininiti; ya gi puengi lokkui’ ti siña trangkilu i hinasson-ña. Estigui’ lokkui’ banidå.
I finu’ i Saina.
INEPPIN I SÅTMU Ps 90, 3-4, 5-6, 12-13, 14 &17
R. YANGGIN EN HINGUK I BOS-ÑA PÅ’GU NA HA’ÅNI,
CHA’-MIYU MUNA’FANMAHEHETTUK I KURASON-MIYU.
Låo Un bira tåtti para potbus i taotåo,
ilelek-mu, “Bira hamyu tåtti famagu’un tåotåo!”
Sa’ i mit åñus gi me’nå-mu
kalang nigap ha’, på’gu nai esta maloffan,
osino kalang i guåtdia gi puengi,
INEPPI…..
Un na’fåttu uttimun-ñiha;
Gi sigenti ogga’an manmalingu kalang guinifi;
kalang i cha’guan ni malåyu.
Dokku’ betdi gi egga’an;
låo å’anglu’ yan malålayu gi puengi.
INEPPI…..
Fa’nå’gui ham tumufung dinanchi i ha’ånin-måmi,
kosa ki siña manomtum kurason-måmi.
Na’pasensia Håo, O Asaina! Kuåntu dihas tetehnan?
Gai ma’asi’ nu i tentago’-mu siha!
INEPPI…..
Na’fambula ham ni yine’ase’-mu yanggin manana,
kosa ki siña manmaguf ham mangånta todu i ha’ånin-måmi.
Puedi u iyun-måmi i kariñosu na inadahin i Saina i Yi’us-måmi.
Na’misin i che’chu’ i kannai-måmi!
Na’misin i che’chu’ i kannai-måmi!
INEPPI…..
SIGUNDU NA TINAITAI Col 3, 1-5. 9-11
Un tinaitai ginin i Kattan San Pablo para i taotåo Colassae
Hafañe’lus:
Esta mana’fanlå’la’ hamyu yan i Kristo Jesus, pues båtga hamyu gi kosas långit, anai matåta’chung i Kristo gi tronu-ña gi agapa’ na båndan Yu’us. Cha’-miyu muna’susuha i hinassun-miyu gi kosas siha guihi, åhi’ ti i kosas esti na tånu’. Esta manmåtai hamyu, ya i lina’la’-miyu uma’attuk yan i Kristo gi as Yu’us. Gaigi gi Kristo i magåhit na lina’la’-miyu ya yanggin umannuk Gui’, siempri manannuk hamyu yan Guiya para en fañåonåo gi gloriå-ña!
Intonsis debidi en pinu’ i disehun esti na tånu’ ni machocho’chu’ giya hamyu, i che’chu’ disunestu, diskaråda, minalagu’ i sensin, manailayi na disehu, yan ambenterihas (sa’ uma’achuli’ i ambenterihas yan i ma’adoran i mamfåtsu na yu’us). Cha’-miyu fana’adagi unu yan ottru, sa’ esta en pila’ i hagas na tåotåo giya hamyu yan i bision-ña siha yan esta manminagågu hamyu nu i nuebu na tåotåo. Guiya esti i nuebu na fina’tinas Yu’us, ni kada biråda Ha rinuenueba gi imahen-ña, para ki siña nina’kumprendi håo kabålis nu Guiya. Put esti na esta tåya’ difirensia entri i MamPagånu yan i ManHudihos, entri i manmasetkumsisiu yan atyu siha i ahi’, i manistrangheru, i ti manmasibililisa, i manisklåbu yan i manlibri, låo i Kristo Guiya todu yan gaigi Gui’ gi todu.
I finu’ i Saina.
IBANGHELIU Lk 12, 13-21
ÅLELUIA Mt 5, 3
R. Åleluia. MANDICHOSU I MAMOPBLIN ESPIRITU;
SA’ U IYUN-ÑIHA I RAINUN I LANGIT. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Un tåotåo gi entalu’ i linahyan ilek-ña as Jesus, “Ma’estru, sangåni fan i che’lu-hu na u dibidi i tanu’ ni ha nå’i ham si tatan-måmi.” Ineppi as Jesus, “Amigu, håyi Yu’ numå’i pudet para bai Hu fanhusga, osino, para bai Hu dibidiyi hamyu ni tanu’-miyu?” Pues mansinangåni todu i maniståba guennao, “Adahi hamyu, yan prutehi hamyu ginin todu klåsin ambenterihas; sa’ ti ginin i guinaha muna’tutunas i lina’lå’-ña i taotåo, achukka’ taimanu riniku-ña.”
Dispues mansinangåni as Jesus nu esti na fina’akumparasion, “Un riku na tåotåo guaha tano’-ña ni mangusesetcha måolik na pruduktu. Entri guiya ha’ na maisa ilek-ña, ‘Tåya’ lugåt ni para bai hu po’lu todu i kusetchåk-ku. Håfa mohun bai hu cho’gui?’ Entri guiya ha’ ilek-ña, ‘Estigui’ bai hu cho’gui, bai hu yulang påpa’ i sagan pine’lok-ku ya bai hu håtsa unu ni mås dångkulu, anai siña hu po’lu todu i kusetchåk-ku yan todu siha i guinaha-hu. Pues bai hu sangånin maisa yu’, Suetti håo na tåotåo! Nahung håo ni guinaha-mu para åpmam na tiempu. Dispasiuyi ha’ på’gu ya un gosan maisa håo, kanu’i yan maneskåyi!’ Låo ilek-ña si Yu’us nu guiya, ‘Tontu håo! På’gu mismu na puengi u fåkpu’ i lina’lå’-mu; pues håyi para u inaprubetcha todu siha i guinaha-mu?’ “
Put lusuttimu ilek-ña si Jesus, “Parehu ha’ yan esti atyu siha na tåotåo ni mannana’etnun rikesa para siha låo ti manriku gi me’nan Yu’us.”
I Ibangheliun i Saina.