FINENE’NA NA TINAITAI Ex 16, 2-4. 12-15
Un tinaitai ginin i Lepblun Exodus
Interu i kumunidån i ManIsrailitas manggonggung kontra si Moises yan Aaron. Ilik-ñiha i ManIsrailitas ni esti i dos, “Manmåolek-ña ha’ hit yanggin manmåtai gi kannai Yu’us giya Ihipto, mientras manmatå’ta’chung hit ya mañotchochu kåtni yan pån ya manhåhaspuk hit. Låo nåya ha’ en kenni’ ham mågi guini gi disiettu ya para u fanmåtai ñålang i kumunidå!”
Pues ilek-ña i Saina as Moises, “Bai Hu na’uchan påpa’ pån ginin i langit para hamyu. Kada diha u fanhuyung i taotåo ya u marikohi i pattin-ñiha; taiguini na bai chagi siha, ya bai li’i’ kåo u madalalaki i tinago’-hu pat åhi’.
“Hu hunguk i ginenggung i ManIsrailitas. Sangåni siha: En fañotchu kåtni yanggin på’gu homhum, yan gi egga’an en fanhåspuk ni pån, kosa ki siña en tingu’ na Guåhu, i Saina, i Yi’us-miyu.”
Gi pupuengi manhuyung i ke’ku’ ya piesa ha’ gi halum kåmpu. Gi egga’an tinampi i kåmpo ni chi’up, ya anai umånglu’ i chi’up iståba gi hilu’ odda’ finu na fina’arina. Anai mali’i’ esti, manafaisin kada unu, “Håfa esti?” sa’ put i ti matungu’. Mansinangåni siha as Moises, “Guiya esti i pån ni mannina’i hamyu ni Saina para en kannu’.”
I finu’ i Saina.
INEPPIN I SÅTMU Ps 78, 3-4. 23-24. 25. 54
R. (24) MANNINA’I SIHA NI SAINA PÅN GININ I LANGIT
Esta in hinguk esti siha yan in tingu’;
manmasangåni ham ni mañainan-måmi,
bai in sangåni i manmamamaila’ na hinerasion put esti siha,
i mangguaiyayun yan manmetgut na bidå-ña i Saina,
i manna’manman na bidå-ña.
INEPPI…..
Put ennåo na Ha otdin i mapagåhis siha
yan Ha baba i pettan i langit;
Ha na’uchan påpa’ si Yu’us manna gi hilu’-ñiha para na’-ñiha
yan mannina’i siha linangitan na pån.
INEPPI…..
Makånnu’ ni taotåo siha i pån i manånghit;
ya mannina’i siha abundånsia na mantinsion.
Ya Ha konni’ siha para i sagrådu na tano’-ña,
para i eksu’ ni Ha gånna ni agapa’-ña.
INEPPI…..
SIGUNDU NA TINAITAI Eph 4, 17. 20-24
Un tinaitai ginin i kattan San Pablo para i taotåo Ephesus
Hafañe’lus:
Intonsis, gi na’an i Saina, hu sangångani hamyu para en gef adahi: ya cha’-miyu fanlåla’la’ kalang i MamPagånu, ni tåya’ bali-ña i hinassun-ñiha. Ti ennåo tiningu’-miyu put i Kristo! Hunggan esta en hinguk put Guiya, ya kumu en tattitiyi Gui’ manmafa’nå’gui hamyu ni minagåhit gi as Jesus. Intonsis yuti’ huyung i hagas na klåsin lina’la’-miyu, atyu i lina’la’-miyu gi manmaloffan na tiempu, atyu i hagas na kustumbrin-miyu ni dinistrorosa ni fafá’baba na minalagu’. Debidi u fannuebu i kurason yan i hinassun-miyu, ya debidi en hatmi i nuebu na kustumbri, ni mafa’tinas gi pinarehun Yu’us ya uma’annuk gi magåhit na lina’la’ ni tinas yan såntus.
I finu’ i Saina.
IBANGHELIU Jn 6, 24-35
ÅLELUIA Mt 4, 4
R. Åleluia. TI GININ I PÅN HA’ NA LÅLA’LA’ I TAOTÅO,
LÅO GININ TODU I FINIHU’ NI HUMUHUYUNG GININ
I PACHUT YU’US.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Anai mali’i’ ni linahyan tåotåo na ni si Jesus ni i mandisipulu manggaigi, siha lokkui’ manma’udai gi boti ya manhånåo para ‘Capernaum’ para u ma’ispiha Gui’. Anai masodda’ si Jesus gi ottru båndan hagoi ilik-ñiha nu Guiya, “Ma’estru, ngai’an nai måttu Håo mågi?” Manineppi siha as Jesus: “Åmen, åmen, bai Hu asigura hamyu, ti en ispipiha Yu’ put i manmanli’i’ hamyu siñåt låo sino ki put i mañotchu hamyu yan manhåspuk hamyu nu i pån. Ti debidi en fanmachocho’chu’ put i nengkannu’ ni siña mahangi’ låo sino ki fanmacho’chu’ put i nengkannu’ ni para u måmåolik ha’ todu i tiempu, atyu na nengkannu’ ni para en fannina’i ni Lahin i Taotåo; sa’ put Guiya ennåo na si Yu’us Tåta Ha po’lu i seyu-ña.” Anai mahunguk esti ilik-ñiha nu Guiya, “Håfa debidi in fa’tinas para in che’gui i che’chu’ Yu’us?” Manoppi si Jesus: “Estigui’ i che’chu’ Yu’us; pe’lu i hinenggin-miyu gi atyu i Ha na’hånåo.” Mafaisin Gui’ ni linahyan, “Yanggin para bai in pe’lu i hinenggin-måmi giya Hågu håfa na klåsin siñåt para Un cho’gui para bai in li’i’? Håfa ufisiosio-mu? Mañotchu ‘manna’ i mañainan-måmi gi disiettu; sigun gi Eskritura ‘Mannina’i siha as Yu’us pån ginin i langit para u makånnu’.’ ” Ilek-ña si Jesus nu siha: “Åmen, åmen, bai Hu asigura hamyu ni minagåhit, ti si Moises numå’i hamyu pån ginin i langit; sino ki si Tatå-hu numå’i hamyu ni linangitan na pån. I pån Yu’us mafåttu ginin i langit ya Ha nåna’i lina’la’ i tanu’.” I taotåo siha magågåo Gui’ ilik-ñiñiha, “Siñot, nå’i ham ni esti na pån para todu i tiempu.” Maninisplikåyi as Jesus taiguini: “Guåhu mismu i pån ni mannåna’i lina’la’; i mattu giya Guåhu ni ngai’an nai u ñålang ta’lu, i manhonggi nu Guåhu ni ngai’an nai u må’hu ta’lu.” I Ibangheliun i Saina.
