B
FINENI’NA NA TINAITAI 2 Kgs 4, 42-44
Un tinaitai ginin i sigundu na Lepblun i Manrai
Måttu un tåotåo ginin Baal-shalishah ha chulili’i si Elisha, i taotåo Yu’us, benti na pidåsun pån ni mafa’tinas ginin i primet na tinekcha’ sibåda, yan fresku na masotkan mai’is. Ilek-ña si Elisha, “Nå’i i taotåo siha ya u ma kånnu’ “. Låo ti malagu’ i sitbinten-ña ya ilek-ña, “Håfa taimanu para bai hu plånta esti gi me’nan sientu na lalåhi?” Ha insisti si Elisha ya ilek-ña, “Nå’i i taotåo siha ya u ma kånnu’.” Sa’ taiguini ilek-ña i Saina, Para u fañotchu i taotåo siha ya para u guaha ha’ sopbla.” Ya anai munhåyan mañotchu, guaha dididi’ sopbla, taimanu ha’ ilek-ña i Saina.
I finu’ i Saina.
INEPPIN I SÅTMU Ps 145, 10-11. 15-16. 17-18
R. (16) I KANNAI I SAINA MUNA’FAÑOTCHUCHU HIT;
HA NÅNA’I HIT TODU I NISISIDÅT-TA.
Todu i fina’tinås-mu Un manå’i gråsia, O Asaina,
ya Un ma bendisi ni mamfiet nu Hågu.
Sedi siha ya u masånganñaihun i glorian i rainom-mu
ya u masångan i minitgot-mu.
INEPPI…..
I matan todu ma’a’atan Håo kun inangokku;
ya Un nåna’i siha nengkannu’-ñiha gi ma’apunta na tiempu;
Un baba i kannai-mu
ya Un na’satisfetchu i minalagu’ todu i manlåla’la’ na kosas.
INEPPI….
Tunas Håo Asaina gi todu i bidå-mu,
fiet Håo gi todu i che’cho’-mu.
Hihut Håo Asaina, para atyu siha i umå’agang Håo,
para atyu siha i umå’agang Håo gi minagåhit.
INEPPI…..
SIGUNDU NA TINAITAI Eph 4, 1-6
Un tinaitai ginin i Kattan San Pablo para i taotåo Ephesus
Hafañe’lus:
Guåhu prisuneru yu’ sa’ put i hu sesetbi i Saina, intonsis, hu sosoyu’ hamyu; dalalaki atyu na klåsin lina’la’ i Ha fa’tinas si Yu’us anai maninagang hamyu. Na’fanhumitdi hamyu todu i tiempu, suåbi, yan pasensia. Na’annuk i ginefli’i’-miyu put i mana’asungun hamyu. Che’gui kuåntu i siña para u gagaigi ha’ i dinañña’ ni ginin i Espiritu ni måfattu ginin i pås ni muna’fandadañña’ hamyu kumu unu. Unu ha’ na tataotåo yan unu ha’ na Espiritu, taimanu na unu ha’ na inangokku guaha ni esta maninagang hamyu guatu as Yu’us. Unu ha’ na Saina guaha, yan unu ha’ na hinenggi, yan unu ha’ na båotismu; unu ha’ na Yu’us guaha ya Guiya i Tatan todu i taotåo siha, ni Guiya i Sainan todu, ni machocho’chu’ ginin todu, yan gagaigi Gui’ gi todu.
I finu’ i Saina.
IBANGHELIU Jn 6, 1-15
ÅLELUIA
R. Åleluia. UN TAKKILU’ NA PRUFETA UMANNUK GI ENTALO’-TA;
HA BISITA SI YU’US I TAOTÅO-ÑA.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Dispues di esti, Ha upus si Jesus i Tasin Galileha osino Tiberias. Un dångkulun linahyan tåotåo matattiyi Gui’, sa’ put i mali’i’ i milågru anai Ha na’fanhomlu’ i manmalångu. Humånåo si Jesus hulu’ gi eksu’ ya matå’chung påpa’ yan i mandisipulu-ña siha. Esta hihihut i Giput Påsguan i ManHudihos. Ha atan si Jesus i uriyå-ña ya Ha li’i’ na guaguaguatu un dångkulun linahyan tåotåo giya Guiya, pues ilek-ña as Felipe, “Amånu nai siña manmamåhan hit sufisienti na nengkannu’ para ta na’fañotchu esti siha na tåotåo?” (Ha sångan esti put i para u chagi si Felipe; sa’ Guiya esta Ha tungu’ håfa para u cho’gui.) Manoppi si Felipe, “Maseha para u fanadumididi’ ha’ esti na kantidån tåotåo, ti nahung ni dos sientus pesus na balin pån. Unu gi mandisipulu-ña, si Andres, i che’lun Simon Pedro, ilek-ña: “Gaigi guini un påtgun mañuñuli’ singku pidåsun pån sibåda yan dos na guihan låo håfa bali-ña ennåo para todu esti siha na tåotåo?” Mansinangåni siha as Jesus, “Na’fanmatå’chung påpa’ i taotåo siha.” (Bula chå’guan guini na lugåt). Intonsis todu i taotåo siha manmatå’chung påpa’; kåsi ennåo i singku mit na lalåhi maniståba guennåo. Ha chuli’ si Jesus i pån, mannå’i gråsia as Yu’us, ya Ha påtti i taotåo siha ni manmatåta’chung. Taiguennåo ha’ lokkui’ bidå-ña ni guihan, ya todu manmapåtti månu ha’ i minalagu’-ñiha. Anai manhåspuk todu, ilek-ña nu i mandisipulu-ña, “Rikohi i sepbla na pidåsu siha; mungnga hit dumispitdisia maseha dididi’.” Pues manmarikohi todu, ya mana’bula dossi na kanåstra ni pidåsu siha ni sepbla ginin i singku na pån sibåda ni makannu’ ni taotåo siha. I taotåo siha ni maniståba guennåo, anai mali’i’ esti na milågru ni Ha fa’tinas si Jesus, ilik-ñiha, “Siguru na Guiya esti i Prufeta ni para u fåttu guini gi tanu’!” Ha tungu’ ha’ si Jesus na para u fanmåttu para u makonni’ fuetsåo Gui’ ya para u mana’rai; put ennåo na tuma’lu hulu’ gi eksu’ Guiguiya ha’ na maisa.
I Ibangheliun i Saina.
