FINE’NA NA TINAITAI Gn 18, 20-32
Un tinaitai ginin i Lepblun ‘Genesis’
Dispues ilek-ña i Saina as Abrahan, “Guåha siha manmakkat na akusasion kontra Sudoma yan Gumora, yan sen dångkulu isao-ñiha. Debidi bai Hu hånåo påpa’ para bai Hu kétungu’ kåo manmagåhit i akusasion ni Hu hunguk pat åhi’.”
Intonsis må’pus i dos låhi ya humanåoguatu Sudoma, låo sumåga ha’ i Saina yan si Abrahan. Malak guatu si Abrahan gi Saina ya mamaisin, “Kåo magåhit na para Un distrosa i manunas yan i manailayi? Yanggin guaha singkuenta na manunas gi siudå, kåo para un distrosa interu i siudå? Kåo ti para Un na’måhñao put para Un såtba i singkuenta? Siguru na ti para Un punu’ i manunas yan i manailayi. Impusipbli ennåo! Ti siña un cho’gui ennåo. Yanggin un cho’gui, pues siempri mangkinastiga i manunas yan i manailayi. Impusipbli ennåo. I hues todu i tanu’ debidi u cho’gui i hustisia.” Manoppi i Saina, “Yanggin mañodda’ Yu’ singkuenta na manunas giya Sudoma, ti bai Hu distrosa i siudå put siha.” Kumuentus ta’lu si Abrahan: “Put fabot dispensa sa’ kalang båtbaru yu’ ni sigi ha’ di hu kuentusi Håo, Asaina. Tåotåo ha’ yu’ ya tåya’ direchok-ku para bai sangan ni håfa. Låo yanggin siakåsu na kuarenta’isingku ha’ na manunas na tåotåo inlugåt di singkuenta. Kåo para Un distrosa interu i siudå sa’ put i menus singku?” Manoppi i Saina, “Ti bai Hu distrosa i siudå yanggin mañodda’ yu’ kuarenta’isingku na manunas na tåotåo.” Kumuentus ta’lu si Abrahan: “Yanggin siakåsu na ennao ha’ i kuarenta guaha.” Manoppi i Saina: “Ti bai Hu distrosa yanggin guaha kuarenta.” Ilek-ña si Abrahan, “Put fabot cha’mu lalålalu’, Asaina, låo debidi bai hu kuentus ta’lu. Håfa mohun ya trenta ha’ guaha?” Ilek-ña i Saina, “Ti bai Hu distrosa yanggin guaha trenta.” Ilek-ña si Abrahan, “Put fabot dispensa sa’ kalang båtbaru yu’ ni sigi ha’ di hu kuentusi Håo, Asaina. Håfa mohun ya ennao i benti ha’ masodda’?” Ilek-ña i Saina, “Ti bai Hu distrosa yanggin guaha benti.” Ilek-ña si Abrahan, “Put fabot cha’mu lalålalu’, Asaina, ya bai hu kuentus un biåhi ha’ ta’lu. Håfa mohun ya ennao i dies ha’ masodda?” Ilek-ña i Saina, “Ti bai Hu distrosa yanggin guaha dies.”
I finu’ i Saina.
INEPPIN I SÅTMU Ps 138, 1-2. 2-3. 6-7. 7-8
R. ASAINA, ATYU NA HA’ÅNI ANAI MAMAISIN YU’ AYUDU, UN OPPI YU’.
Hu nå’i Håo gråsia, Asaina, yan todu i kurason-hu,
sa’ un hunguk i palåbras i pachot-tu;
hu kantåyi Håo gi me’nan i manyu’us siha.
Hu saluda guatu i santus na templom-mu;
Hu tuna i na’ån-mu sa’ put i guinaiyam-mu yan fiet Håo.
INEPPI…..
Put i yine’ase’-mu yan i minagahet-mu;
sa’ Un na’annuk na må’gas gi hilu’ todu
i na’ån-mu yan i tinago’-mu.
Anai hu ågang Håo, Un oppi yu’;
Un na’metgut i espiritu-hu.
INEPPI…..
Takkilu’ nai gaigi i Saina, låo Ha adadahi i manakpapa’
yan Ha chagugu’i i mambanidosu
Achukka’ mamomokkat yu’ gi halum i piligru,
Un prutetehi yu’ ginin i linalålu’ i inimigu-hu.
INEPPI…..
Un istitira huyung i kannai-mu; i agapa’-mu sumåsatba yu’.
Humahami yan i Saina asta i uttimu.
Asaina, i guinaiyam-mu u dinira para todu i tiempu.
Cha’-mu disatetendi i che’chu’ i kannai-mu!
INEPPI…..
SIGUNDU NA TINAITAI Col 2, 12-14
Un tinaitai ginin i Kattan San Pablo para i taotåo ‘Colassae’
Hafañe’lus:
Anai manmatakpångi hamyu manmahåfut hamyu yan i Kristo, ya gi båotismu manmakåhat hamyu yan i Kristo ginin i hinenggin-miyu gi aktibu na nina’siñan Yu’us, ni muna’lå’la’ i Kristo ginin i finatai. Ginin un tiempu manmåtai hamyu gi esperituhåt put i isao-miyu yan put i maniståba hamyu MamPagånu ya ti en praktitika i Lai. Låo esta si Yu’us Ha na’fanlå’la’ hamyu yan i Kristo. Esta si Yu’us Ha asi’i hit ni isåo-ta siha. Ha kansela i ti mambunitu siha na dibi-ta ni manma’apunta påpa’, yan todu siha i ta miresi, Ha chuli’ ginin hita esti siha ya Ha atåni gi kilu’us.
I finu’ i Saina.
IBANGHELIU Lk 11, 1-13
ÅLELUIA Rom 8. 15
R. Åleluia. ESTA EN RISIBI I ESPIRITU NI MUNA’FAMFAMAGU’UN YU’US HIT,
YA GININ ATYU NA ESPIRITU NA TA Å’AGANG SI YU’US TATÅ-TA.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Un biåhi iståba na manånayuyut si Jesus gi un lugåt. Anai munhåyan, måttu guatu giya Guiya un disipulu ya ilek-ña, “Fa’nå’gui ham fan, Asaina, manmanåyuyut, taimanu ha’ fa’na’gueñ-ña si Juan ni mandisipulu-ña.” Ilek-ña si Jesus nu siha, “Taiguini gagao-miyu yanggin manmanåyuyut hamyu:
Tåta, u matuna i na’ån-mu,
u mamaila’ i gubetnom-mu.
Nå’i ham kada diha ni agun-måmi.
Asi’i ham nu i isao-måmi,
sa’ in asisi’i todu atyu siha i umisagui ham;
ya cha’-mu muna’fanmatetenta ham.”
Pues ilek-ña si Jesus nu i mandisipulu-ña, “Siakåsu unu giya hamyu humånåo para i gima’ i amigu-ña gi tatalu’ puengi ya u åluk nu guiya, ‘Amigu, presta yu’ tres pån guennao. På’gu ha’ måfattu un amigu-hu gi gima’ ni pumasesehu ya tåya ni håfa siña hu plantåyi gui’;’ ya siakåsu na manoppi gui’ ginin i sanhalum ya ilek-ña, ‘Båsta manatburota. Esta hu kandålu todu i petta, ya manmamaigu’ ham yan i famagu’on-hu, pues ti siña kahulu’ yu’ para bai hu nå’i håo ni håfa ‘– Bai hu sangåni hamyu, na achukka’ siakåsu ti u kahulu’ para un nina’i ni pån sa’ put i amigu-mu gui’, siempri kahulu’ ya un nina’i todu ni malago’-mu sa’ ti mamåhlao håo na un sigi-ha’ mamaisin.
“Ennåo mina’ bai Hu sangåni hamyu: Fanmanggågåo, ya en fanmanå’i; fanmanespiha, ya en fanmañodda’; fanmanyå’hu, ya en fanmababayi. Sa’ todu i manmanggågåo u fanmanå’i, todu i manmanispiha u fanmañodda’, yan todu i manmanyå’hu u fanmababayi. Kåo guaha giya hamyu ni mantåta u nå’i i patgon-ña kulepbla yanggin ginagao gui’ guihan? Pat u nå’i gui’ eskorpiu yanggin ginagao gui’ chåda’? Achukka’ ti mansen måolik hamyu, en tingu’ ha’ numå’i i famagu’un-miyu ni manmåolik siha na kosas. Kuåntu mås i Tata gi langit en fannina’i ni Espiritu Såntu yanggin en faisin Gui’.”
I Ibangheliun i Saina.
