FINE’NA NA TINAITAI 1 Kgs 3, 5. 7-12
Un tinaitai ginin i fine’na na Lepblun i Manrai
Umannuk i Saina gi guinifin Solomon gi puengi. Ilek-ña si Yu’us, “Gågåo Yu’ ni malago’-mu, ya bai Hu nå’i håo.” Manoppi si Solomon: “O Asaina, Yu’os-su, Un na’rai yu’, i tentago’-mu, para bai hu tahgui si tatå-hu as David; låo hobinsitu ha’ yu’, ya ti hu tungu’ håfa para bai hu cho’gui. Hu setbi håo gi entalu’ i taotåo siha ni Un atyik, un dångkulu na katdumin tåotåo ya ti siña manmatufung. Intonsis, nå’i i tentago’-mu, un kurason ni siña mangumprendi para u husga i taotåo-mu yan para u distinggi i dinanchi ginin i linachi. Sa’ håyi siña gumubetna esti i kantidå na tåotåo-mu?”
Nina’maguf i Saina sa’ Ha atyik si Solomon esti na ginagåo. Pues ilek-ña si Yu’us nu guiya: “Yåki esti ginagåo-mu – åhi’ ti anåkku’ na lina’la’ para hågu, åhi’ ti rikesa, osino i lina’la’ i inimigu-mu siha, låo kinemprendi para un tungu’ håfa dinanchi – bai Hu cho’gui taimanu i ginagåo-mu. Hu nå’i håo un kurason ni sen tomtum yan bula kinimprendi ya tåya’ parehu-mu asta på’gu, yan dispues di hågu tåya’ u fåttu u parehu yan hågu.”
I finu’ i Saina.
INEPPIN I SÅTMU Ps 119, 57. 72. 76-77. 127-128. 129-130
- (97) ASAINA, HU GUAIYA I TINAGO’-MU SIHA.
Hågu ha’ malago’-hu, Asaina;
hu prumeti para bai hu cho’gui i fino’-mu.
I tinagu’ i labios-mu mås guaguan para guåhu
ki mit na pidåsun oru yan plåta.
INEPPI…..
Puedi i guinaiyam-mu u kunsuela yu’
sigun gi prumeså-mu nu i tentago’-mu.
Na’fåttu i yine’ase’-mu giya guåhu ya bai hu lå’la’,
sa’ i finana’guem-mu ennåo minagof-fu.
INEPPI…..
Hu sen guaiya i tinago’-mu
mås ki i mås finu na oru.
Put ennåo na hu dalalalaki todu i tinago’-mu;
hu chatli’i’ todu i linachi.
INEPPI…..
Mambunitu i tinago’-mu siha;
pues put ennåo na hu kukumpli.
Yanggin matungu’ i fino’-mu, ennåo mannåna’i inina,
ya Ha nåna’i kinemprendi atyu siha i mansinsiyu.
INEPPI…..
SIGUNDU NA TINAITAI Rom 8, 28-30
Un tinaitai ginin i Kattan San Pablo para i taotåo Roma
Hafañe’lus: Ta tungu’ na Ha chocho’gui si Yu’us i maolik para atyu siha i gumofli’i’ Gui’, atyu siha i Ha ågang sigun gi intension-ña. Atyu siha i esta si Yu’us Ha atyik Ha na’fañahngi lokkui’ para u famparehu yan i Lahi-ña, kosaki Guiya i Lahi-ña u primeru gi entalu’ i meggai na mañe’lu. Intonsis atyu siha i Ha na’fañahngi si Yu’us Ha ågang; ya atyu siha i Ha ågang, Ha na’fanunas gi me’nå-ña, yan Ha na’fañåonåo siha gi gloriå-ña.
I finu’ i Saina.
IBANGHELIU Mt 13, 44-52
- Åleluia. U MATUNA HÅO, TÅTA, SAINAN I LANGIT YAN I TANU’;
UN NA’MATUNGU’ NI MANAKPAPA’ NA TÅOTÅO I MISTERIUN I RAINU.
- Åleluia.
+ Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus ni linahyan tåotåo:
“I Rainun i langit siña ma’akumpåra yan un guaguan na alåhas ni mahåfut gi fanggualu’an ya dispues sinedda’ ni un tåotåo. Ha nå’na’ di nuebu, ya gi minagof-ña humånåo ya ha bendi todu i guinaha-ña ya ha fåhan ennåo na guålu’. “Parehu lokkui’, i Rainun i langit kalang i kumitsiånti ni manispipiha ni manmåolik na petlas. Anai ha sodda’ unu ni sen guaguan na petlas, humånåo tåtti ya ha na’fanmabendi todu i guinaha-ña ya ha fåhan ennåo na petlas. “I Rainun i langit lokkui’ siña ma’akumpåra yan i chinchulu ni mayotti huyung gi hagoi, ya manrikohi todu klåsin guihan. Anai bula, masåggui’ hålum gi kantun hagoi ya manmatå’chung påpa’ para u ma’ayik atyu i manggái bali ya manmapo’lu gi sahguan. Atyu siha i manai bali manmayuti’. Taiguennåo ha’ siempri humuyongña gi uttimun i tanu’. U fanhånåo i manånghit huyung ya u masipåra i manailayi ginin i manmåolik, ya u fanmayotti guatu gi sagan guåfi i manailayi, anai u fanggågak yan u fanchikchik nifin-ñiha.”
Mamfinaisin siha as Jesus, “Kåo en kemprendi todu esti siha?”
Manmanoppi siha, “Hunggan.”
Pues ilek-ña si Jesus, “Kada unu gi ma’estrun i Lai ni humålum dumisipulu gi Rainun i langit kalang i tatan i gima’ ni siña ha laknus ginin i dipositu-ña parehu ha’ i nuebu yan i bihu.”
I Ibangheliun i Saina.
