B
FINENI’NA NA TINAITAI Jer 23, 1-6
Un tinaitai ginin i Lepblun i Prufeta as Jeremiah
Ilek-ña i Saina, manmatdisidu i pastot siha ni muna’fanabak yan chumalapun i kinilu gi pastahi-hu. Intonsis taiguini ilek-ña i Saina, i Yi’us Israhet, kontra i pastoris siha ni uma’atan i taotåo-hu: Esta en chalapun i kinilu-hu siha yan en dilalak siha. Ti en asisti siha, låo guåhu bai Hu arekla hamyu ya bai kastiga i tailayi na bidan-miyu. Guåhu mismu bai Hu na’fanetnun i sepbla gi katdumin i kinilu-hu ginin todu i tanu’ ni Hu dulalak siha ya bai konni’ tåtti para i sagan-ñiha gi sabaneta; guennåo nai u fanmåmta’ yan u fanmamuttiplika. Ilek-ña i Saina, bai Hu apunta pastot para siha para u faninadahi ya båsta manma’å’ñåo yan manlåolåo; ya tåya’ u fåtta.
Ilek-ña i Saina, atan ha’ sa’ mamamaila’ i ha’åni siha, anai para bai Hu kåhat hulu’ un tunas na sinisu para si David; Para u må’gås yan para u måolik gubetnoñ-ña kumu rai, siempri ha cho’gui håfa tunas yan dinanchi gi tanu’. U masåtba iya Hudah gi tiempon-ña, u lå’la’ gi siguridåt iya Israhet. I na’an ni manå’i Gui’: “I Saina i hustisiå-ta.”
I finu’ i Saina.
INEPPIN I SÅTMU Ps 23, 1-3. 3-4. 5. 6.
R. (1) I SAINA I PASTOT-TU, TÅYA’ U FÅTTA GIYA GUÅHU.
I Saina i pastot-tu, tåya’ u fåtta giya guåhu.
Ha påpastu yu’ gi betdi na paståhi;
Ha kokonni’ yu’ guatu gi fi’un i mannåna’i diskånsu na hånum;
Ha na’tata’lu tåtti i fuetsåk-ku.
INEPPI…..
Ha gigiha yu’ gi dinanchi na chålan
put i na’ån-ña.
Achukka’ mamomokkat yu’ gi hemhum na kañåda
tåya’ tailayi ma’a’ñåo-hu; sa’ gaigi Håo gi fi’on-hu;
Un gogo’ti i galuti-mu yan i baston-mu
ni numåna’i yu’ ånimu.
INEPPI…..
Un plånta i lamasa gi me’nå-hu
gi me’nan i maninimigu-hu;
Un olius låña i ilu-hu;
ya i taså-hu esta machuchuda’.
INEPPI…..
I minaolik ha’ yan mina’åsi’ tumattitiyi yu’
todu i lina’lå’-hu;
Ya bai hu såga gi gima’ i Saina
gi manmamamaila’ siha na såkkan.
INEPPI…..
SIGUNDU NA TINAITAI Eph 2, 13-18
Un tinaitai ginin i Kattan San Pablo para i taotåo Ephesus
Hafañe’lus:
Hamyu ni ginin manchågu’, mandadañña’ på’gu yan i Kristo Jesus, manmakonni’ hamyu guatu hihut ginin i sakrifisiun i finatai-ña i Kristo.
I Kristo mismu muna’fåttu i pås giya hita anai Ha na’fandañña’ i MamPagånu yan i ManHudihos kumu un tåotåo. Ha tupa påpa’ i Kristo i liga ni dumibibidi yan muna’faninimimigu siha. Ha funas i tinagu’ yan i areklu siha ni manmåfattu ginin i Lai i ManHudihos put i para u fa’tinas unu ha’ ni nuebu na rasan tåotåo ginin esti i dos gi mandañña’-ñiha yan Guiya, ya ginin esti na Ha istapblesi i pås. Put i finatai-ña gi kilu’us i Kristo Ha distrosa i inachatli’i’-ñiha; ya ginin i kilu’us na Ha na’dañña’ i dos råsa gi un tataotåo ya Ha konni’ siha tåtti para as Yu’us. Pues måttu i Kristo ya sumetmun put i Maolik na Nutisian pås para todu–para hamyu ni MamPagånu, ni ginin manchågu’ gi as Yu’us, yan para i ManHudihos, ni manhihut giya Guiya. Ginin i Kristo na todus hit, ManHudihos yan MamPagånu, mañiha manmåttu guatu gi unu na Espiritu para guatu gi me’nan i Tata.
I finu’ i Saina.
IBANGHELIU Mk 6, 30-34
ÅLELUIA.
R. Åleluia. ILEK-ÑA I SAINA, I GA’-HU KINILU MAHUHUNGUK I BOS-SU;
HU TUNGU’ SIHA, YAN MADALALALAKI YU’.
R. Åleluia.
+ Un tinaitai ginin i såntu Ibangheliu sigun gi tinigi’ San Marcos
Mabira siha tåtti i manapostulis ya masangåni si Jesus nu todu i bidan-ñiha yan i finanå’guin-ñiha. Ilek-ña nu siha, “Fanmamaila’, hamyu ha’ na maisa, para un sasahngi na lugåt ya en fandiskånsa un råtu.” Un dångkulun linahyan tåotåo manmåfattu yan manhåhanåo guatu, ya kana’ ha’ impusipbli siha ni para u fañotchu. Intonsis manhånåo gi boti si Jesus yan i manapostulis mañisiha ha’ na maisa para un lugåt ni apattåo. Manmali’i’ siha ni taotåo na manhåhanåo, ya meggai tumungu’ para månu siha. Tåotåo siha ginin todu i sengsung manmamokkat chaddik guatu guihi na lugåt, ya manmo’na ki si Jesus yan i manapostulis.
Anai manunuk gi boti Ha li’i’ si Jesus un dångkulun linahyan. Nina’ma’åsi’ nu siha, sa’ kalang siha kinilu sin pastot; ya Ha fanå’gui siha åpmam.
I Ibangheliun i Saina.
