A
FINENI’NA NA TINAITAI Wis 12, 13. 16-19
Un tinaitai ginin i Lepblun Tinemtum
Tåya’ Yu’us fuera di Hågu ni umadadahi todu,
na para Un na’annuk na ti Un kundedena i manmåolik,
Sa’ måfattu i hustisia ginin i minitgot-mu;
ya put i ma’gas todu i kosas Håo mina’ pasesensia Håo para todu.
Sa’ Un na’a’annuk i fuetsåm-mu yanggin ti mahonggi i kinabålis i fuetsåm-mu;
ya gi atyu siha i tumungu’ Håo, Un lalåtdi i mandiskuidåo.
Låo maseha Hågu må’gas i minetgut, manhuhusga Håo kun mina’åsi’,
ya Un gubebetna ham kun pinasensia;
sa’ i minetgut ha e’ekkunguk i minalago’-mu.
Ya Un fa’nå’gui i taotåo-mu, ginin esti na cho’chu’
na atyu siha i manunas debidi u fangkariñosu;
Ya Un nå’i i lalahi-mu måolik na rason para u fanmanangokku
na para Un sedi siha na para u fanmañotsut nu i isao-ñiha.
I Finu’ i Saina.
INEPPIN I SÅTMU Ps 86, 5-6. 9-10. 15-16
R. (5) ASAINA, MÅOLIK HÅO YAN MANASISI’I.
Hågu, O Asaina, kariñosu Håo yan manasisi’i,
bula Håo mina’åsi’ para atyu siha i umå’agang Håo.
Ékkunguk, Asaina, i tinayuyot-tu;
yan atendi i bos i ginagågåo-hu.
INEPPI….
Todu i nasion siha ni Un fa’tinas siempri u fanmåttu
ya Un ma’adora, Asaina gi me’nå-mu,
ya u matuna i na’ån-mu.
Sa’ må’gas Håo ya Un chocho’gui i manna’manman siha na fina’tinas;
ya Hågu ha’ na maisa Yu’us.
INEPPI….
Låo Hågu, Asaina, Yu’us Håo ni yo’asi’ yan kariñosu,
ñating lalålu’, bula mina’åsi’ yan fiet Håo.
Talakmagi giya guåhu, ya Un gaima’åsi’ nu guåhu;
nå’i ni minetgot-mu i tentago’-mu.
INEPPI….
SIGUNDU NA TINAITAI Rom 8, 26-27
Un tinaitai ginin i Kattan San Pablo para i taotåo Roma
Hafañe’lus:
Gi etmismu manera måfattu lokkui’ i Espiritu para u ayuda hit, achukka’ manñaba’ hit. Put i ti ta tungu’ taimanu manåyuyut; Guiya i Espiritu mismu gumagågagui hit ginin as Yu’us umu’ugung ni ti siña masångan ni palåbra. Ya si Yu’us, ni Ha lili’i’ hålum i kurason-ta, Ha tungu’ håfa gaigi gi hinassun i Espiritu; sa’ i Espiritu manggågagåo as Yu’us para i taotåo-ña siha sigun gi minalago’-ña.
I Finu’ i Saina.
IBANGHELIU Mt 13, 24-43
ÅLELUIA Mt 11, 25
R. Åleluia. U MATUNA HÅO, TÅTA, SAINAN I LANGIT YAN I TANU’;
UN NA’MATUNGU’ NI MANAKPAPA’ NA TÅOTÅO I MISTERIUN I RAINU.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ha sangåni si Jesus i linahyan ottru na fina’akumparasion: “I Rainun i langit siña ma’akumpåra yan i taotåo ni mañåtpi ni maolik na simiya gi gualo’-ña. Anai manmamaigu’ todu, måttu i inimigu-ña ya manåtmi simiyan chå’guan gi entalu’ i trigu, dispues humånåo. Anai ha tutuhun manmanokcha’ yan mano’a’ i trigu, manannuk lokkui’ i cha’guan. Manmåttu i tintågu’ i gai gualu’ ya masangåni gui’, ‘Siñot, ada ti måolik na simiya tinanom-mu gi gualo’-mu? Mangginin manu atyu siha i cha’guan?’ Manoppi gui’, ‘I inimigu-hu chomo’gui esti.’ Mafaisin gui’ ni tentago’-ña, ‘Kåo malagu’ håo ya bai in ripåsa?’ Manoppi gui’, ‘Mungnga, sa’ yanggin en be’uk i cha’guan siña ha’ en chabe’uk yan i trigu. Po’lu ya u fanla’chuk parehu asta i tiempun kine’ku’ ya gi tiempun kine’ku’ guåhu bai Hu sangåni siha i para u fanmango’ku’, na’fanmunton finene’na i cha’guan ya u fanmasonggi, dispues nai rikohi yan en chili’ i trigu guatu gi dipositu.'”
Mansinangåni siha ta’lu as Jesus ottru fina’akumparasion: “I Rainun i langit uma’achuli’ yan i pipitas muståsa ni guaha chumuli’ ya ha såtpi gi gualu’. Guiya esti i mås dikiki’ na simiya gi todu, låo yanggin dumångkulu guiya mås dångkulu ki todu i tinanum siha. Mama’un dångkulu na trongku ya i paluma manmåfattu ya mafa’titinas i chenchun-ñiha gi ramås-ña siha.”
Mansinangåni siha ta’lu ottru na fina’akumparasion: “I Rainun i langit kalang i libadura ni ha chuli’ i palåo’an ya ha yaka’ yan tres mididan arina, asta ki interu i yinaka’ bulåchu.”
Todu esti siha na leksion Ha fa’nå’gui si Jesus i linahyan tåotåo gi fina’akumparasion. Gi fina’akumparasion ha’ na Ha fa’nå’gui siha, para u makumpli håfa masångan ginin i prufeta:
“Bai Hu kuentusi siha gi fina’akumparasion,
Bai Hu anunsia håfa hagas ha’ uma’atuk desdi i tutuhun i tånu’.”
Dispues Ha na’fanhånåo si Jesus i linahyan ya humånåo Gui’ para i gima’. Manmåttu guatu giya Guiya i mandisipulu yan esti na finaisin, “Esplikåyi ham put i cha’guan gi halum tånu’ na fina’akumparasion.” Gi ineppen-ña ilek-ña, “I lancheru ni mañåñatpi måolik na simiya era Guiya i Lahin i Taotåo; I gualu’ era i siudadånun i Rainu. I cha’guan ha riprisesenta i siudadånun atyu i tailayi ya i inimigu ni sumåtpi i simiyan chå’guan era si Satanås. I ha’ånin kine’ku’, esdisit, i uttimun i tanu’, ya i manmangongo’ku’ era i manånghit. Taimanu ha’ na marikokohi i cha’guan ya masosonggi, taiguennåo ha’ lokkui’ gi uttimun i tanu’. I Lahin i Taotåo siempri Ha na’fanhånåo i mananghet-ña para u marikohi ginin i Rainon-ña todu atyu siha i umeppuk ottru tåotåo siha para u matulaika i hinenggin-ñiha yan i chumocho’gui i tailayi. U famblinangku siha ni anghit hålum gi hetnun guåfi ya guennåo na u fangasao yan u fanchikchik nifin-ñiha. Dispues i taotåo Yu’us siha u fanma’lak kalang i atdao gi Rainun i Tatan-ñiha. Pues fanekkunguk yanggin guaha talangan-miyu!
I Ibangheliun i Saina.
