B
FINENI’NA NA TINAITAI Am 7, 12-15
Un tinaitai ginin i Lepblun i Prufeta as Amos
Si Amaziah (påli’ Bethel) ilek-ña as Amos, “Hågu ni guaguaha lini’e’-mu ritira håo ginin esti, ya un hånåo para i tanu’ Hudah! Ya atyu nai un gånna nengkanno’-mu gi kada biåhi na mannå’i håo prufesiha, låo nungka ta’lu nai un sångan prufesiha guini giya Bethel; sa’ estigui’ nai gaigi i attat yan i templun i rai.” Ineppi si Amaziah as Amos, “Ti prufeta yu’, ni ti såsaonåo yu’ gi gurupun mamprufeta siha; guåhu pastot yan måmamfi’ siha fruta. I Saina kumonni’ yu’ ginin i entalu’ i kinilu siha, ya Ha sangåni yu’ na bai hånåo guatu gi taotåo-hu Israhet para bai sangåni siha ni manmamamaila’ siha na sinisedi.”
I finu’ i Saina.
INEPPIN I SÅTMU Ps 85, 9-10. 11-12. 13-14
R. ASAINA, NA’LI’I’ HAM NI YINE’ASE’-MU YAN NÅ’I HAM NI SATBASION-MU.
Bai hu ékkunguk håfa Ha pruklåma si Yu’us;
sa’ i Saina Ha pruklåma pås para i taotåo-ña,
para i mamfiet, para atyu siha i umangokku Gui’.
Hihut esta i satbasion para i mamfiet;
u bula rikesa gi tano’-ta.
INEPPI…..
U ássudda’ i guinaiya yan i minagåhit;
u áchiku i hustisia yan i pås.
U petsan huyung i minagåhit ginin i tanu’;
ya u talakpapa’ ginin i langit i hustisia.
INEPPI…..
I Saina u chuda’ påpa’ i bendision-ña
ya u bula kusetchån-ña i tano’-ta.
U fofo’na i rikesa gi me’nan i Saina,
yan i giniha gi uriyan i pinikåt-ña.
INEPPI…..
SIGUNDU NA TINAITAI Eph 1, 3-14
Un tinaitai ginin i Kattan San Pablo para i taotåo Ephesus
Hafañe’lus:
Maila’ ya ta nå’i gråsia si Yu’us yan Tatan i Saina-ta as Jesukristo! Gi mandañña’-ta yan i Kristo esta Ha bendisi hit ya Ha nå’i hit todu klåsin espirituhåt na bendision gi langit. Desdi åntis di u mafa’tinas i tanu’, esta si Yu’us Ha atyik hit para iyon-ña ginin i mandañña’-ta yan i Kristo kosa ki siña hit mañåntus yan manai difektu gi me’nå-ña. Put i guinaiyan-ña na Ha disidi si Yu’us na para u na’famagu’on-ña hit ginin i Kristo–estigui’ i minagof-ña yan i minalago’-ña. Maila’ ya ta tuna si Yu’us put i gloriosu na grasiå-ña, sa’ put i dibåtdi na rigålu ni Ha nå’i hit ginin i Ha guaiya na Lahi-ña! Put i finatai-ña i Kristo na mana’fanlibri hit, kumeke’ilekña, manma’asi’i hit ni isåo-ta siha. Gof guaguan i gråsian Yu’us, ni misin Ha nå’i hit! Gi tinemtom-ña Ha cho’gui si Yu’us atyu i Ha planuyi ya Ha sangåni hit ni sikretu na plånu ni esta Ha disidi para u kumpli put i Kristo. Esti na plånu i para u cho’gui si Yu’us yanggin måttu i tiempu, era i para u na’fandañña’ todu i nina’huyung, todu i kosas siha gi langit yan gi tanu’, ya para i Kristo kabeså-ña. Manmachocho’gui todu i kosas siha sigun gi plånun Yu’us yan gi disision-ña; ya si Yu’us Ha atyik hit para taotåo-ña gi dinañña’ yan i Kristo sa’ put i planu-ña, sigun gi disision-ña desdi i tutuhun. Pues nihi ya hita ni fine’na manmanangokku gi Kristo ta tuna i glorian Yu’us!
Ya hamyu lokkui’ manhålum tåotåo Yu’us anai en hinguk i magåhit na minsåhi, i Maolik na Nutisia ni numå’i hamyu satbasion. Manmanhonggi hamyu gi Kristo, ya Ha po’lu si Yu’us i matkån-ña giya hamyu kumu iyon-ña ya mannina’i hamyu ni Espiritu Såntu ni Ha prumeti. I Espiritu gumarantitiha na para ta risibi atyu i Ha prumeti si Yu’us i taotåo-ña, ya esti numåna’i hit siguridåt na siempri si Yu’us u nå’i kabålis na linibri atyu siha i taotåo-ña. Nihi ya ta tuna i gloriå-ña!
I finu’ i Saina.
IBANGHELIU Mk 6, 7-13
ÅLELUIA (see Eph 1, 17-18)
R. Åleluia. PUEDI I TATAN I SAINA-TA AS JESUKRISTO U INA
I MATAN I KURASON-TA
KOSA KI SIÑA TA LI’I’ HÅFA TAIMANU TINAKKILO’ÑA
ATYU NA INANGOKKU NI MANMA’Å’AGANG HIT GUATU.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Ha ågang si Jesus i Dossi ya Ha tutuhun muna’fanhånåo siha dos in dos, ya mannina’i siha åoturidåt kontra i manapplacha’ na espiritu. Mantinagu’ siha na cha’-ñiha fanmañuñuli’ ni håfa gi hinanao-ñiha fuera di båstun ha’–mungnga nengkannu’, mungnga balutan, mungnga salåppi’ gi puttanmuneda gi betsa. Låo debidi u fandinegga sandålias. Ilek-ña, “Mungnga manmañuli’ para pula’-miyu,” Ha umentåyi, ilek-ña, “Maseha håyi gai gima’ ni manhålum hamyu, fañåga guennåo asta ki en dingu ennåo na lugåt. Yanggin guaha lugåt ni ti manmalagu’ rumisibi pat umékkunguk hamyu, tåntan i petbus ennåo na lugåt ginin i adding-miyu gi kinekiyung-miyu kuentan prueba kontra siha.” Anai munhåyan ennåo, manhånåo siha ya mañetmun na gof prisisu i sinetsut. Manmandulalak meggai na aniti ginin i sanhalum tåotåo siha, manma’olius ni laña i manmalångu siha, ya meggai mana’fanhomlu’.
I Ibangheliun i Saina.
