XV DAMENGGU GI UTDINÅRIU NA TIEMPU

FINE’NA NA TINAITAI                                                                             Is 55, l0-ll

Un tinaitai ginin i Lepblun i Prufeta as Isaias

Intonsis ilek-ña i Saina:

Taimanu ha’ na måfattu ginin i langit

i ichan yan i niebi

ya ti mabibira siha tåtti

astaki marega i tanu’,

ha na’måmåolik i edda’ yan meppa’ i tinanum,

ha nåna’i i simiyå-ña atyu i manånanum

yan pån atyu i chumotchochu,

pues taiguennåo ha’ lokkui’ i fino’-hu

ni humuhuyung ginin i pachot-tu;

ti u ta’lu tåtti giya guåhu dibåtdi,

låo siempri macho’gui i minalago’-hu,

ya u makumpli i rason na hu na’fanhånåo siha.

I Finu’ i Saina.

INEPPIN I SÅTMU                                                                         Ps 65, l0. ll. l2-l3. l4

1. (LK 8,8) I SIMIYA NI PODDUNG GI MAOLIK NA ODDA’

U FANOKCHA’ MEPPA’ NA KUSETCHA.

Esta Un bisita i tanu’ yan Un rega,

esta Un na’sen måolik i edda’.

Misin hånum i sadduk Yu’us;

esta Un pripåra i simiya.

INEPPI …

Intonsis Un pripåra i tanu’: Un na’måsmai i inalådu,

Un yamak i trosun odda’.

Un na’mañaña’ ni ichan,

Un bendisi i kusetchån-ña.

INEPPI …

Un kurona i sakkan ni pruduktu;

yan i chalån-mu siha manmachuchuda’ nu i mineggai kusetcha.

I kannat ni ti manma’alådu manmachuchuda’ ni kusetcha;

ya tinampi i eksu’ ni minaguf.

INEPPI …

Piesa ha’ i påstu ni kinilu siha,

ya i kannat nina’onnu’ ni trigu;

manessalåo yan mangånta kun minaguf.

INEPPI…..

SIGUNDU NA TINAITAI                                                                         Rom 8, l8-23

Un tinaitai ginin i Kattan San Pablo para i taotåo Roma

Hafañe’lus:

Hu kunsidedera na i minaså’pit esti na lina’la’ kaiha parehu yan i gloria ni numanangga hit. Todu i nina’huyung masesen diseha manangga na si Yu’us u na’matungu’ i famagu’on-ña. Manmakundena i nina’huyung siha para mungnga na u falingu i rason na manmafa’tinas siha, åhi’ ti put i minalagu’-ñiha, låo put i ennåo minalago’-ña si Yu’us. Låo gaigi ha’ i inangokku na un diha u mana’fanlibri ginin i isklåbu ya u fanlamas esti siha i nina’huyung ya u fañåonåo gi gloriosu na linibrin i famagu’un Yu’us. Ta tungu’ ha’ na asta på’gu na mumentu manu’ugung put puti todu i nina’huyung, taiguihi puti-ña i kumekefañagu. Låo åhi’ ti i nina’huyung ha’ manu’ugung; hita lokkui’ ni manmanå’i ni Espiritu kumu i fine’na na rigålun Yu’us manu’ugung hit gi sanhalom-ta mientras ta nanangga si Yu’us na u fa’famagu’on-ña hit para u na’fanlibri hit.

I Finu’ i Saina.

IBANGHELIU                                                                                              Mt l3, l-9

ÅLELUIA.

1. Aleluia. I SIMIYA GUIYA ENNÅO I FINU’ YU’US, SI JESUKRISTO GUIYA I MAÑÅÑATPI SIMIYA; TODU I MANMÅTTU GIYA GUIYA U FANLÅ’LA’ PARA TODU I TIEMPU.
2. Aleluia.

+ Un tinaitai ginin i såntu Ibangheliu sigun gi tinigi’ San Mateo.

Gi mismu ha’åni anai Ha dingu si Jesus i gima’, matå’chung påpa’ gi kantun hagoi. Humuyung na un dangkulun linahyan tåotåo manetnun gi uriyå-ña pues ennåo na humånåo ya matå’chung gi boti mientras i taotåo siha manotohgi gi kantun hånum. Mangkinuentusi siha åpmam gi fina’akumparasion gi taiguini na manera:

“Un lancheru humånåo huyung para u fañåtpi simiya. Palu gi sinatpen-ña mamoddung gi chalan tåotåo, ya manmåttu i paluma ya makånnu’. Palu gi sinatpen-ña mamoddung gi halum åtchu’, anai dididi’ odda’. Mandokku’ insigidas sa’ ti tåddung i edda’, låo anai kahulu’ i atdao ya manhina’mi, matutuhun manmalåyu sa’ dididi’ hali’-ñiha. Lokkui’, palu gi sinatpen-ña mamoddung gi halum tituka’, anai mandångkulu esti, manñiñikut. Putlus uttimu, palu gi sinatpen-ña mamoddung gi maolik na odda’ ya manmanokcha’ sientu, patsino sisenta, osino trenta buettas.

“Kada unu debidi u gof ripåra håfa hiningongok-ña.”

I Ibangheliun i Saina.