FINE’NA NA TINAITAI Wis 18, 6-9
Un tinaitai ginin i Lepblun Tinemtum
Atyu na puengi matungu’ ha’ kuntiempu ni mañaina-ta,
put ennåo na gigun mali’i’ håfa na klåsin manhula
nai mapo’lu i inangokun-ñiha, mansen maguf manå’i ånimu.
I taotåo-mu mananangga
i satbasion i manunas yan i manmadistrosan i inimigun-ñiha.
Sa’ anai Un kastiga i kuntråriun-måmi,
ginin esti nai Un na’fanmatuna ham ni Un ågang.
Sa’ gi sikretu nai manmanufresi sakrifisiu i mañåntus na famagu’un
ya mapraktitika kumu un kurason atyu i Ha tutuhun i Saina.
I finu’ i Saina.
INEPPIN I SÅTMU Ps 33, 1. 12. 18-19. 20-22
R. (2) MANDICHOSU I TAOTÅO SIHA NI MANINATYIK AS YU’US
PARA IYON-ÑA.
Fanmaguf gi Saina, hamyu ni manunas;
umatya i tinina ginin i manunas.
Maguf i nasion ni ha yå’hu si Yu’us kumu Saina,
i taotåo siha ni Ha atyik kumu iyon-ña.
INEPPI…..
Atan ha’ sa’ gaigi i matan i Saina gi rumibirerensia Gui’,
hilu’ atyu siha i manmanangokku nu i yine’ase’-ña,
Para u nina’fanlibri siha ginin i finatai,
ya u famprinitehi siha achukka’ tiempun ha’ilas.
INEPPI…..
I anti-ta ha nanangga i Saina
Guiya ni ayudantet-ta yan pruteksion-ta.
Puedi u gaigi giya hami i yine’ase’-mu, Asaina;
hami ni pumopo’lu i inangokkun-måmi giya Hågu.
INEPPI…..
SIGUNDU NA TINAITAI Heb 11, 1-2. 8-19
Un tinaitai ginin i Katta para i ManHibrehu
Hafañe’lus:
Ginin i hinenggi ha’ siña muna’fåttu i inangokku ni ta nanangga ya siña nina’annuk i ti siña ta li’i’ gi prisenti. Ginin i hinenggin-ñiha na i manantigu na tåotåo maninaprueba as Yu’us.
Put i hinenggi na manosgi si Abrahan anai inagang as Yu’us para u hånåo guatu gi tanu’ ni prinimeti as Yu’us. Ha dingu i mismu tano’-ña achukka’ ti ha tungu’ para månu gui’. I hinenggi sumusteni gui’ kumu un istrangheru gi tanu’ ni prinimeti as Yu’us. Sumåga gui’ gi halum tento’, taimanu ha’ si Isaac yan si Jacob, ni siha lokkui’ marisibi parehu na prumesa ginin as Yu’us. Ha nanangga si Abrahan para u funhåyan i siudå ni maplanuyi yan makåhat gi petmanenti na fundasion. Put i hininggen-ña na sumiña si Abrahan gumai patgun, maseha esta gui’ sen åmku’ ya si Sara esta ti siña mañågu. Ha angokku si Yu’us na para u kumpli i prumeså-ña. Achukka’ esta si Abrahan siña ta åluk na måtai, ginin guiya i uniku na tåotåo na måttu lahyan na disendensia achameggai yan i puti’un gi langit, yan i grånun unai gi kantun tåsi.
Manmåtai todu esti siha na tåotåo gi hinenggi. Åhi’, ti marisibi atyu siha i Ha prumeti si Yu’us, låo mali’i’ ha’ ginin i chagu’, ya ma’aksepta, ya ma’atmiti ha’ na manistrangheru yan mansinsåsaga siha guini gi tanu’. Atyu i sumåsangan esti siha mana’klåru na manmanispipiha siha para tanu’-ñiha. Åhi’, ti mahahassu i tanu’-ñiha ni madingu; sa’ yanggin taiguennåo, siempri guaha chånsan-ñiha para u ma bira siha tåtti. Inlugåt, måolekña esti na tånu’ i madiseseha, i linangitan na tånu’. Put ennåo na ti mamåhlåo si Yu’us para u ma’ågang ni esti siha kumu Yu’us-ñiha, sa’ esta Ha pripåra un siudå para siha.
Put i hinenggi na ha ufresi si Abrahan i lahi-ña as Isaac kumu sakrifisiu anai chinagi as Yu’us. Guiya si Abrahan muna’ Ha fa’tinas si Yu’us i prumesa, ya listu gui’ para u ufresi i uniku na lahi-ña kumu sakrifisiu. Ilek-ña si Yu’us nu guiya, “Ginin as Isaac na para u fåttu i disindensiåm-mu ni Hu prumeti håo.” Si Abrahan ha rikuknisa na siña si Yu’us Ha na’lå’la’ ta’lu si Isaac ginin i finatai–ya ennåo na siña ta åluk na ha risibi si Abrahan si Isaac tåtti ginin i finatai.
I finu’ i Saina.
IBANGHELIU Lk 12, 32-48
ÅLELUIA
R. Åleluia. FANMAKMÅTA YAN FANLISTU!
TI EN TINGU’ NGAI’AN NAI PARA U FÅTTU I LAHIN I TAOTÅO. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Ilek-ña si Jesus ni mandisipulu-ña: “Mandikiki’ na famagu’un, cha’-miyu fanma’åñåo gi lina’la’-miyu sa’ maguf si Tatan-miyu para en fannina’i ni Rainu. Bendi håfa guinahan-miyu ya fanmanlimosna. Na’guaha pottan munedan-miyu ni ti u matitik, rikesa gi langit ni tåya’ sakki sina chumuli’ osino u dinistrosa ni ga’ga’. Amånu nai gaigi i guinaha-mu atyu nai gaigi i kurason-mu.
“Na’fanmafñut i sinturon gi sinturan-miyu yan listu na’fanmañila’ i fallut-miyu. Na’fanaiguihi hamyu i taotåo siha ni numanangga i finattun i amun-ñiha ginin i fandånggu, kosaki yanggin måttu ya mandåkdak siña en babayi gui’ sin ditinsion. Mandichosu atyu siha na muchåchu i mansinedda’ ni amun-ñiha gi finatton-ña ti manmatuhuk. Åmen, bai hu sangåni hamyu na siempri ha tåpis gui’ ya nina’fanmatå’chung siha gi lamasa ya u fansinetbi. Yanggin siakåsu na måttu gui’ gi tatalu’ puengi patsino åntis di u dokku’ i atdao ya mansinedda’ siha mampriparåo, mandichosu siha siempri. En tingu’ ha’, ya hu tungu’ lokkui’, na yanggin ha tungu’ i kabesan i gima’ ngai’an nai para u fåttu i sakki’, ti u sedi na u hinatmi i gimå’-ña. Put ennåo na na’fanlistu hamyu. I Lahin i Taotåo para u fåttu guihi na ora anai ti en nanangga gui’.”
Ilek-ña si Pedro, “Kåo para hami esti na fina’akumparasion, Asaina, pat para todu i tanu’?”
Ilek-ña i Saina, “Håyi mohun gi hinassun-miyu atyu i fiet yan i sattun na tentågu’ ni siempri nina’må’gas nu i amu-ña ya para guiya u dispåpa’cha huyung ni pattin-ñiha grånun nengkannu’ ni makoko’ku’ guennao na tiempu? Suetti atyu na tentågu’ ni sinedda’ nu i amu-ña machocho’chu’ gi biradå-ña tåtti. Siguru na siempri nina’ingkatgåo gui’ ni todu i guinaha-ña. Låo yanggin i tentågu’ ilek-ña entri guiya, ‘Kakaiha ha’ måttu i amu-hu,’ ya ha tutuhun umanña i lalåhi yan i famalåo’an na tentågu’, chumochotchu yan gumigimin, yan bumulålachu, pues siempri måttu tåtti i amun ennåo na tentågu’ gi ha’åni anai ti ninanangga gui’ yan gi ora ni ti ha tungu’. Siempri kinastiga gui’ duru ya u pine’lu gui’ kumu atyu i ti siña ma’angokku. “I isklåbu ni ha tungu’ ha’ i minalagu’ i amu-ña ya ti ha pripåra gui’ para u kumpli siempri u makastiga duru låo atyu i ti tumungu’ i minalagu’ i amu-ña maseha ha miresi na u masåolak siempri menus kastigu-ña. Yanggin meggai mana’i-ña i taotåo pues siempri meggai para makupblån-ña. Mås meggai para makupblån-ña i taotåo ni mås meggai katgon-ña.
I Ibangheliun i Saina.
