FINE’NA NA TINAITAI 1 Kgs 19, 4-8
Un tinaitai ginin i primet na Lepblun i Manrai
Humånåo si Elijah para i disiettu kuentan un diha na pinekkat, astaki måttu gi un trongku ni mafa’nana’an iskoba ya matå’chung gi sampapa’. Manåyuyut gui’ para u måtai ya taiguini tinayuyot-ña: “Esta o’sun yu’, O Asaina! Konni’ yu’ sa’ parehu ha’ yu’ yan i mañaina-hu.” Umåssun påpa’ ya malingu maigo’-ña gi papa’ i trongkun iskoba, ya pinatcha gui’ ni anghit yan tinagu’ gui’ na u kahulu’ ya u chotchu. Manatan gui’ ya ha li’i’ gi fi’un i ilu-ña un pån yan un buteyan hånum. Dispues di chumotchu yan gumimin, umåssun ta’lu, låo tuma’lu tåtti i anghit i Saina ya pinatcha ya tinagu’ gui’, “Kahulu’ ya un chotchu osino siempri mampus anåkku’ i biåhi!” Kumahulu’ gui’ ya chumotchu yan gumimin; anai nina’metgut gui’ ni nengkannu’ mamokkat gui’ kuarenta dihas yan kuarenta notchi para i sabånan Yu’us, ni mafa’nana’an Horeb.
I finu’ i Saina.
INEPPIN I SÅTMU Ps 34. 2-3. 4-5. 6-7. 8-9
- TAÑÑA’ YA EN LI’I’ I MINAOLIK I SAINA.
Bai hu tuna i Saina todu i tiempu;
i matunå-ña u gagaigi todu i tiempu gi pachot-tu.
Sotta ya u maguf i anti-hu gi Saina;
bai hu mahunguk ni manakpapa’ na tåotåo siha ya u fanmaguf.
INEPPI…..
Ta fanhita tumuna i Saina,
ta fanhita todu muna’takkilu’ i na’ån-ña.
Hu ispiha i Saina, ya Ha oppi yu’
ya Ha na’måhgong todu i ma’a’ñåo-hu.
INEPPI…..
Atan si Yu’us ya un nina’ma’lak ni minaguf,
ya ti u mamåhlåo i matå-mu.
I Saina Ha hunguk i inagang i mamadedesi,
ya Ha na’libri gui’ ginin todu i pinadesi-ña.
INEPPI……
I anghit i Saina ni sumåsaga yan siha,
ha na’fanlibri todu i manma’å’ñåo as Yu’us.
Tañña’ ya en li’i’ i minaolik i Saina;
trangkilu atyu na tåotåo i lumilihing giya Guiya.
INEPPI…..
SIGUNDU NA TINAITAI Eph 4, 30-5, 2
Un tinaitai ginin i Kattan San Pablo para i taotåo Ephesus
Hafañe’lus:
Cha’-miyu muna’triristi i Santus na Espiritun Yu’us; sa’ gi Espiritu nai gaigi i matkån-ña si Yu’us na iyon-ña hamyu, ya Ha garentitiha na siempri måttu i Ha’åni anai para en nina’fanlibri as Yu’us. Yiti’ huyung todu i minala’it, i minalagu’ i sensin, yan i linalålu’. Båsta manessalao pat sino manmaninsutta, båsta i sinientin chinatli’i’. Inlugåt, na’fangkariñosu hamyu unu yan ottru, yan fana’asi’i unu yan ottru, taimanu ha’ na esta maninasi’i hamyu as Yu’us ginin i Kristo.
Put i mangguinaiya hamyu as Yu’us na famagu’on-ña, debidi en chagi para en famparehu yan Guiya. I lina’la’-miyu debidi u dinirihi ni ginefli’i’, taimanu ha’ na Ha gofli’i’ hit i Kristo ya Ha nå’inñaihun i lina’lå’-ña put hita kalang un påopåo na inifresi yan sakrifisiu ni muna’mamaguf si Yu’us.
I finu’ i Saina.
IBANGHELIU Jn 6, 41-51
ÅLELUIA Jn 6, 51-52
- Åleluia. ILEK-ÑA I SAINA, GUÅHU I LALA’LA’ NA PÅN NI
GININ I LANGIT:
YANGGIN GUAHA KUMÅNNU’ ESTI NA PÅN U LÅ’LA’
PARA TODU I TIEMPU.
- Åleluia
.
+ Un tinaitai ginin i såntu Ibangheliu sigun i tinigi’ San Juan
Gi esti i ManHudihos matutuhun manggongung kontra as Jesus sa’ put ilek-ña, “Guåhu i lala’la’ na pån ni ginin i langit.” Sigi ha’ di masångan: “Na ada ti Guiya esti si Jesus, i Lahin Jose? Na ada ti ta tungu’ si tatå-ña yan si nanå-ña? Ya håfa na para u åluk na ginin i langit Gui’ mågi?” Mansinangåni siha as Jesus, “Båsta manggonggung. Tåya siña måttu giya Guåhu solu inagang gui’ as Tatå-hu; Guåhu bai Hu na’kahulu’ gui’ gi uttimu na ha’åni. Esta matugi’ gi mamprufeta siha: U famfina’nå’gui siha as Yu’us. Maseha håyi ni humunguk i Tata ya manungu’ ginin Guiya u fåttu giya Guåhu. Åhi’ ti put esta guaha lumi’i’ i Tata– sa’ atyu ha’ i ginin as Yu’us esta lumi’i’ i Tata. Åmen, åmen, bai Hu sen asigura hamyu, na atyu i manhonggi u gai lina’la’ taihinekkuk. Guåhu i pån ni mannåna’i lina’la’. I mañainan-miyu mañotchu ‘manna’ gi disiettu, låo manmåtai. Låo esti na pån ni måttu ginin i langit para u kånnu’ i taotåo ya ni ngai’an na u måtai. Guåhu mismu i lala’la’ na pån ni måttu ginin i langit. Håyi i kumånnu’ esti na pån u taihinekkuk lina’lå’-ña; i pån ni para bai Hu nå’inñaihun Guiya ennåo i sinsen-hu, para i lina’la’ i tanu’.”
I Ibangheliun i Saina.
