FINENE’NA NA TINAITAI Ez 2, 2-5
Un tinaitai ginin i Lepblun i Prufeta as Ezekiel
Humålum i Espiritu giya guåhu ya Ha na’tohgi yu’, ya hu hunguk i bos ni kumuentutusi yu’ ilek-ña: Låhi, bai na’hånåo håo para i ManIsrailitas, siha ni kumontra Yu’; siha yan i mañainan-ñiha makokontra Yu’ asta på’gu mismu na tiempu. Manåguaguat yan manmahettuk kurason-ñiha esti siha na tåotåo ni para bai na’hånåo håo guatu. Låo debidi un sangåni siha taiguini: Ilek-ña i Saina as Yu’us! Put i mansubetbiu siha na taotåogui, maseha ma’ekkunguk osino makontra håo, siempri u matungu’ na esta mamfinatoigui siha ni un prufeta.
I finu’ i Saina.
INEPPIN I SÅTMU Ps 123, 1-2. 2. 3-4
R. (2) CHETTUN FITMI I MATAN-MÅMI GI SAINA, YA IN GAGAGÅO GUI’ MINA’ÅSI’.
Hu na’ngaha’ hulu’ i matå-hu giya Hågu
ni matåta’chung gi tronu gi langit—
Hunggan, kalang i matan i tentågu’ siha
ni ma’a’atan i kannai ma’gas-ñiha.
INEPPI…..
Taimanu ha’ na i matan i muchåcha
ma’a’atan i kannai i aman-ñiha,
Taiguennåo ha’ lokkui’ i matå-ta ma’a’atan i Saina i Yi’os-ta,
asta ki Ha nå’i hit mina’åsi’.
INEPPI…..
Gai ma’asi’ nu hami, Asaina, gai ma’asi’ nu hami,
sa’ manimpåtchu ham esta ni ináchatli’i’.
Esta mano’sun ham ni fina’ga’ga’ i mambanidosu,
yan i chinatli’i’ i mansubetbiu.
INEPPI…..
SIGUNDU NA TINAITAI 2 Cor 12, 7-10
Un tinaitai ginin i sigundu na Kattan San Pablo para i taotåo ‘Corinth’
Hafañe’lus:
Låo putno u na’bula yu’ i banidå put i meggai lini’e’-hu ni manna’manman siha, manå’i yu’ chetnot-tu para bai hu padesi gi tataotåo-hu, ni kalang tentågu’ Satanås para u añña yu’ putno bai hu banidosu. Tres biåhi hu tåyuyut i Saina put esti ya hu faisin Gui’ para u na’suha. Låo taiguini inippeñ-ña: “Hokkuk ha’ un nisisita na i grasiå-hu, sa’ a’annuk mås minetgotña i fuetsåk-ku yanggin ñaba’ håo.” Intonsis, gof maguf yu’ para bai hu banidosu put i ñiñaba’-hu, put i para bai hu sienti i pruteksion i minetgut i Kristo giya guåhu. Kuntentu ha’ yu’ ni ñiñaba’ siha, insuttu, pinadesi, pinitsigi, yan i minakkat ni hu padesi put i Kristo. Yanggin ñaba’ yu’, pues ennåo nai metgut yu’.
I finu’ i Saina.
IBANGHELIU Mk 6, 1-6a
ÅLELUIA
R. Åleluia. I ESPIRITUN I SAINA GAIGI GI HILO’-HU;
GUIYA MUNA’HÅNÅO YU’ PARA BAI CHULI’I’ NI
MAOLIK NA NUTISIA I MAMOPBLI.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Humånåo si Jesus para i sengsong-ña ya matattiyi Gui’ ni mandisipulu-ña. Anai måttu i Sabaf na ha’åni humånåo para i sinagoga ya Ha tutuhun mama’nå’gui ya nina’fansen manman i linahyan tåotåo ni ume’ékkunguk Gui’. Ilik-ñiha, “Amånu nai manungu’ Gui ni esti siha? Håfa na klåsin tinemtum esti i mana’í-ña? Taimanu fa’tinås-ña ni milågru siha? Ada ti Guiya esti i katpinteru, i lahin Maria, i mañe’lun Santiago, Jose, Jude yan Simon? Na ada ti bisinu-ta i mañe’lu-ña famalåo’an?” Låo ti manmalagu’ ma’aksepta Gui’. I inippen-ña si Jesus ni esti siha, “I mamprufeta manma’o’onra gi todu i lugåt fuera di i tano’-ña, fuera di entri i mamparintes-ña, yan fuera di i gimå’-ña mismu.” Ti siña mama’tinas milågru guennåo, fuera di unus kuåntus na manmalångu ni Ha na’fanhomlu’ anai mampinatcha siha, sa’ nina’sen manman put i natatan hinenggin-ñiha. Inlugåt di ennåo, Ha liliku’i i manhihut na songsung siha mama’nåna’gui.
I Ibangheliun i Saina.
