A
FINENI’NA NA TINAITAI Zec 9, 9-l0
Un tinaitai ginin i Lepblun i Prufeta as Zacarias
Intonsis, ilek-ña i Saina:
Na’maguf håo, O hagan Sion,
essalåo kun minaguf, O hagan Hirusalen!
Atan ha’ sa’ para u fåttu giya hågu i rai-mu;
Guiya un tunas na nana’libri,
humitdi Gui’, yan ma’u’udai gi hilu’ un buliku,
un tatneru, låhi na påtgun buliku.
Siempri ha na’falingu i kalesa ginin Ephraim,
yan i kabåyu ginin Hirusalen;
u falingu i fletchan i gumegera,
ya Guiya para u pruklåma pås para i nasion siha.
I rainon-ña para desdi un tåsi asta ottru tåsi,
yan desdi i Saduk asta i puntan tånu’ siha.
I finu’ i Saina.
INEPPIN I SÅTMU Ps l45, l-2. 8-9. l0-11. l3-l4
R.(l) BAI HU TUNA I NA’ÅN-MU TODU I TIEMPU, RAI-HU YAN YU’OS-SU.
Bai hu na’takkilu’ Håo, O Yu’os-su yan Rai-hu,
yan bai hu tuna i na’ån-mu todu i tiempu.
Bai hu bendisi Håo kada diha,
yan bai hu tuna i na’ån-mu todu i tiempu.
INEPPI…..
I Saina kariñosu yan yo’asi’,
ñating lalålu’ yan misin ginefli’i’.
Måolik i Saina para todu,
Ha ma’asisi’i todu i fina’tinås-ña.
INEPPI…..
Todu i fina’tinås-mu un manå’i gråsia, O Asaina
ya un ma bendisi ni mamfiet nu Hågu.
Sedi siha ya u masånganñaihun i glorian i rainom-mu
ya u masångan i minetgot-mu.
INEPPI…..
Fiet i Saina gi todu i fino’-ña,
yan fiet gi todu siha i che’cho’-ña.
I Saina Ha supopotta todu atyu siha i mamopoddung
yan Ha na’fanatachu todu atyu siha i manetekkun.
INEPPI…..
SIGUNDU NA TINAITAI Rom 8, 9. ll-l3
Un tinaitai ginin i Kattan San Pablo para i taotåo Roma
Hafañe’lus:
Låo ti manlåla’la’ hamyu sigun gi minalagu’ i naturat-miyu kumu tåotåo; inlugåt di esti, manlåla’la’ hamyu sigun gi minalagu’ i Espiritu–yanggin magåhit na låla’la’ i Espiritun Yu’us giya hamyu. Ti iyun i Kristo hamyu yanggin taigui i Espiritun i Kristo giya hamyu.
Yanggin låla’la’ giya hamyu i Espiritun Yu’us, ni muna’lå’la’ ta’lu si Jesus ginin i finatai, pues Guiya ni muna’lå’la’ ta’lu i Kristo ginin i finatai u nå’i lina’la’ i mámatai na tataotåo-miyu ginin i gumaigin i Espiritu-ña giya hamyu. Pues put ennåo, mañe’lu-hu, na guaha upbligasion-ta, låo ti atyu na klåsin upbligasion ni para ta fanlå’la’ sigun gi minalagu’ naturåt ni gaigi giya hita kumu tåotåo. Yanggin manlå’la’ hamyu sigun gi naturåt ni gaigi giya hamyu kumu tåotåo, siempri manmåtai hamyu; låo yanggin manlå’la’ hamyu sigun gi Espiritu siempri en pinu’ i isao siha na aksion-miyu ya siempri manlå’la’ hamyu.
I finu’ i Saina.
IBANGHELIU Mt 11, 25-30
ÅLELUIA Mt 11-25
R. Åleluia. U MATUNA HÅO, TÅTA, SAINAN I LANGIT YAN I TANU’;
UN NA’MATUNGU’ NI MANDIKIKI’ I MISTERIUN I RAINU.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Atyu na tiempu taiguini sinangån-ña si Jesus: “Tåta, Sainan långit yan tånu’, Hågu Hu tutuna sa’ atyu siha i ti Un na’matungu’ ni manmalåti’ yan i manomtum Un na’matungu’ ni famagu’un. Tåta, hunggan magåhit. Sen máguf Håo Un disidi esti siha.
“Todu esti siha Ha nå’i Yu’ si Tåta. Tåya’ tumungu’ i Lahi-ña sino ki i Tata, yan tåya’ tumungu’ i Tata sino ki i Lahi-ña yan maseha håyi malago’-ña na u na’matungu’ i Tata.
“Fanmamaila’ giya Guåhu, todu hamyu ni manyayas yan mangkatgådu, ya Guåhu bai Hu na’fandiskånsa hamyu. Chili’ i yigu-hu ya en ima gi apågan-miyu ya en fanmanungu’ ginin Guahu, sa’ kariñosu yan humitdi i kurason-hu. I antin-miyu siempri u fanmañodda’ diskånsu. I yigu-hu ni para bai Hu nå’i hamyu ti mapput, ya i katga ni para bai Hu po’lu gi hilu’-miyu ñahlalang.”
I Ibangheliun i Saina.
