A
FINENI’NA NA TINAITAI 2 Kgs 4, 8-ll. l4-l6a
Un tinaitai ginin i Sigundu na Lepblun i Manrai
Un diha måttu si Elisha guatu giya Shunem, anai iståba un palåo’an ni takkilu’ pueston-ña gi entalu’ i taotåo, ya finaisin gui’ para u chotchu i dos. Dispues di ennåo, kada biåhi di maloffan guennåo si Elisha sumusugu’ para u chotchu. Intonsis ha sangåni i asaguå-ña, “Hu tungu’ na sinantusan esti na tåotåo ginin as Yu’us. Yåki sessu ha bisita hit, maila’ ya ta arekla un kuåttu gi hilu’ i atuf ya ta na’yiyi un kåtri, lamasa, siya yan fållut, kosa ki yanggin måttu giya hita ennåo nai u såsaga.” Guennåo nai dispues måttu si Elisha ya sumåga gi kuåttu un puengi.
Dispues mamaisin si Elisha, “Kåo guaha siña macho’gui para guiya?” Manoppi si Gehazi i sitbinten-ña, “Hunggan! tåya’ lahi-ña ya esta å’amku’ i asaguå-ña.” Ilek-ña si Elisha, “Ågang gui’ mågi”. Anai ma’ågang ya måttu ya tumohgi gi petta, mama’tinas prumesa si Elisha, “Taiguini na tiempu ottru såkkan siempri mangaririñu håo un patgun låhi.”
I finu’ i Saina.
INEPPIN I SÅTMU Ps 89, 2-3. l6-l7. l8-l9
R.(2) BAI HU KÅNTA I MINAOLIK I SAINA TODU I TIEMPU.
Bai hu kånta todu i tiempu i fabot ni ginin i Saina,
bai hu pruklåma na fiet Håo para todu i hinerasion siha.
Sa’ esta ilek-mu, “I guinaiyak-ku esta ma’istapblesi para todu i tiempu”;
esta Un kumfitma gi langit na fiet Håo.
INEPPI…..
Manmaguf i taotåo ni umadodora Håo, Asaina,
ni manlåla’la’ ma’lak gi me’nå-mu.
Manmaguf makantåyi i na’ån-mu todu i diha;
manessalåo kantan guput anai manggånna Håo.
INEPPI…..
Sa’ Hågu ma’lak na fuetsan-ñiha;
put i guinaiyam-mu na manmanggånna ham.
Sa’ i Saina nai gaigi i pruteksion-ta,
i Uniku na Såntus Israhet, i rai-ta!
INEPPI…..
SIGUNDU NA TINAITAI Rom 6, 3-4. 8-ll
Un tinaitai ginin i Kattan San Pablo para i taotåo Roma
Hafañe’lus:
Kåo ti en tingu’ na hita ni manmatakpångi gi as Jesukristo manmatakpångi hit gi finatai-ña? Ginin i manmatakpanget-ta gi finatai-ña manmahåfut hit yan Guiya, kosa ki, taimanu ha’ na mana’lå’la’ Gui’ ta’lu ginin i finatai ginin i glorian i Tata, hita lokkui’ siña manlå’la’ gi nuebu na lina’la’. Yanggin manmåtai hit yan i Kristo, manmanhonggi hit lokkui’ na u ta fanlå’la’ yan Guiya. Ta tungu’ na i Kristo, esta mana’lå’la’ un biåhi ginin i finatai, ti u måtai ta’lu; tåya’ esta fuetsån-ña i finatai giya Guiya. I finatai-ña era finatai ginin i isao, un biåhi ha’ para todu i tiempu; i lina’lå’-ña lina’la’ para si Yu’us. Gi etmismu manera, debidi en kensidera na manmåtai hamyu esta gi isao låo manlåla’la’ para si Yu’us gi as Jesukristo.
I Finu’ i Saina.
IBANGHELIU Mt l0, 37-42
ÅLELUIA Jn 8, l2
R. Åleluia. ILEK-ÑA I SAINA, GUÅHU I KANDIT I TANU’;
I TAOTÅO NI DUMALALAKI YU’ U GAIGI GIYA GUIYA
I KANDIT I LINA’LA’.
R. Åleluia.
+Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus nu i mandisipulu-ña:
“Atyu i gumuaiya si tatå-ña, osino si nanå-ña, lahi-ña pat hagå-ña, mås ki Guahu ti diknu yan Guåhu. Atyu i ti malagu’ ha kåtga i kilu’os-ña para u dalalaki Yu’ ti diknu yan Guåhu. Atyu i guiya ha’ ha ispihan mamaisa siempri ha distrosan maisa gui’, ya atyu i pumopo’lu na taibali gui’ put Guåhu siempri ha sodda’ håyi gui’. “Atyu i umaksepta hamyu ha aksesepta Yu’, ya atyu i umaksepta Yu’ ha aksesepta atyu i muna’hånåo Yu’. Atyu i umaksepta i prufeta sa’ put i ha kåkatga i titulun prufeta siempri ha risibi i premiun i prufeta; atyu i umaksepta un sinantusan na tåotåo sa’ put i matungu’ na såntus gui’ ha risibi i premiun i santus na tåotåo. Ya bai Hu prumeti hamyu na maseha håyi i numa’i tasan hånum manenghing para esti i manakpapa’ sa’ put i disipulu gui’ ti u fåtta gui’ premiu.
I Ibangheliun i Saina.
