FINENE’NA NA TINAITAI Wis 1, 13-15; 2, 23-24
Un tinaitai ginin i Lepblun Tinemtum
Ti si Yu’us fuma’tinas i finatai, ni ti nina’mamaguf Gui’ gi finatai i lala’la’. Sa’ Ha fa’tinas
todu i kosas siha kosa ki u fanggai lina’la’; ya i fina’tinas siha guini na tånu’ mambråbu, ya
tåya’ peknu’ na binenu gi entalu’-ñiha yan tai fuetsa i finatai guini gi tanu’, sa’ i hustisia ti mámatai. Sa’ si Yu’us Ha fa’tinas i taotåo ti para u måtai; Ha fa’tinas gui’ gi imåhin i naturåt-ña. Låo ginin i imbidiun i aniti na måttu i finatai guini gi tanu’, ya atyu siha i manggaigi gi papa’
i aniti u matañña’ i finatai.
I finu’ i Saina.
INEPPIN I SÅTMU Ps 30, 2. 4. 5-6. 11-12. 13
BAI HU TUNA HÅO, ASAINA, SA’ UN RISKÅTA YU’.
Hu tuna Håo, Asaina, sa’ Un kåhat yu’ hulu’
ya ti Un sedi na u fanmaguf i maninimigu-hu put guåhu.
Asaina, Hågu muna’libri yu’ ginin i naftan;
ti Un sedi na bai hu falak påpa’ gi sagan i manmåtai.
INEPPI…..
Kantåyi i Saina, hamyu ni mamfiet,
nå’i agradesimentu i santus na na’ån-ña.
Sa’ un råtu ha’ i yini’usan na lalalo’-ña
i yini’usan na minaolek-ña para todu i tiempu.
Kasao siha manmåfattu gi minatchum åtdåo;
låo minaguf gi chatanmak.
INEPPI….
.
Ekkunguk, O Asaina, ya Un gai ma’asi’ nu guåhu;
Hågu, Asaina, ayudantek-ku.
Un tulaika i piniti-hu para minaguf;
O Asaina, Yu’os-su, bai hu nå’i Håo agradesimentu todu i tiempu.
INEPPI…..
SIGUNDU NA TINAITAI 2 Cor 8, 7. 9. 13-15
Un tinaitai ginin i Kattan San Pablo para i taotåo ‘Corinth’
Hafañe’lus:
Mansen riku hamyu ni todu i guaha giya hamyu: gi hinenggi, gi kuentus, yan gi tiningu’, gi minalagu’-miyu para en fanmanayuda yan gi guinaiyan-miyu nu hami. Ya manmalagu’ ham lokkui’ na en fanggeftåo guini gi sitbisiun guinaiya.
En tingu’ ha’ i gråsian i Saina-ta as Jesukristo; maseha riku Gui’, Ha na’popbli Gui’ put hamyu, put i para en nina’fanriku ginin i pinipblen-ña. Åhi’ ti hu na’fangekegefsaga i ottru tåotåo ya para bai hu na’fañatsaga hamyu; låo put i bula guinahan-miyu på’gu, ennåo mina’ kumbeni na en ayuda atyu siha i manggái nisisidåt. Ya yanggin manggái nisisidåt hamyu ya siha bula guinahan-ñiha, siempri maninayuda hamyu. Gi taiguini na todu manmatråta parehu. Taimanu ha’ na ilek-ña i eskritura, “Atyu i numana’etnun meggai ti meggai guinaha-ña, ya atyu i numana’etnun dididi’ ti dididi’ guinaha-ña.”
I finu’ i Saina.
IBANGHELIU Mk 5, 21-43
ÅLELUIA 2 Tm 1, 10
R. Åleluia. I SAINA-TA AS JESUKRISTO ESTA HA FUNAS I FINATAI,
YA HA CHULI’I HIT LINA’LA’ GININ I IBANGHELIU-ÑA.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Humånåo si Jesus tåtti para i ottru båndan i Tasin Galileha. Guihi gi uriyan i hagoi iståba na manetnun un dångkulun linahyan tåotåo. Si Jairus, må’gas gui’ gi sinagoga, malak guatu, ya anai ha li’i’ si Jesus ha yuti’ñaihun gui’ gi addeng-ña ya finaisin Gui’ kuånto i siña, “I dikiki’ na hagå-hu gof málangu. Put fabot fåttu ya Un po’lu i kånnai-mu gi hilo’-ña, kosa ki siña homlu’ ya u lå’la’!” Pues sumiha humånåo yan si Jesus. Gof meggai na tåotåo mañisiha manhånåo machichigit Gui’ ginin todu i bånda.
Iståba guennåo un palåo’an ni esta dossi åñus di mañuda’ håga’ ya atdit pinadisisi-ña ni achukka’ meggai esta na médiku umåmti gui’. Esta ha latchai i salåppe’-ña, ya inlugåt di u lamåolik lumala’atdit mientras mås tiempu. Ha hunguk put si Jesus, intonsis humålum gi linahyan tåotåo ya umisgin tatti mo’na para as Jesus. Ilek-ña entri guiya, “Yanggin hu patcha i magagu-ña ha’, siempri homlu’ yu’.” Ha patcha i magagu-ña ya insigidas pumåra i haga’; ya ha sienti gi sanhålom-ña na mana’homlu’ gui’. Insigidas Ha sienti si Jesus na kokuyung fuetsa ginin Guiya. Pues tumalaktatti gi entalu’ i linahyan tåotåo ya mamaisin, “Håyi pumatcha i magagu-hu?” Manmanoppi i mandisipulu-ña, “Un li’i’ ha’ na machichigit Håo ni taotåo, ya håfa na Un famaisin håyi pumatcha Håo?” Låo sigi ha’ di manatan si Jesus ya Ha kekeli’i’ håyi pumatcha Gui’. I palåo’an ha tungu’ håfa måsusedi nu guiya; pues måttu, ya manlålaolåo ni mina’a’ñåo-ña, ha yuti’ gui’ påpa’ gi me’nan Jesus ya ha sangåni Gui’ todu ni minagåhit. Ilek-ña si Jesus nu guiya, “Hagå-hu, i hinenggem-mu muna’homlu’ håo. Hånåo ya si Yu’us Un nina’i pås, ya esta ti un famadesi.”
Mientras Ha såsangan esti si Jesus, guaha tentågu’ siha manmåttu ginin i gima’ Jairus ya masangåni gui’, “Måtai i hagå-mu esta. Pues para håfa na un atburota mås i Ma’estru?” Ti Ha atendi si Jesus håfa sinangan esti siha, låo Ha sangåni si Jairus, “Cha’-mu ma’å’a’ñåo, låo fanhonggi.” Pues tåya’ Ha sedi na u hånåo yan Guiya fuera di si Pedro, si Santiago, yan i che’lu-ña as Juån. Manmåttu siha gi gima’ Jairus, ya Ha li’i’ si Jesus i atburotu ya Ha hunguk i a’gang na kasao yan kåti. Humålum ya ilek-ña nu siha, “Håfa esti siha na atburotu? Håfa na mangåkati hamyu? Ti måtai i patgun. Mamaigu’ ha’ gui’!” Interu siha matutuhun mafa’chalik Gui’, pues Ha na’fanhuyung todu siha, Ha konni’ i tata yan i nanan i patgun, yan i tres na mandisipulu-ña, ya manhålum gi kuåttu anai iståba i patgun umå’assun. Ha go’ti i kannai i patgun ya ilek-ña nu guiya, “TALITHA KOUM,” ni kumekke’ilekña, “Dikiki’ na påtgun! Kahulu’!” Insigidas kahulu’ ya ha tutuhun mamokkat. (Dossi åñus idåt-ña.) Anai masusedi esti nina’fansen manman todu! Låo manggof iningkåtga siha as Jesus na cha’-ñiha fane’esangani ni håyi, ya ilek-ña, “Na’chotchu i patgun.”
I Ibangheliun i Saina.
