FINE’NA NA TINAITAI 1 Kgs 19, 16b. 19-21
Un tinaitai ginin i fine’na na Lepblun i Manrai
Ilek-ña i Saina as Elijah: “Siempri hågu para un olius si Elisha, i lahin Shaphat i taotåo Abel-meholah, ya guiya para un tinahgui kumu prufeta.”
Humånåo si Elijah, ya umasudda’ yan si Elisha, i lahin Shaphat, mientras manalåladu yan dossi na buliku; guiya tumattitiyi i dossi. Malak guatu si Elijah gi as Elisha ya ha tåmpi ni magagu-ña. Ha dingu si Elisha i buliku, ya malågu’ ya ha tattiyi si Elijah, ya ilek-ña nu guiya, “Put fabot nangga ya bai hu chiku si tatå-hu yan si nanå-hu, ya bai dalalaki håo.” Manoppi si Elijah, “Sigi tåtti! Kåo guaha ada bidå-hu nu hågu?” Diningu gui’ as Elisha, ya si Elisha ha konni’ i buliku ya ha punu’; ya ha usa i alådu para håyu ya ha sotni i katni, ya ha nå’i i taotåo-ña para u fañotchu. Pues må’pus ya ha dalalaki si Elijah kumu setbenti.
I finu’ i Saina.
INEPPIN I SÅTMU Ps 16, 1-2. 5. 7-8. 9-10. 11
R. (5) HÅGU IRENSIÅK-KU, O ASAINA.
Adahi yu’, O Yu’us, sa’ giya Hågu nai lumilihing yu’;
ilek-ku nu i Saina, “Hågu Saina-hu.
O Asaina, Hågu i pattek-ku yan i taså-hu,
Hågu gumogo’ti fitmi i pattek-ku.
INEPPI…..
Bai hu tuna i Saina ni umakunseseha yu’;
achukka’ puengi i kurason-hu ha å’agang yu’.
Todu i tiempu gagaigi i Saina gi me’nå-hu;
yanggin gaigi Gui’ gi fi’on-hu ti bai hu ma’atburota.
INEPPI…..
Put esti na trangkilu i kurason-hu yan maguf i anti-hu,
kuntodu i tataotåo-hu gai kumfiånsa;
Sa’ ti para Un abandona i anti-hu para i sampapa’ na tånu’
yan ti para Un sedi i mamfiet na para u fanlamas.
INEPPI…..
Hågu para Un fa’nu’i yu’ ni chalan i lina’la,
kabålis na minaguf gi me’nå-mu,
ya para todu i tiempu i minaguf gi agapa’-mu.
INEPPI…..
SIGUNDU NA TINAITAI Gal 5, 1. 13-18
Un tinaitai ginin i Kattan San Pablo para i taotåo ‘Galatia’
Hafañe’lus: Linibri guinaha-ta–esta i Kristo Ha na’fanlibri hit! Intonsis fanohgi kumu manlibri na taotågui, ya cha’-miyu sesedi na en fanesklåbu ta’lu.
På’gu put hamyu, mañe’lu-hu, manma’ågang hamyu para en fanlibri. Låo cha’-miyu sesedi ya para en fa’eskusu esti na linibrin-miyu ya para en sedi na en fangginibetna ni minalagu’ i sensin. Inlugåt di esti, po’lu ya en fanasetbi unu yan ottru ginin i ginefli’i’. Interu i tinagu’ manchinichili’ ni esti i unu na tinagu’: “Gofli’i’ i teguång-mu taiguihi i un gofli’i’ håo mismu.” Yanggin en na’famparehu hamyu yan i manmachålik na gå’ga’, ni mana’puputi yan mana’dådañu unu yan ottru, pues adahi hamyu, sa’ siempri en distrosan maisa hamyu unu yan ottru.
Estigui’ hu såsangan: po’lu ya i Espiritu u dinirihi i lina’la’-miyu, ya siempri ti en na’satisfetchu i minalagu’ i sensin. I minalagu’ i sensin kinekentra ni minalagu’ i Espiritu, ya i minalagu’ i Espiritu kinekentra ni minalagu’ i sensin. Inimigu esti i dos, ya kumeke’ilekña esti na ti siña en che’gui håfa minalagu’-miyu. Yanggin mandiniririhi hamyu ni Espiritu, pues manaigui hamyu gi papa’ i Lai. I finu’ i Saina.
