A
FINENI’NA NA TINAITAI Ex l9, 2-6a
Un tinaitai ginin i Lepblun Exodus
Manmåttu i Manisrailitas gi disiettu giya Sinai ya mahåtsa i tento’-ñiha.
Mientras mañåsaga i Manisrailitas guini gi me’nan i sabåna, humånåo si Moises hulu’ gi sabåna guatu gi as Yu’us. Pues i Saina Ha ågang si Moises ya ilek-ña, “Esti para un sangåni i familian Jacob; sangåni i Manisrailitas: Hamyu mismu lumi’i’ håfa taimanu tratå-hu ni taotåo Ihiptu, yan håfa taimanu katgåk-ku nu hamyu hulu’ gi pappan ågila siha, yan hu konni’ hamyu mågi giya Guåhu. Pues yanggin en ekkunguk i bos-hu yan en dalalaki i kuntratå-hu, hamyu en fanhuyung ispisiåt na iyok-ku, mås Hu guaiya hamyu kini todu i ottru tåotåo siha, maskiseha iyok-ku i tanu’. En fanhuyung rainun mamåli’ para Guåhu, un sinantusan na nasion.”
I finu’ i Saina.
INEPPIN I SÅTMU Ps l00, l-2. 3. 5
R. HITA I TAOTÅO-ÑA: I KINILU GI FANGKINILUYÅN-ÑA.
Fangånta na’maguf para i Saina, todu hamyu ni tanu’ siha;
adora i Saina gi minaguf-miyu;
fanmamaila’ gi me’nå-ña yan manna’maguf na kånta.
INEPPI….
Tingu’, na i Saina Yu’us Gui’;
Guiya fuma’tinas hit, ya iyoñ-ña hit;
tåotåo-ña hit, i Ha atetendi na kinilu.
INEPPI….
Måolik i Saina:
taihinekkuk i ginifli’e’-ña,
fiet Gui’ para todu i hinerasion siha.
INEPPI….
SIGUNDU NA TINAITAI Rom 5, 6-ll
Un tinaitai ginin i Kattan San Pablo para i taotåo Roma
Gi ma’apunta na tiempu, anai maniståtaba ha’ hit mantai’nina’siña, måtai i Kristo put hita ni mantai’ Yu’us na tåotåo. Håssan na guaha tåotåo ha na’enñaihun i ha’ani-ña para un tunas na tåotåo, låo kanna ha’ impusibli na u guaha umatotga måtai put un tunas na tåotåo. Ginin esti na asuntu na Ha prueba i ginifli’e’-ña si Yu’us nu hita: sa’ mientras manggagaigi hit ha’ gi isao måtai i Kristo put hita. På’gu sa’ esta hit mana’fanggåsgas ginin i hagå’-ña, mås mansiguru hit på’gu na para u ta fanmasåtba put i Kristo ginin i linalålu’ Yu’us. Sa’ yanggin anai maniståba hit maninimigun Yu’us, mana’fanafa’måolik hit yan Guiya ginin i finatai i Lahi-ña, mås ki esti siguru na hita ni mana’fanafa’måolik u ta fanmasåtba ginin i lina’lå’-ña. Ya ti ennao ha’; sino ki ta ispipiha i impeñu para ta fambanidosu put si Yu’us ginin i Saina-ta as Jesukristo, ni ginin Guiya na esta ta risibi i inafa’måolik Yu’us.
I finu’ i Saina.
IBANGHELIU Mt 9, 36 – 10, 8
ÅLELUIA
R. Åleluia. HIHUT ESTA I RAINUN YU’US:
FANMAÑOTSUT YAN FANMANHONGGI GI MAOLIK
NA NUTISIA!
R. Åleluia.
+Un tinaitai ginin i såntu Ibangheliu sigun gi tinigi’ San Mateo
Anai Ha li’i’ i katdumin tåotåo, nina’ma’åsi’ kurason-ña si Jesus. Manggagalilik guennao ginin i yinayas-ñiha, kalang kinilu ni tåya’ pastot-ñiha. Ilek-ña ni mandisipulu-ña: “Dinanchi i kusetcha na såkkan låo ti nahung hutnaleru ni para u fanmango’ku’. Faisin i ma’gas i kine’ku’ ya u tågu’ huyung hutnaleru siha para u fanmarikohi i kusetcha.”
Dispues Ha ågang i dossi na mandisipulu-ña ya ha nå’i siha åoturidåt para u fanmandulalak huyung ni ti manggåsgas na espiritu yan para u mana’fanhomlu’ todu klåsin minalångu yan chetnut.
I na’an i dossi na manapostulis: fine’na si Simon, ni ma’å’agang på’gu Pedro, yan i che’lu-ña as Andres; si Santiago, i lahin Zebedee, yan i che’lu-ña as Juan; si Felipe yan Bartholomeo, si Tomas yan Mateo i taotåo kuntribusion: si Santiago i lahin Alphaeus, yan si Thaddaeus; si Simon i membru gi Zealot na pattida, yan si Judas Iscariote, ni trumaiduti Gui’. Si Jesus Ha na’fanhånåo esti siha na lalåhi mandadañña’ kumu dossi para u macho’gui un ispesiåt na cho’chu’, dispues di mannina’i siha ni esti na kunsehu:
“Cha’-miyu bumisisita i tanu’ i mampagånu yan cha’-miyu fanhåhalum gi sengsung i Mansamaritånu. Ispiha in lugåt atyu siha i manmalingu na kinilun i gima’ Israhet. Gi hinanao-miyu, anunsia esti: “Måttu esta i Rainun Yu’us!” Na’fanhomlu’ i manmalångu, na’fanlå’la’ i manmåtai, na’fanmågung i nasarinu, dilalak huyung i manggai’aniti siha. En risibi esti kumu rigålu, pues fanmannå’i kumu rigålu.
I Ibangheliun i Saina.
