FINE’NA NA TINAITAI Ez 17, 22-24
Un tinaitai ginin i Lepblun i Prufeta as ‘Ezekiel’
Taiguini ilek-ña si Yu’us i Saina:
Guåhu lokkui’ bai Hu chuli’ i mås måolik ginin i trongkun ‘cedar’, bai Hu utut ginin i punta gi yahululu’ un binga, Ya bai Hu tåtmi gi yahululu’ gi takkilu’ na sabåna; bai Hu tåtmi gi puntan sabåna giya Israhet. Siempri mañusu ya u fanokcha’ fruta, ya siempri mama’un gåtbu na ‘cedar’.
Todu klåsin paluma siempri u fañåga gi papå’-ña, todu i manggaipappa gi nihung i ramås-ña.
Yan todu i trongkun håyu gi halum tånu’ u matungu’ na Guåhu, i Saina, Hu na’takpapa’ i takkilu’ na trongku, ya Hu kåkahat hulu’ i takpapa’ na trongku, Hu na’malålayu i betdi na trongku, yan Hu na’famfloloris i malåyu na trongku. Put i Guåhu, i Saina, esta kumuentus, pues siempri bai Hu cho’gui.
I finu’ i Saina.
INEPPIN I SÅTMU Ps 92, 2-3. 13-14. 15-16
- (2) ASAINA, MÅOLIK I PARA UN MANÅ’I AGRADESIMENTU.
Måolik i para u manå’i agradesimentu i Saina,
para u makånta i matunan i na’ån-mu, i Mås Takkilu’,
Para mapruklåma i mina’ase’-mu gi chatanmak
yan tulanotchi put i fiet Håo.
INEPPI…..
I tinas na tåotåo siempri u lå’la’ kalang i trongkun påtma,
siempri lå’la’ kalang i trongkun ‘cedar’ giya ‘Lebanon’.
Atyu siha i manmatåtmi gi gima’ i Saina,
u fanlå’la’ gi templun i Yi’os-ta.
INEPPI…..
Siempri manmanokcha’ fruta achukka’ gi inamku’-ñiha;
mambråbu yan manmetgut siha,
Mientras mapruklålama: “Tunas i Saina;
i atcho’-ta, tåya’ linachi giya Guiya.”
INEPPI…..
SIGUNDU NA TINAITAI 2 Cor 5, 6-10
Un tinaitai ginin i sigundu na Kattan San Pablo para i taotåo ‘Corinth’
Hafañe’lus: Todu i tiempu mambula hit kumfihånsa. Ta tungu’ na mientras manggagaigi hit gi gimå’-ta guini na tataotåo manaigui hit gi gima’ i Saina. I lina’lå’-ta asuntun hinenggi, åhi’ ti atyu i ta lili’i’ ni attadok-ta. Mambula hit minatatnga ya ga’ot-ta dumingu i gimå’-ta guini na tataotåo ya ta fañåga gi gimå’-ta yan i Saina. Mås ki ni håfa, manmalagu’ hit na ta na’maguf Gui’, maseha gi gimå’-ta guini pat guihi. Debidi todu hit ta fanannuk gi me’nan i Kristo, ya ta fanmahusga nu Guiya. Kada unu u risibi håfa ha miresi, sigun gi todu siha i bidå-ña gi tataotåo, måolik pat båba.
I finu’ i Saina.
IBANGHELIU Mk 4, 26-34
ÅLELUIA
- Åleluia. I SIMIYA ERA I FINU’ YU’US, I KRISTO GUIYA I MAÑÅÑATPI;
TODU I MANMÅTTU GUATU GIYA GUIYA U FANLÅ’LA’ PARA TODU I TIEMPU. R. Åleluia.
+ Un tinaitai ginin i såntu Ibangheliu sigun i tinigi’ San Marcos
Sigi mo’na si Jesus ni sinangån-ña ya ilek-ña,
“I Rainun Yu’us kalang un tåotåo ni mañåtpi simiya gi gualo’-ña. Mamaigu’ an puengi yan lumililiku’ an ha’åni ya mientras tåntu dodokku’ yan lumala’chuk i simiya. Låo ti ha tungu’ håfa muna’dodokku’. I edda’ mismu muna’dodokku’ yan muna’fanonokcha’ i tinanum: Fine’na mambinga, dispues manispiga, putlus uttimu manannuk i granun trigu. Anai manmåsa i granun trigu humuyung i lancheru ya ha ko’ku’ sa’ måttu i tiempun kusetcha.”
Mamfinaisin siha as Jesus, “Håfa siña ta usa para ta akumpåra i Rainun Yu’us? Håfa na fina’akumparasion siña ta usa para ta isplika? Kalang i simiyan muståsa, ni guiya i mås dikiki’ na simiya gi tånu’. Ha chuli’ i taotåo ya ha tåtmi gi edda’; pues ti åpmam dumokku’ ya dumångkulu ya dumångkulonña ki i ottru tinanum siha. Manråmas dångkulu ya manmåfattu i paluma siha para u fanmama’chonchun gi nihong-ña.” Ha sitmuni si Jesus i taotåo siha ni finana’guen-ña, ha u’usa ottru klåsin fina’akumparasion gi taiguini na manera; mamfina’nåna’gui siha månu ha’ i siña makumprendi. Ti mangkuinentutusi siha sin u usa i fina’akumparasion; låo ha isplilika todu esti siha yanggin mañisiha ha’ yan i mandisipulu-ña.
I Ibangheliun i Saina.
