FINE’NA NA TINAITAI Gn 3, 9-15
Un tinaitai ginin i Lepblun Genesis
Dispues di ha kånnu’ si Adan i tinekcha’ i trongku, inagang gui’ ni Saina as Yu’us ya finaisin gui’, “Månu nai gaigi håo?” Manoppi si Adan, “Hu hunguk håo gi hatdin; låo ma’åñåo yu’, sa’ kisnuda yu’, intonsis umattuk yu’.” Dispues finaisin gui’ as Yu’us, “Håyi sumangåni håo na kisnuda håo? Intonsis esta chumotchu’ håo ginin i trongku ni hu pribi håo na mungnga!” Manoppi i taotåo, “I palåo’an ni Un po’lu guini yan guåhu—guiya numå’i yu’ ni fruta ginin i trongku, ya hu kånnu’.” Pues i Saina as Yu’us Ha faisin i palåo’an, “Sa’ håfa na un cho’gui esti na klåsin cho’chu’?” Manoppi i palåo’an, “I kulepbla fuma’baba yu’, pues ennåo na hu kånnu’.”
Pues ilek-ña i Saina ni kulepbla:
“Sa’ put i un cho’gui esti hågu un makastiga gi todu i ga’ga’
yan ginin todu i manmachalek na fina’tinas;
Hågu un kunanaf gi tiyån-mu,
ya odda’ para un kånnu’
todu i ha’anin lina’lå’-mu.
Bai hu na’achatli’i’ håo yan i palåo’an,
u faninimigu i famagu’on-mu yan i famagu’on-ña;
I patgon-ña u finigis i ilu-mu,
ya hågu un åkka’ i addeng-ña.”
I finu’ i Saina.
INEPPIN I SÅTMU Ps 130, 1-2. 3-4. 5-6. 7-8
- (7) SA’ GI SAINA NAI GUAHA YINE’ASI’
YA GIYA GUIYA NAI GUAHA MEGGAI NA SATBASION
Ginin i fondu ni hokkuk siningon-hu hu ågang Håo, Asaina;
Asaina, ékkunguk i inagång-hu!
Puedi i talanga-mu u ékkunguk
i ginagåo-hu mina’åsi’.
INEPPI…..
Yanggin Un apupunta i isao-måmi, Asaina,
håyi siña ti u makundena?
Låo giya Hågu nai gaigi i inasi’i’
ya put ennåo na ma’o’onra Håo.
INEPPI…..
Mahålang yu’ hu nanangga i Saina,
i anti-hu ha nanangga i fino’-ña.
Mås ki i guåtdia siha ni numanangga i chatanmak,
po’lu i taotåo Israhet ya u ma’ispiha i Saina,
INEPPI…..
Sa’ gaigi gi Saina i mina’åsi’,
giya Guiya nai gaigi i kabålis na satbasion,
Ya si Yu’us u na’libri iya Israhet
ginin todu i isao-ñiha.
INEPPI…..
SIGUNDU NA TIANTAI 2 Cor 4, 13-5, 1
Un tinaitai ginin i sigundu na Kattan San Pablo para i taotåo ‘Corinth’
Hafañe’lus:
Ilek-ña i eskretura, “Kumuentus Yu’ sa’ manhonggi Yu’.” Gi etmismu espiritun hinenggi hita lokkui’ manguentus sa’ manmanhonggi hit. Ta tungu’ na si Yu’us, ni muna’lå’la’ si Jesus ginin i finatai, Guiya lokkui’ u na’fanlå’la’ hit yan si Jesus ya u konni’ hit, yan hamyu, para i me’nå-ña. Todu esti siha manmacho’gui para minaolik-miyu; ya mientras måfattu i gråsian Yu’us gi meggai na tåotåo, siempri ma’ufresi mås tináyuyut agradesimentu para i glorian Yu’us.
Put esti na rason na tåya’ nai malingu animon-måmi. Maseha adumididi’ lalamas i tataotåo-måmi, låo i espiritun-måmi marinuenueba kada diha. Ya esti i dididi’ yan tempuråriu na prublema ni in padedesi siempri u na’fåttu manakkilu’ yan manai hinekkuk na gloria, mandångkuloñña ki i prublema. Ti in pepe’lu i hinassun-måmi gi atyu na kosas siha i mana’annuk, låo gi atyu siha i ti mana’annuk. Atyu i mana’annuk un råtu ha’ para u fandinira, låo atyu i ti mana’annuk para u fandinira todu i tiempu.
Ta tungu’ ha’ na yanggin esti i tento’ i tanu’ nai mañåsaga hit–era i tataotåo-ta guini na tånu’–mayulang påpa’, siempri ha’ si Yu’us Ha na’guaha gimå’-ta gi langit anai para ta fañåga, gi un guma’ ni Guiya mismu fuma’tinas, ni para u dinira todu i tiempu.
I finu’ i Saina.
IBANGHELIU Mk 3, 20-35
ÅLELUIA Jn 12: 31b-32
- Åleluia. PÅ’GU NA U MADULALAK I PRINSIPIN ESTI NA TÅNU’, ILEK-ÑA I SAINA;
YA GUÅHU, YANGGIN MAHÅTSA YU’ HULU’ GININ I TANU’,
BAI HU RIKOHI TODU I TAOTÅO SIHA GIYA GUÅHU.
- Åleluia.
+ Un tinaitai ginin i såntu Ibangheliu sigun i tinigi’ San Marcos
Ha bira Gui’ tåtti si Jesus gi gima’ mañisiha yan i mandisipulu-ña ya mandañña’ ta’lu i linahyan tåotåo, ya sen ti siña ha’ mañotchu’ siha. Anai mahunguk esti ni familia-ña manmåttu para u makonni’ Gui’ sa’ ilik-ñiñiha i taotåo siha na, “Bumåba ilu-ña.” Mientras i ma’estrun i Lai siha ilik-ñiñiha na, “Gaigi si ‘Beelzebul’ giya Guiya,” ya “Mandudulalak aniti ni ginin i pudet i prinsipin i aniti siha.”
Ha na’fanetnun siha ya Ha tutuhun kumuentusi gi fina’ihemplu: “Håfa taimanu si Satanås ha dulalak si Satanås? Yanggin ribulasion i rainu, ti u åpmam ennåo na rainu. Yanggin madibidi i familia gi dos gurupu ti åpmam tiempoñ-ña ennåo na familia. Taiguennåo ha’ lokkui’, yanggin madibidi i rainun Satanås gi dos gurupu, ti u dinira åpmam; siempri madisgråna. Ti siña un tåotåo humålum gi gima’ un metgut na tåotåo ya u såkki i guinaha-ña, solu ha goddi i dueñu fine’ne’na. Ennåo ha’ nai siña ha såkki i guinahan ennåo na guma’. Åmen, bai Hu sangåni hamyu, na todu isao siempri u ma’asi’i yan kuntodu i chatfinu’ ni ha sångan i taotåo, låo maseha håyi ni chumatfinu’i i Espiritu Såntu ni ngai’an nai u ma’asi’i. Ha kåkatga ennåo na isao para todu i tiempu.” Taiguini ilek-ña sa’ put i ilik-ñiha, na “Gaigi giya Guiya i applacha’ na espiritu.”
Manmåttu si nanå-ña yan i mañe’lu-ña si Jesus, ya anai manotohgi gi sanhiyung masangåni Gui’ na ma’aliligåo Gui’. Masangåni Gui’ ni taotåo siha ni manmatåta’chung gi uriyå-ña, “Gaigi si nanå-mu yan i mañe’lu-mu gi sanhiyung ya manmamamaisin nu Hågu.” Gi inippen-ña ilek-ña, “Håyi si nanå-hu yan i mañe’lu-hu?” Ha atan gi uriyå-ña atyu siha i manmatåta’chung ya Ha kutinuha, “Estigui’ siha si nanå-hu yan i mañe’lu-hu. Maseha håyi ni chumocho’gui i minalagu’ Yu’us guiya ennåo i che’lu-hu yan nanå-hu.”
I Ibangheliun i Saina.
