FINE’NA NA TINAITAI Lev 19. 1-2. 17-18
Un tinaitai ginin i Lepblun ‘Levitico’
Ilek-ña i Saina as Moises, “Kuentusi interu i kumunidån Israilitas ya un sangåni siha: Na’fañåntus hamyu, sa’ Guåhu i Saina, i Yi’us-miyu, såntus Yu’.
“Cha’-miyu pepe’lu gi kurason-miyu chinatli’i’ kontra i che’lun-miyu. Maseha debidi en lalåtdi i prohimun-miyu, cha’-miyu nina’fani’isåo put siha. Cha’-miyu bebengga yan cha’-miyu fanmamaguf gi chinatli’i’-miyu ni achataotåo-miyu. Guaiya i prohimun-miyu taiguihi i en guaiya hamyu mismu. Guåhu i Saina.”
I finu’ i Saina.
INEPPIN I SÅTMU Ps 103, 1-2. 3-4. 8. 10. 12-13
R. I SAINA KARIÑOSU YAN YO’ASI’.
Anti-hu, tuna i Saina;
interu i tataotåo-hu, bendisi i santus na na’ån-ña.
Anti-hu, tuna i Saina;
cha’-mu maleleffa ni todu i minaolek-ña.
INEPPI…
Ha asisi’i’ todu i isåo-mu,
Ha na’hohomlu’ todu i chetnot-mu.
Ha na’lilibri i lina’lå’-mu ginin i naftan,
Ha bendidisi håo ni fiet na guinaiya yan mina’åsi’.
INEPPI…
Yo’asi’ yan su’åbi i Saina,
ti chaddik lalålu’, misin Gui’ mina’åsi’.
Ti Ha dimåmanda håfa ha miresi i isåo-ta,
patsino Ha kokopbla håfa apås-ña i bidå-ta.
INEPPI…
Taimanu ha’ chinago’ña desdi i sanhaya asta i sanlagu,
taiguennåo ha’ chinago’ña nai Ha popo’lu i isåo-ta.
Taimanu ha’ na kariñosu i tata ni famagu’on-ña,
taiguennåo ha’ i Saina kariñosu ni mamfiet nu Guiya.
INEPPI…
SIGUNDU NA TINAITAI 1 Cor. 3. 16-23
Un tinaitai ginin i fine’na na Kattan San Pablo para i taotåo ‘Corinth’
Hafañe’lus:
Hunggan, en tingu’ ha’ na templun Yu’us hamyu ya sumåsaga i Espiritun Yu’us giya hamyu! Put ennåo na håyi dumistrosa i templun Yu’us, siempri si Yu’us u dinistrosa gui’. Såntus i templun Yu’us, ya hamyu era ennao i templon-ña.
Mungnga na u guaha fuma’baban maisa gui’. Yanggin guaha giya hamyu umå’aluk na tomtum gui’ gi kosas esti na tånu’, debidi u fama’un tontu, kosa ki siña gui’ humuyung magåhit na tomtum. Atyu i kumunsidedera tinemtum guini gi tanu’, babarihas ha’ ennao gi me’nan Yu’us. Taimanu ha’ ilekña i eskritura: “Si Yu’us, Ha lålasu i manomtum ginin i mismu minalåti’-ñiha”; ottru sinangan gi eskritura ilek-ña: “I Saina, Ha tungu’ ha’ na manaibali i hinassun i manomtum.” Put ennao na mungnga na u guaha bumanidosu put håfa siña ha cho’gui i taotåo. Gi minagåhit, iyun-miyu interu i kosas siha: si Pablo si Apollos yan si Pedro; esti na tånu’, i lina’la’ yan i finatai, i prisenti yan i mamamaila’ na tiempu– todu esti siha iyun-miyu, ya hamyu iyun i Kristo, ya i Kristo iyun Yu’us.
I finu’ i Saina
IBANGHELIU Mt 5. 38-48
ÅLELUIA (1 Jn 2.5)
R. Åleluia. HÅYI KUMUKUMPLI I FINU’ I KRISTO,
LUMÅ’LA HIHUT GI GUINAIYAN YU’US.
R. Åleluia.
Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus ni mandisipulu-ña:
“En hinguk na masångan, ‘Un åttaduk put ottru åttaduk, yan un nifin put ottru nifin.’ Låo Guåhu på’gu Hu sangåni hamyu; cha’-miyu bebengga ni håyi ni umisagui hamyu. Yanggin mapatmåda i agapa’ na fasu-mu, po’lu ya u patmåda i akaggui lokkui’. Yanggin makotti håo put i chininå-mu, nå’i gui’ lokkui’ ni saku-mu. Yanggin guaha sindålun i inimigu umafuetsa håo para un katgåyi gui’ una miya ni katgån-ña chuli’i gui’ una miya mås. Yanggin guaha gumågåo håo una kosa, nå’i gui’; yanggin guaha u mayao håo, na’ayao gui’.”
“En hinguk na masångan, ‘Gefli’i’ i amigun-miyu, yan chatli’i’ i inimigun-miyu siha.’ Låo Guåhu på’gu Hu sangåni hamyu, gefli’i’ i inimigun-miyu, tayuyuti atyu siha i mumattrårata hamyu, kosa ki en famfamagu’un i Tatan-miyu gi langit. Sa’ Ha na’fani’ina i atdåo-ña parehu ha’ gi mambåba yan gi manmåolik na tåotåo, yan Ha na’hanånagui uchan parehu ha’ i manmåolik che’chu’-ñiñiha yan i mambåba. Sa’ håfa na un nanangga na un inapåsi as Yu’us, yanggin un guaiya atyu siha na tåotåo i gumuaiya håo? Kun todu i manmangongopbla kuntribusion macho’cho’gui ennao. Ada na’manman i bidå-mu yanggin un kuentusi i amigu-mu? Na ti kuntodu atyu siha i ti manmanhonggi as Yu’us chumocho’gui ennao? Debidi en fanachátunas yan si Tatan-miyu ni gaigi gi langit.”
I Ibangheliun i Saina.