FINE’NA NA TINAITAI Acts 10, 25-26. 34-35. 44-48
Un tinaitai ginin i Bidan i Manapostulis
Anai humålum si Pedro tinaggam gui’ as Cornelio ya dumimu påpa’ gi menan Pedro ya mañaluda. Ilek-ña si Pedro nu guiya mientras hinahatsa gui’ hulu’, “Kahulu’! Sa’ tåotåo ha’ yu’.”
Ha tutuhun kumuentusi siha si Pedro i MamPagånu ni esti siha na palåbra: “På’gu ha’ hu tututuhun kumumprendi na magåhit na tåya’ si Yu’us ha fabureresi ni unu. Inlugåt di ennåo, si Yu’us Ha aksesepta maseha håyi na nasion tåotåo ni ma’å’ñåo nu Guiya yan måolik bidåda-ña.”
Ti munhåhayan ha sångan si Pedro esti siha na palåbra tumunuk i Espiritu Såntu gi hilu’ atyu siha i ume’ékkunguk i sinangån-ña. Nina’fanmanman i manmasetkumsisio na manmanhonggi ni guma’chuchungi si Pedro sa’ put i manmanå’i ni Espiritu Såntu i MamPagånu lokkui’, sa’ put i manmahunguk siha manguekuentus manna’manman na lingguåhi yan matutuna i tinakkilu’ Yu’us. Guennåo na mumentu mamaisin si Pedro ni esti na kuestion: “Håfa para u chinemma’ na u fanmatakpångi ni hanum esti siha na tåotåo ni parehu yan hita marisibi i Espiritu Såntu?” Intonsis, manotdin si Pedro na u fanmatakpångi esti siha gi na’an Jesukristo. Dispues di macho’gui esti mafaisin gui’ para u såga yan siha unus kuåntus dihas.
I finu’ i Saina.
INEPPIN I SÅTMU Ps 98, 1. 2-3. 3-4
R. (2) I SAINA HA NA’MATUNGU’ GI NASION SIHA I SASATBA NA
NINA’SIÑÅ-ÑA.
Kantåyi i Saina un nuebu na kånta,
sa’ esta Ha cho’gui manna’manman na fina’tinas,
i agapa’ na kannai-ña yan i santus na kuddu-ña,
muna’fanggånna Gui’.
INEPPI…..
I Saina Ha na’matungu’ na manggånna Gui’;
gi me’nan i nasion siha ha na’matungu’ i sasatba na fuetsån-ña,
Esta Ha hassu na fiet i guinaiyan-ña
para i gima’ Israhet.
INEPPI….
Todu i puntan tånu’ esta mali’i’
i satbasion ginin i Yi’os-ta.
Fangånta kun minaguf para i Saina, todu i tanu’;
kantåyi tinina yan essalåo minaguf.
INEPPI…..
SIGUNDU NA TINAITAI 1 Jn 4, 7-10
Un tinaitai ginin i fine’na na Kattan San Juan
Hafañe’lus, nihi ya ta fanágofli’i’ unu yan ottru, sa’ ginin as Yu’us i ginefli’i’. Maseha håyi ni manggofli’i’ patgun Yu’us gui’ ya ha tungu’ si Yu’us. Maseha håyi ni ti manggofli’i’ ti ha tungu’ si Yu’us, sa’ Guiya si Yu’us i ginefli’i’. Ya si Yu’us Ha na’annuk i ginifli’e’-ña nu hita anai Ha na’hånåo i Lahi-ña para i tanu’, kosaki u ta fanggái lina’la’ ginin Guiya. Estigui’ kumeke’ilekña ginefli’i’: åhi’ ti put i ta gofli’i’ si Yu’us, låo put i Ha gofli’i’ hit ya Ha na’hånåo i Lahi-ña para ginin Guiya na ta fanma’asi’i ni isåo-ta siha.
I finu’ i Saina.
IBANGHELIU Jn 15, 9-17
ÅLELUIA Jn 14, 23
R. Åleluia. YANGGIN GUAHA GUMUAIYA YU’, SIEMPRI HA KUMPLI
I FINO’-HU SIHA,
YA SIEMPRI GUINAIYA GUI’ AS TATÅ-HU, YA BAI
IN FATTU GIYA GUIYA.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Ilek-ña si Jesus ni mandisipulu-ña: “Hu gofli’i’ hamyu, taiguihi ha’ i ginifli’e’-ña si Tåta nu Guåhu,
fanlå’la’ gi ginifli’e’-hu. Siempri manlå’la’ hamyu gi ginifli’e’-hu yanggin en kikimpli i tinago’-hu,
taimanu ha’ na Hu kumpli i tinagu’ Tatå-hu, ya lumå’la’ Yu’ gi ginifli’e’-ña.
“Hu sangångani hamyu ni esti kosaki u iyun-miyu i ginifli’e’-hu, kosaki u kabålis i minaguf-miyu.
Estigui’ tinago’-hu: fanágofli’i’ unu yan ottru, taimanu ha’ i ginifli’e’-hu nu hamyu. Tåya’ mås dångkulu na klåsin ginefli’i’ ki esti: i para u nå’inñaihun un tåotåo i lina’lå’-ña put i amigu-ña. Manamigu-hu hamyu yanggin en cheche’gui håfa Hu tågu’ hamyu. Esta ti Hu kuentutusi hamyu kumu isklåbu, sa’ i isklåbu ti ha tungu’ håfa ha chocho’gui i amu-ña. Inlugåt di ennåo, Hu å’agang hamyu amigu, sa’ esta Hu sangåni hamyu todu i hiningok-ku ginin as Tatå-hu. Ti hamyu umatyik Yu’, Guåhu umatyik hamyu para en fanhånåo ya en fanmeppa’ na kusetcha. I kusetchan-miyu debidi u ma’uk, kosaki todu i en gagagåo si Tåta gi na’ån-hu en fannina’i. Estigui’ i tinago’-hu nu hamyu, para en fanágofli’i’ unu yan ottru.”
I Ibangheliun i Saina.
