FINE’NA NA TINAITAI Lv 13, 1-2. 44-46
Un tinaitai ginin i Lepblun ‘Leviticus’
Ilek-ña i Saina as Moises yan Aaron, “Yanggin mambula osino umannuk latti’ pat lumåmlam i lassas i taotåo pues debidi u masuspetcha na nasarinu gui’. Ennåo na tåotåo debidi u makonni’ guatu para i pali’ as Aaron, osino guatu gi unu gi famagu’on-ña na påli’. Yanggin nasarinu yan ti gåsgas ennåo na tåotåo put i chetnut gi ilu-ña i pali’ debidi u diklåra na ti gåsgas gui’.
“I taotåo ni gai chetnut nasarinu debidi u minagågu ni matitik yan mungnga na u tåmpi i ilu-ña, debidi u hommi i pachot-ña ya u essalåo, ‘Applacha’, applacha’!’ Mientras ki gagaigi ha’ i chetnut giya guiya debidi u diklåra na applacha’ gui’, sa’ hunggan magåhit na applacha’ gui’. Ti debidi u dañña’ yan i pumalu, ya u såga gi sanhiyung i kåmpu.”
I finu’ i Saina.
INEPPIN I SÅTMU Ps 32, 1-2. 5. 11
R. (7) GI TIEMPUN PRUBLEMA TUMALAK GUATU YU’ GIYA HÅGU,
ASAINA, YA UN NA’BULA YU’ NI MINAGUF SATBASION.
Maguf i i’isåo ni mana’suha i linachi-ña,
ni ma’asi’i i isåo-ña.
Manmaguf atyu siha i ti maninachåka isåo ni Saina,
ni tåya’ linachi gi espiritun-ñiha.
INEPPI……
Dispues hu atmiti i isåo-hu giya Hågu;
ya ti hu nå’na’ i linachi-hu.
Ilek-ku, “Bai hu komfisatñaihun i linachi-hu gi Saina,”
ya Hågu muna’suha i achåkin i isåo-hu.
INEPPI…..
Fanguntentu gi Saina yan fanmaguf, hamyu ni manunas;
fanessalåo minaguf, todu hamyu ni manunas kurason-miyu.
INEPPI…..
SIGUNDU NA TINAITAI 1 Cor 10, 31-11, 1
Un tinaitai ginin i fine’na na kattan San Pablo para i taotåo Corinth
Hafañe’lus,
Buenu, maseha håfa en che’gui, maseha mañotchu pat manggimin hamyu, che’gui todu para i glorian Yu’us. Fanlå’la’ gi manera anai tåya’ para u faninistotba i ManHudihos, osino MamPagånu pat i Gima’Yu’us i Saina. Che’gui ha’ atyu i hu chocho’gui; hu chocho’gui kuåntu i siña para bai hu na’fanmaguf todus gi todu i bidåda-hu, ya ti hu hahassu i ginefsagak-ku, låo hokkuk ha’ i ginefsagan todus, kosa ki siña siha manmasåtba. Intonsis, etyak yu’ taimanu ha’ na hu e’etyak i Kristo.
I finu’ i Saina.
BANGHELIU Mk 1, 40-45
ÅLELUIA (Lk 7,16)
R. Åleluia. UN TAKKILU’ NA PRUFETA KUMAHULU’ GI ENTALO’-TA,
YA ESTA SI YU’US HA BISITA I TAOTÅO-ÑA.
R. Åleluia.
+ Un tinaitai ginin i såntu Ibangheliu sigun gi tinigi’ San Marcos
Unu ni gai chetnut nasarinu malak guåtu gi as Jesus, dumimu påpa’ ya finaisin Gui’ para u inayuda. Ilek-ña, “Yanggin malagu’ Håo siña Un na’gåsgas yu’.” Nina’sen ma’åsi’ si Jesus ya Ha istira i kånnai-ña ya Ha patcha gui’. Ilek-ña, “Malagu’ Yu’. Un mana’gåsgas!” Gotpi ha’ malingu i chetnut nasarinu gi taotåo ya gumåsgas gui’.
Iningkåtga gui’ as Jesus ya nina’hånåo gui’ insigidas. Ilek-ña, “Adahi na un ésangani ni håyi put esti. Låo hånåo tunas guatu gi as påli’ ya un ineksamina; dispues ufresi i sakrifisiu ni tinagu’ Moises, para prueba para todu na gåsgas håo esta.”
Låo må’pus i taotåo ya ha tutuhun sumånganñaihun gi todu i bånda put i masusedi. Ya put mineggai tåotåo ni humunguk gui’ ti siña esta si Jesus humålum gi sengsung pupblikamenti. Inlugåt di u hålum gi sengsung sumåga ha’ Gui’ gi sanhiyung anai tåya’ tåotåo; låo manmåfattu i taotåo siha ginin todu i bånda.
I Ibangheliun i Saina.
