FINE’NA NA TINAITAI Sir 15, 15-20
Un tinaitai ginin i Lepblun Sirach
Yanggin malagu’ håo, siña un kumpli i tinagu’ Yu’us siha;
fiet håo yanggin un cho’gui i minalago’-ña.
Maplånta gi me’nå-mu guåfi yan hånum;
istira mo’na i kanai-mu, maseha håfa un atyik.
Lina’la’ yan finatai gaigi gi me’nan i taotåo,
maseha håfa ha atyik siempri manå’i gui’.
Misin i tinemtum i Saina;
metgut Gui’ gi fuetsa, yan Ha lili’i’ todu.
I matan Yu’us Ha lili’i’ todu i fina’tinås-ña;
Ha kumprendi todu i che’chu’ tåotåo.
Tåya’ tåotåo Ha tåtagu’ para u isåo,
ni unu Ha nåna’i fuetsa para u fandagi.
I finu’ i Saina.
INEPPIN I SÅTMU Ps 119, 1-2. 4-5. 17-18. 33-34
R. MANMAGUF ATYU SIHA I DUMALALALAKI I TINAGU’ I SAINA!
Manmaguf atyu siha i ti siña manma’achåka i lina’la’-ñiha,
ni manmamomokkat gi finanå’guin i Saina.
Manmaguf atyu siha i kumukumpli i tinago’-ña,
atyu siha i umispipiha i Saina yan todu i kurason-ñiha.
INEPPI…
Un månda siha na u makumpli kabålis
todu i tinago’-mu.
Puedi u fitmi i pinikåt-tu
gi makumplin i minalago’-mu!
INEPPI…
Na’måolik Håo ni tentago’-mu kosa ki siña yu’ lå’la’
ya bai hu kumpli i fino’-mu siha.
Baba i matå-hu kosa ki siña hu kunsidera
i na’manman na finana’guem-mu.
INEPPI…
Asaina, fanå’gui yu’ håfa kumeke’ilekña i tinago’-mu;
kosa ki siña hu kumpli kabålis.
Nå’i yu’ kinimprendi ya bai hu kumpli i tinago’-mu,
ya bai hu cho’gui yan todu i kurason-hu.
INEPPI…
SIGUNDU NA TINAITAI 1 Cor 2, 6-10
Un tinaitai ginin i fine’na na Kattan San Pablo para i taotåo Corinth
Hafañe’lus: Sinimbåtgu, hu pruklålama un tomtum na minsåhi para atyu siha na tåotåo i mano’a gi espirituhåt. Låo, ti i tinemtum ni iyun esti na tånu’ osino i fuetsa ni gumubebetna esti na tånu’–fuetsa ni manmalilingu fuetsan-ñiha. I sikretu na tinemtum Yu’us esti i hu pruklålama, ni i ti matungu’ ni taotåo siha, låo esta Ha atyik esti si Yu’us åntis di u mafa’tinas i tanu’ para u nå’i hit gloria. Tåya’ gi manmå’gas esti na tånu’ tumungu’ put esti na tinemtum. Ti u maklåba mohun i Sainan i gloria yanggin matungu’ put esti. Låo taimanu ha’ na ilek-ña i eskritura:
Håfa tåya’ nai mali’i’ pat mahunguk,
håfa tåya’ sumuspetcha na u masusedi,
esti mismu Ha pripåra si Yu’us
para atyu siha i gumufli’i’ Gui’.
Låo put ginin hita Ha na’fanmanungu’ si Yu’us ni sikretu ginin i Espiritu-ña. Ha bubuska todu i Espiritu, kuntodu i manåna’na’ gi yahålulum na minalagu’ Yu’us.
I finu’ i Saina.
IBANGHELIU Mt 5. 17-37
ÅLELUIA
R. Åleluia U MATUNA HÅO, TÅTA, SAINAN I LANGIT YAN I TANU’;
UN NA’MATUNGU’ NI MANDIKIKI’ I MISTERIUN I RAINU.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus ni mandisipulu-ña: “Cha’-miyu umå’aluk na måttu yu’ para bai Hu tulaika i Lai Moises yan i fina’nå’guin i mamprufeta. Ti ennao na måttu yu’. Måttu yu’ para bai Hu kumpli i Lai. Hahasu esti! Åmen, mientras ki guaguaha långit yan tånu’, ti u matulaika ni sikera i mås dichiching pat i mås dikiki’ na puntu gi Lai–asta i uttimun i tanu’. Put esti na rason, na håyi ti umosgi maseha i mås yapåpapa’ na tinagu’ pat mama’nå’gui ottru na tåotåo na mungnga manosgi, guiya u mås takpapa’ gi Rainun i langit. Låo håyi ha’ ni umosgi i Lai, pat mama’nå’gui ottru na debidi u fanosgi, guiya u takkilu’ gi Rainun i langit. Pues Guåhu mismu Hu sangångani hamyu, na ti siña hamyu manhålum gi Rainun i langit solu mås mamfiet hamyu kumumpli i minalagu’ Yu’us ki i manma’estrun i Lai siha pat i MamFarisehu.
“Gi manmaloffan siha na tiempu en hinguk manmasangåni siha i taotåo, ‘Cha’-miyu fanmamumunu’; håyi mamunu’ u makonni’ guatu gi me’nan i hues.’ Låo Guåhu Hu sangångani hamyu på’gu; na håyi lalålu’ ni i che’lu-ña u makonni’ guatu gi me’nan i hues; håyi sumangåni i che’lu-ña na ‘taiminaolik’ gui’ u makonni’ guatu gi me’nan i Konsiliu; håyi sumångani i che’lu-ña na ‘taibali’ gui’ u gaigi gi piniligru na u falak sasalåguan. Pues yanggin para un ufresi i nina’i-mu as Yu’us gi hilu’ i attat ya guennåo mismu na mumentu nai un hassu na guaha ti umakumprendin-miyu, sotta guennåo i nina’i-mu gi me’nan i attat ya hånåo ya en áfa’måolik nåya yan i che’lu-mu; dispues nai un ta’lu tåtti ya un ufresi si Yu’us ni nina’i-mu. Yanggin guaha tåotåo nina’ma’ågang håo para un makotti, na’måolik håo nu guiya mientras guaguaha tiempu, åntis di en fattu na dos gi kotti; sa’ yanggin gaigi hamyu esta guennåo siempri inintrega håo guatu gi hues, ya i hues un inintrega guatu gi pulisia ya un mapresu. Åmen, ya magåhit na siempri sumåga håo guennåo asta ki un apåsi todu i muttåm-mu.
“En hinguk masångan, ‘Cha’-miyu fanadutteteriu’. Låo på’gu bai Hu sangåni hamyu na; håyi ha’ umatan ya ha malagu’i un palåo’an esta umadutteriu gui’ gi kurason-ña. Pues yanggin i agapa’ na atadok-mu muna’i’isao håo, laknus ya un yuti’! Sa’ måolekña na u gai fatta tataotåo-mu ki un mayoggua kabålis giya sasalåguan. Yanggin i agapa’ na kanai-mu muna’i’isao håo, utut ya un yuti’. Sa’ måolekña na u fåtta un påtti gi tataotåo-mu ki un mayoggua kabålis giya sasalåguan.
“Masångan lokkui’ na, ‘Håyi ha’ i dumibutsia i asaguå-ña debidi u tugi’ påpa’ put i dibutsiu ya u nå’i i asaguå-ña palåo’an.’ Låo Guåhu på’gu Hu sangångani hamyu na: yanggin ti mama’bababa i palåo’an ya dinibutsia gui’ ni asaguå-ña ya siakåsu na umassagua ta’lu i palåo’an, pues i lahi umisåo sa’ ha na’adutteriu i asaguå-ña; ya kuntodu i lahi ni inasagua gui’ umadutteriu lokkui’.
“En hinguk ta’lu na manmasangåni i taotåo siha gi manmaloffan na tiempu na, ‘Cha’-miyu chumocho’gui fåtsu na hinila låo che’gui håfa en prumeti na cho’chu’ para i Saina.’ Låo Guåhu på’gu Hu sangåni hamyu: cha’-miyu fanmanhuhula yanggin manmama’prumesa hamyu; cha’-miyu i’isa i langit yanggin manmanhula hamyu, sa’ tronun Yu’us ennåo; osino i tanu’, sa’ ennåo i eddas ni Ha na’diskånsa i adeng-ña; osino iya Hirusalen, sa’ iyun i manakkilu’ na Rai ennåo na siudå. Cha’-miyu ni sikera i’isa i ilun-miyu yanggin manmanhula hamyu, sa’ manai nina’siña hamyu para en na’åttilung pat en na’chungi’ un gaputulu. Inlugåt, sångan ‘Hunggan’ yanggin ‘Hunggan’ yan ‘Åhi” yanggin ‘Åhi”–ottru siha ni para en sangan måfattu ginin Atyu i Tailayi.”
I Ibangheliun i Saina.
