A
FINENI’NA NA TINAITAI Acts 6, 1-7
Un tinaitai ginin i Bidan i Manapostulis
Atyu na tiempu, anai sigi esta di ma’åomenta i mineggai disipulu siha, atyu i tumungu’ mamfinu’ ‘Greek’ manugung na manmadisatetendi i mambi’udan-ñiha gi manmapåttin i nengkannu’ yanggin ma’akumpåra yan i bi’udan atyu siha i tumungu’ finu’ Hibrehu. Mana’fanetnun ni Dossi i kuminidåt i mandisipulu siha ya ilik-ñiha, “Ti dinanchi na hami para in disatendi i finu’ Yu’us put para in fanmañetbi gi lamasa. Ispiha fan gi entri hamyu, hafañe’lus, sietti na tåotåo ni manunas yan mansinantusan, ya hami bai in apunta siha para esti na cho’chu’. Esti ha’ nai siña ham in gasta tiempun-måmi gi tinayuyut yan gi ministrun i finu’ Yu’us.”
Interu i kuminidå umaksepta esti i mapruponi. Put esti na ma’atyik si Esteban, un tåotåo ni bula hinenggi yan bula ni Espiritu Såntu; si Felipe, si Prochorus, si Nicanor, si Timon, si Parmenas yan si Nicolas ginin Antioch, ni ginin makumbetti guatu gi Hudihos na rilihon. Manmaprisenta esti siha na tåotåo gi Manapostulis ya manmanåyuyut siha fine’na ya dispues mapo’lu kannai-ñiha gi hilu’-ñiha.
Sigi ha’ di mumåmta’ i finu’ Yu’us, yan gi etmismu tiempu ma’åomenta i kantidån disipulu siha giya Hirusalen. Meggai na mamåli’ entri atyu siha umaksepta i hinenggi.
I finu’ i Saina.
INEPPIN I SÅTMU Ps 33, 1-2. 4-5. 18-19
R. (22) ASAINA, NA’SÅGA GIYA HAMI I MINA’ASE’-MU,
MIENTRAS IN PEPE’LU I INANGOKUN-MÅMI GIYA HÅGU.
Fanmaguf gi Saina, hamyu ni manunas;
umatya i tinina ginin i manunas.
Nå’i gråsia i Saina gi håtpa;
kånta i matunå-ña siha gi dandan ni dies kuetdås-ña.
INEPPI…
Sa’ tunas i finu’ i Saina;
ya todu i che’cho’-ña siha angokkuyun.
I Saina Ha guaiya i hustisia yan tininas
yan Ha na’bula i tanu’ ni minaolek-ña.
INEPPI…
Atan ha’ sa’ gaigi i matan i Saina gi rumibirerensia Gui’,
hilu’ atyu siha i manmanangokku nu i yine’ase’-ña,
Para u nina’fanlibri siha ginin i finatai,
ya u famprinutehi siha achukka’ tiempun ha’ilas.
INEPPI…
SIGUNDU NA TINAITAI 1 Pt 2, 4-9
Un tinaitai ginin i fine’na na Kattan San Pedro
Mangginifli’e’-hu:
Fanmamaila’ mågi gi Saina, i lala’la’ na åtchu’ ni marichåsa ni taotåo siha kumu tai bali låo inatyik as Yu’us kumu mibáli. Fanmåttu kumu manlåla’la’ na åtchu’, ya pe’lu hamyu ya en fanma’usa para u makåhat i espirituåt na templu, anai siña hamyu manmañetbi kumu mañåntus na mamåli’ para en ufresi espirituåt yan akseptåpbli na sakrifisiu siha para si Yu’us ginin as Jesukristo.
Estigui’ ilek-ña i eskritura,
“Hu atyik un guaguan na åtchu’,
ni Hu plålanta kumu i imputtånti na åtchu’ giya Sion;
ya maseha håyi ni manhonggi nu Guiya
ti u nina’disganåo.”
Dångkulu bali-ña esti na åtchu’ para hamyu ni manmanhonggi; låo para atyu siha i ti manmanhonggi:
“I atchu’ ni marichåsa kumu tai bali ni atyu siha i manmanhåhatsa
humuyung esti i mås imputtånti entri todu.”
Ya ottru eskritura ilek-ña,
“Guiya esti na åtchu’ anai para u fanmatompu’ i taotåo,
i atchu’ ni para u fantinemba.”
Manmatompu’ siha sa’ ti manmanhonggi gi finihu’; ennåo minalagu’ Yu’us para siha.
Låo hamyu i manma’atyik na råsa, i mamåli’ i Rai, i sinantusan na nasion, iyun Yu’us mismu, manma’atyik para en pruklåma i mambunitu na che’chu’ Yu’us, ni umågang hamyu huyung ginin i halum homhum para hålum gi gatbu na inina.
I finu’ i Saina.
IBANGHELIU Jn 14, 1-12
ÅLELUIA Jn 14, 6
R. Åleluia. ILEK-ÑA I SAINA, GUÅHU I CHALAN, I MINAGÅHIT,
YAN I LINA’LA’;
TÅYA’ U FÅTTU GI TATA, SIN U ISGIN IYA GUÅHU.
R. Åleluia.
+ Un tinaitai ginin i såntu Ibangheliu sigun gi tinigi’ San Juan
Mansinangåni siha as Jesus: “Cha’-miyu faninistototba kurason-miyu.
Fanmanhonggi gi as Yu’us yan fanmanhonggi giya Guåhu.
Meggai lugåt para sumåga gi gima’ Tatå-hu;
yanggin åhi’, pues taimanu para bai Hu sangåni hamyu
na para bai Hu hånåo para bai pripåra i sagan-miyu?
Hunggan magåhit, para bai Hu pripåra un lugåt para hamyu,
ya dispues para bai bira Yu’ tåtti ya bai Hu konni’ hamyu,
kosa ki amånu nai gaigi Yu’ hamyu lokkui’ en fanggaigi.
” En tingu’ ha’ i chalan para guatu gi lugåt ni para bai Hu hanågui.”
Ilek-ña si Tomás, “Asaina, ti en tingu’ para månu Håo guatu; taimanu en tingu’ i chalan?”
Ineppi gui’ as Jesus:
“Guåhu i chalan, yan i minagåhit, yan i lina’la’;
tåya’ måfattu gi Tata solu umisgin iya Guåhu.
Yanggin magåhit na en tingu’ Yu’ pues en tingu’ lokkui’ si Tatå-hu.
Ya desdi på’gu para mo’na esta en tingu’ Gui’; ya esta en li’i’ Gui’.”
Ilek-ña si Felipe nu Guiya,
“Asaina, fanu’i ham nu i Tata; ya båsta ha’ ham ni ennåo.”
Manoppi si Jesus:
“Felipe, esta åpmam desdi ki manhita; ya ti un tutungu’ ha’ Yu’?
“Maseha håyi ni esta ha li’i’ Yu’ esta ha li’i’ i Tata.
Ya håfa na para un åluk, ‘Na’li’i’ ham nu i Tata’?
Kåo ti un honggi, na gaigi Yu’ gi Tata yan i Tata gaigi giya Guåhu?
Ti ginin Guahu i palåbra siha ni Hu kuentusi hamyu;
sino ki ginin i Tata ni sumåsaga giya Guåhu, Guiya mismu chumocho’gui
i che’cho’-ña siha. Henggi Yu’ na gaigi Yu’ gi Tata
ya gaigi i Tata giya Guåhu, pat sino, fanmanhonggi put i Hu chocho’gui
na cho’chu’.
Åmen, åmen, bai Hu sangåni hamyu ni minagåhit:
i taotåo ni manhonggi giya Guåhu
ha chocho’gui i che’chu’ ni Hu chocho’gui,
yan mås mandångkulu na cho’chu’ ki esti.
Sa’ håfa? Sa’ para bai Hu hånåo para as Tåta.”
I Ibangheliun i Saina.
