FINENE’NA NA TINAITAI Acts 14, 21-27
Un tinaitai ginin i Bidan i ManApostulis
Dispues di munhåyan mapruklåma i Maolik na Nutisia giya Derbe ya manhålum meggai na mandisipulu, marastreha i pinekkat-ñiha tåtti fine’na para Lystra yan Iconium, ya dispues nai manhånåo para Antioch. Manma’asigura i disipulun-ñiha ginin i finu’-ñiha yan maninabiba siha na u mana’famfitmi gi hinenggin-ñiha. Ma’u’usa esti na finihu’ siha, “Debidi u ta padesi meggai na chinatsaga yanggin para ta fanhålum gi Rainun Yu’us.” Manma’apunta manåmku’ siha para kada Gima’Yu’us, ya gi tinayuyut yan ayunat-ñiha si Pablo yan Barnabas ma’intrega esti siha na tåotåo as Yu’us ni gaigi gi hinenggin-ñiha.
Dispues umisgin Pisidia si Pablo yan Barnabas ya måttu Pamphylia. Anai munhåyan sumetmun giya Perga, humånåo påpa’ para Attalia. Desdi ennåo ma’udai i dos gi boti para tåtti Antioch, esti na lugåt anai ma’intrega siha gi inadahin i grasian Yu’us para u macho’gui esti na cho’chu’ ni esta munhåyan.
Anai måttu i dos, ma’ågang todu i membrun i Gima’Yu’us ya masangåni siha put todu i inayudan Yu’us ni para u ma cho’gui, yan håfa taimanu baba-ña si Yu’us ni pettan i hinenggi para atyu siha i MamPagånu.
I Finu’ i Saina.
INEPPIN I SÅTMU Ps 145, 8-9. 10-11. 12-13
R. BAI HU TUNA I NA’ÅN-MU TODU I TIEMPU,
SA’ HÅGU RAI-HU YAN YU’OS-SU.
I Saina kariñosu yan yo’asi’,
ñating lalålu’ yan misin ginefli’i’.
Måolik i Saina para todu
Ha ma’asisi’i todu i fina’tinås-ña.
INEPPI…..
Todu i fina’tinås-mu un manå’i gråsia, O Asaina
ya un ma bendisi ni mamfiet nu Hågu.
Sedi siha ya u masånganñaihun i glorian i rainom-mu
ya u masångan i minetgot-mu.
INEPPI…..
Sedi na siha u mana’tungu’ i taotåo siha ni minetgot-mu
yan i gloriosu yan ma’lak na tinago’-mu.
I rainom-mu un rainu para todu i tiempu,
i mina’gås-mu para u såsaga para todu i hinerasion siha.
INEPPI…..
SIGUNDU NA TINAITAI Rb 21, 1-5a
Un tinaitai ginin i Lepblun Ribilasion
Dispues hu li’i’ un nuebu na långit yan un nuebu na tånu’. Esta manaigui i fine’na na långit yan i fine’na na tånu’, yan malingu i tasi. Ya hu li’i’ i Santus na Siudå, i nuebu na Hirusalen, tototunuk ginin i langit ginin as Yu’us, priparåo yan listu, kalang i nobia ni mamuda para u ali’i’ yan i asaguå-ña. Hu hunguk un a’gang na bos kumuekuentus ginin i tronu: “På’gu nai gaigi i gimå’-ña si Yu’us gi entalu’ i taotåo siha! Siempri mañiha manlå’la’ yan siha para i taotåo-ña. Siempri mañiha yan si Yu’us mismu, ya Guiya para Yu’us-ñiha. Siempri Ha såosåo todu i lagu’ ginin i matan-ñiha. Siempri tåya’ esta finatai, tåya’ mås pininiti osino kásao patsino puti. Esta todu i antigu na kosas manmå’pus.” Dispues atyu i matåta’chung gi tronu ilek-ña, “Ya på’gu bai Hu na’fannuebu todu i kosas siha!”
I finu’ i Saina.
IBANGHELIU Jn 13, 31-33a. 34-35
ÅLELUIA Jn 13, 34
R. Åleluia. HU NÅ’I HAMYU NUEBU NA TINAGU’:
FANAGUFLI’I’ UNU YAN OTTRU TAIGUIHI I
GINIFLI’E’-HU NU HAMYU. R. Åleluia.
+ Un tinaitai ginin i såntu Ibangheliu sigun i tinigi’ San Juan
Gigun må’pus si Judas, ilek-ña si Jesus:
“På’gu nai para u ma’onra i Lahin i Taotåo yan u ma’onra si Yu’us giya Guiya.
Yanggin esta maglorifika si Yu’us giya Guiya.
Pues siempri u inenra Gui’ as Yu’us giya Guiya,
ya siempri inenra Gui’ ti åpmam.
Famagu’on-hu, esta ti u åpmam manádingu hit.
Bai Hu nå’i hamyu un nuebu na tinagu’: Fanagufli’i’ unu yan ottru.
Taimanu ha’ i ginifli’e’-hu nu hamyu, taiguennåo ha’ para ginefli’i’-miyu unu yan ottru.
Taiguini para tungu’-ñiha na mandisipulu-hu hamyu:
i ginefli’i’-miyu unu yan ottru.”
I Ibangheliun i Saina.
