FINE’NA NA TINAITAI Acts 9, 26-31
Un tinaitai ginin i Bidan i Manapostulis
Anai måttu tåtti giya Hirusalen si Saul ha chagi para u dañña’ yan i pumalu siha na disipulu guennåo; låo humuyung manma’å’ñåo nu guiya. Lusdimås, ti manmalagu’ ma honggi na disipulu gui’. Intonsis, umingkatgåo si Barnabas as Saul ya ha intrudusi gui’ gi manapostulis. Ha esplika taimanu si Saul na ha li’i’ i Saina gi hinanåo-ña, ya kumumbetsasion i dos, ya ti ma’å’ñåo kumuentus gi na’an Jesus giya Damascus. Sumåga si Saul yan siha, ya lumålåoya giya Hirusalen kumuekuentus sin mina’å’ñåo gi na’an Jesus. Ha kuentusi kuntodu atyu siha na ManHudihos i tumungu’ finu’ ‘Greek’ ya umatgumementu yan siha. Pues gi ineppin-ñiha ma chagi para u ma képunu’ gui’. Anai ma tungu’ esti ni mañe’lu, unus kuåntu giya siha ma konni’ gui’ påpa’ para ‘Caesarea’ ya mana’hånåo gui’ para Tarsus.
Durånti esti na tiempu gumuaha pås gi Gima’Yu’us giya Hudeha, Galileha yan Samåria. Sigi ha’ di ma’umenta ya lumalametgut gi mina’å’ñåo i Saina; ya gi etmismu tiempu lumalasessu i kunsuelun i Espiritu Såntu.
I finu’ i Saina.
INEPPIN I SÅTMU Ps 22, 26-27. 28. 30. 31-32
R. (26) BAI HU TUNA HÅO, ASAINA, GI INETNUN I TAOTÅO-MU.
Bai hu kumpli i prumeså-hu gi me’nan atyu siha i manma’åñao nu i Saina.
I mamopbli siha u fañotchu astaki manhåspuk;
Atyu siha i umispipiha i Saina u matuna Gui’:
“Puedi u mamaguf i kurason-miyu todu i tiempu!”
INEPPI…..
Todu i puntan tånu’
u ma’adora ya u mabira siha guatu gi Saina;
Todu i familian nasion siha
u fanmañaluda gi me’na-ña.
INEPPI…..
Todu i manmamaigu gi tanu’
u fanmañaluda gi me’nan Yu’us;
Todu i manhånåo påpa’ gi petbus
u fandimu manmanadora.
INEPPI…..
Ya para Guiya na u lå’la’ i anti-hu;
i disindensiåk-ku u sinetbi.
Po’lu ya u masångan nu i mamamaila’ na hinerasion put i Saina
ya u ma pruklåma gi taotåo siha ni ti manmafañåñagu
i satbasion ni Ha na’fåttu.
INEPPI…..
SIGUNDU NA TINAITAI 1 Jn 3, 18-24
Un tinaitai ginin i fine’na na kåttan San Juan
Famagu’on-hu, i ginefli’e’-ta ti debidi palåbra ha’ siha yan kuentus;
debidi u magåhit na guinaiya, ni a’annuk gi aksion.
Intonsis, taiguini para tungo’-ta na manggaigi hit gi minagåhit;
taiguini nai siempri guaha kumfihanså-ta gi me’nan Yu’us.
Yanggin i kunsensiå-ta ha kundena hit, ta tungu’ na takkilo’ña si
Yu’us ki i kunsensiå-ta ya Ha tungu’ todu. Put esti, hafañe’lus,
yanggin ti ha kundena hit i kunsensiå-ta, mungnga hit manma’å’ñåo
gi me’nan Yu’us. Ta risibi ginin Guiya maseha håfa ni ta gågåo, sa’
ta o’osgi i tinago’-ña yan ta chochu’gui i malago’-ña. I tinago’-ña era
para ta fanmanhonggi gi Lahi-ña as Jesukristo yan para ta fanagofli’i’
unu yan ottru, taiguihi i tinago’-ña i Kristo nu hita. Maseha håyi ni ha
o’osgi i tinagu’ Yu’us låla’la’ gui’ gi dinañña’ yan Yu’us yan si Yu’us
låla’la’ gi dinañña’ yan guiya. Ya put i Espiritu ni Ha nå’i hit si Yu’us
na ta tungu’ na si Yu’us låla’la’ gi dinañña’-ña yan hita.
I finu’ i Saina.
IBANGHELIU Jn 15, 1-8
ÅLELUIA
R. Åleluia. ILEK-ÑA I SAINA, FANLÅ’LA’ GIYA GUÅHU YAN SEDI
YU’ LUMÅ’LA’ GIYA HAMYU;
MASEHA HÅYI NI LUMÅ’LA’LA’ YAN GUÅHU U MEPPA’ TINEKCHÅ’-ÑA.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Ilek-ña si Jesus ni mandisipulu-ña:
“Guåhu i magåhit na trongku ni kumukunanaf, ya si Tatå-hu Guiya i hatdineru. Ha u’utut atyu siha na råmas giya Guåhu ni ti manonokcha’, yan Ha lålabun atyu siha na råmas i manmeppa’, kosaki siña gåsgas yan u mås meppa’. Esta mana’fanggåsgas hamyu ginin i nutisia ni Hu sangåni hamyu. Na’fanunu hamyu giya Guåhu, ya Guåhu bai Hu na’unu Yu’ yan hamyu. Solu mañåga hamyu giya Guåhu, nai siña hamyu manggái tinekcha’, parehu ha’ na ti siña manokcha’ i råmas solu chechettun gi trongku. Guåhu i tinanum ni kumukunanaf, ya hamyu i råmas. Maseha håyi ni sumåsaga giya Guåhu, ya Guåhu giya guiya, siempri meppa’ tinekchå’-ña, sa’ tåya’ nina’siñan-miyu sin Guåhu. Maseha håyi ni ti sumåsaga giya Guåhu u mayuti’ huyung, kalang i råmas ni anglu’; ennåo siha na råmas u fanmarikohi ya u fanmadåggåo guatu gi guafi, ya u fangkimason. Yanggin mañåga hamyu giya Guåhu, ya i fino’-hu sumåsaga giya hamyu, ennåo nai siña siempri manmanggågåo hamyu maseha håfa i malagu’-miyu, ya siempri manmanå’i hamyu. Estegui’ nai uma’annuk i matunan i Tatå-hu; yanggin manmeppa’ hamyu; ya ginin esti nai siempri mandisipulu-hu hamyu.”
I Ibangheliun i Saina.
