A
FINENE’NA NA TINAITAI Ez 37, 12-14
Un tinaitai ginin i Lepblun i Prufeta as Ezekiel
Ilek-ña si Yu’us i Saina: O tåotåo-hu, bai Hu baba i naftan-miyu siha ya Hu na’fangahulu’ hamyu, yan bai Hu konni’ hamyu tåtti gi tanu’ Israhet. Dispues hamyu siempri en tingu’ na Guåhu i Saina, yanggin Hu baba i naftan-miyu ya Hu na’fangahulu’ hamyu, O tåotåo-hu! Bai Hu pega i Espiritu-hu giya hamyu kosa ki en fanlå’la’, yan bai Hu na’fanareklåo hamyu gi tanu’-miyu; pues siempri en tingu’ na Guåhu i Saina. Esta Hu prumeti esti, ya siempri bai Hu cho’gui, ilek-ña i Saina.
I finu’ i Saina.
INEPPIN I SÅTMU Ps 130, 1-2. 3-4. 5-6. 7-8
R. (7) SA’ GAIGI GI SAINA I YINE’ASI’
YAN I KABÅLIS NA SATBASION
Ginin i fondu ni hokkuk siningon-hu hu ågang Håo, Asaina;
Asaina, ékkunguk i inagång-hu!
Puedi i talanga-mu u ékkunguk
i ginagåo-hu mina’åsi’.
INEPPI…..
Yanggin Un apupunta i isao-måmi, Asaina,
håyi siña ti u makundena?
Låo giya Hågu nai gaigi i inasi’i’
ya put ennåo na ma’o’onra Håo.
INEPPI…..
Mahålang yu’ hu nanangga i Saina,
i anti-hu ha nanangga i fino’-ña.
Mås ki i guåtdia siha ni numanangga i chatanmak,
po’lu i taotåo Israhet ya u ma’ispiha i Saina.
INEPPI…..
Sa’ gaigi gi Saina i mina’åsi’,
giya Guiya nai gaigi i kabålis na satbasion,
ya si Yu’us u na’libri iya Israhet
ginin todu i isao-ñiha.
INEPPI…..
SIGUNDU NA TINAITAI Rom 8, 8-11
Un tinaitai ginin i Kattan San Pablo para i taotåo Roma
Hafañe’lus:
Atyu siha i umo’osgi i naturåt-ñiha kumu tåotåo ti siña mana’maguf si Yu’us. Låo ti manlåla’la’ hamyu sigun gi minalagu’ i naturåt-miyu kumu tåotåo; inlugåt di esti, manlåla’la’ hamyu sigun gi minalagu’ i Espiritu–yanggin magåhit na låla’la’ i Espiritun Yu’us giya hamyu. Ti iyun i Kristo hamyu yanggin taigui i Espiritun i Kristo giya hamyu. Låo yanggin låla’la’ i Kristo giya hamyu, pues i Espiritun lina’la’ para hamyu sa’ put i esta mana’fanunas hamyu gi me’nan Yu’us, achukka’ para u fanmåtai i tataotåo-miyu put i isao. Yanggin låla’la’ giya hamyu i Espiritun Yu’us, ni muna’lå’la’ ta’lu si Jesus ginin i finatai, pues Guiya ni muna’lå’la’ ta’lu i Kristo ginin i finatai u nå’i lina’la’ i mámatai na tataotåo-miyu ginin i gumaigin i Espiritu-ña giya hamyu.
I finu’ i Saina.
IBANGHELIU Jn 11, 1-45
(Todus) U matuna Håo, Asaina Jesukristo, Rai i taihinekkuk na gloria!
(Tetcha) Ilek-ña i Saina, Guåhu i resureksion yan i lina’la’;
håyi manhonggi nu Guåhu ti u måtai para todu i tiempu.
+ Un tinaitai ginin i såntu Ibangheliu sigun gi tinigi’ San Juan
Iståba un malångu na tåotåo ni na’ån-ña si Lasaru, tåotåo Bitaniha,
i sengsung anai sumåsaga si Maria yan i che’lu-ña as Martha.
(Guiya esti na Maria i chumo’mi påopåo i adding i Saina ya ha såosåo ni gaputilu-ña;
i che’lu-ña as Låsaru esti i malångu.)
I dos palåo’an ni chume’lu numá’hanåo nutisia para si Jesus,
“Asaina, malångu i Un gofli’i’ na amigu-mu.”
Anai Ha hunguk esti si Jesus ilek-ña,
“Ti uttimon-ña para u måtai si Låsaru ginin esti na minalångu;
låo masusedi esti put i para u matuna si Yu’us,
ya ginin esti nai siempri Ha risibi i matunå-ña i Lahin Yu’us.”
Si Jesus Ha guaiya si Martha yan si Maria yan si Lasaru.
Anai Ha risibi i nutisia na malångu si Låsaru, sumåga ha’ guihi
anai iståtaba Gui’ dos dihas ta’lu.
Ya dispues ilek-ña nu i mandisipulu-ña, “Nihi ta fanhånåo tåtti Hudeha.
Manmanoppi i mandisipulu, “Ma’estru, esti ha’ i halacha nai kana’
ha’ ma’åtchu’ Håo nu i ManHudihos; ya para Un hånåo tåtti guihi?”
Ilek-ña si Jesus,
“Guaha dossi oras kada ha’åni, pat åhi’?
Pues yanggin mamomokkat i taotåo gi mina’lak i ha’åni ti u matompu’,
sa’ ha lili’i’ i kandit esti na tånu’.
Låo yanggin i puengi nai mamokkat siempri matompu’, sa’ tåya’ kandet-ña.”
Ha sångan si Jesus esti, ya dispues Ha umentåyi,
“Malingu maigo’-ña i amigu-ta as Låsaru, låo bai Hu hånåo ya bai Hu yå’hu gui’.”
Manmanoppi i mandisipulu, “Asaina, yanggin mamaigu’ gui’ pues ti u måtai.”
Låo kumeke’ilek-ña si Jesus na måtai si Lasaru; låo siha hinassun-ñiha na mamaigu’ ha’ gui’.
Pues mangklinaruyi siha as Jesus,
“Måtai esta si Låsaru; låo put hamyu, maguf Yu’ sa’ taigui Yu’ guihi,
kosa ki siempri en fanmanhonggi. Nihi ta fanmalak guatu giya guiya.”
Si Tomás (ni ma’å’agang Dinga’) ilek-ña ni mangga’chong-ña,
“Nihi ta fanhita todu yan i Ma’estru, ya u ta fanachámatai yan Guiya!”
Anai måttu si Jesus, Ha sodda’ na esta mahåfut si Lasaru kuåttru dihas.
Menus di dos miyas desdi Bitaniha asta Hirusalen, ya meggai
na ManHudihos manmåttu para u makunsuela si Martha yan si Maria put i
finatai i che’lun-ñiha.
Anai ha hunguk si Martha na mamamaila’ si Jesus, humånåo huyung para u taggam Gui’;
låo sumåga ha’ gi gima’ si Maria.
Ilek-ña si Martha as Jesus, “Yanggin gaigi Håo mohun guini, Asaina, ti u måtai
i che’lu-hu! Låo hu tungu’ na achukka’ på’gu,
si Yu’us siempri nina’i Håo maseha håfa ni Un gågåo Gui’.”
Sinangåni gui’ as Jesus, “I che’lu-mu u mana’ta’lu tåtti i lina’lå’-ña.”
Manoppi si Martha, “Hu tungu’, na siempri u mana’lå’la’ gi uttimu na ha’åni.”
Sinangåni gui’ as Jesus:
“Guåhu i resureksion yan i lina’la’. Maseha håyi ni manhonggi nu Guåhu,
achukka’ måtai gui’, u lå’la’; yan maseha håyi ni låla’la’ yan manhohonggi giya Guåhu
ti u måtai ni ngai’an.
Kåo un honggi esti?”
Manoppi si Martha, “Hunggan, Asaina! Manhonggi yu’ na Hågu i Misihas,
i Lahin Yu’us, ni para u fåttu guini gi tanu’.”
Dispues di ha sångan esti si Martha
humånåo tåtti ya sikretu ha ågang i che’lu-ña as Maria.
Ilek-ña nu guiya, “Gaigi guini i Ma’estru, ya mamamaisen nu hågu.”
Anai ha hunguk esti si Maria kahulu’ ya humånåo huyung insigidas
para u asuda’ yan si Jesus. (Ti måfattu trabiha si Jesus gi sengsung,
låo iståba ha’ guihi na lugåt anai umasuda’ yan si Martha.)
I ManHudihos ni mañisiha yan si Maria gi gima’ ni makunsuesuela gui’
madalalaki anai mali’i’ gui’ na kahulu’ ya lumagusi’ huyung.
Hinassun-ñiha na para u falak i naftan ya para u kasåo guihi.
Anai måttu si Maria guihi na lugåt anai iståba si Jesus ya ha li’i’ Gui’, poddung
papa’ gi adding Jesus. Ilek-ña, “Asaina, yanggin gaigi Håo guini mohun
ti u måtai i che’lu-hu!”
Anai lini’i’ gui’ as Jesus na kumakasåo, yan kun todu i ManHudihos ni mañisiha
mangakasåo lokkui’; nina’piniti kurason-ña, ya mampus nina’tristi Gui’.
Mamfinaisin siha as Jesus, “Månu nai en hafut gui’?”
Manmanoppi siha, “Maila’ ya Un li’i’, Asaina.”
Ha tutuhun kumasåo si Jesus.
Intonsis ilik-ñiha i ManHudihos, “Atan ha’ sa’ Ha sen gofli’i’ gui’!”
Låo unus kuåntus giya siha ilik-ñiha, “Na ada ti Ha baba i matan i batchit na tåotåo?
Kåo ti siña mohun Ha na’påra si Lasaru ya ti u måtai?”
Nina’gof tristi ta’lu si Jesus, pues humånåo para i naftan.
Era un liyang esti ya mapo’lu un åtchu’ gi intråda. Manotdin si Jesus, “Na’suha i atchu’!”
I che’lun i matai as Martha manoppi, “Siempri mutung, Asaina. Esta kuåttru dihas
desdi ki mahåfut!”
Ilek-ña si Jesus nu guiya, “Na ada ti Hu sangåni håo na siempri un li’i’ i glorian Yu’us
yanggin manhonggi håo?” Mana’suha i atchu’.
Tumalakhilu’ si Jesus ya ilek-ña:
“Tåta, Hu nå’i Håo gråsia, sa’ Un e’ékunguk Yu’.
Hu tungu’ na todu i tiempu Un e’ékunguk Yu’,
låo Hu såsangan esti sa’ put i taotåo siha guini,
kosa ki siña mahonggi na Hågu Yu’ numa’hånåo.”
Dispues di Ha sångan esti umågang a’gang, “Lasaru, maila’ huyung!”
Humuyung i matai, mabalulutan i kannai-ña yan i adeng-ña ni magågun måtai,
yan un pidåsun magågu gi matå-ña.
Mansinangåni siha as Jesus, “Pila’, ya en setta gui’.”
Put esti na meggai gi ManHudihos ni manmåttu para u mabisita si Maria,
mali’i’ i bidå-ña si Jesus ya manmanhonggi giya Guiya.
I Ibangheliun i Saina.
