FINENE’NA NA TINAITAI Is 43, 16-21
Un tinaitai ginin i Lepblun i Prufeta as Isaias
Taiguini ilek-ña i Saina,
ni bumaba un chålan gi halum tåsi
yan un kåyi gi metgut na hånum,
ni gumigiha huyung i kalesa siha yan i kabayeru siha,
un metgut na tropan sindålu,
asta ki manoppup parehu, ya nungka nai u fanohgi ta’lu,
u fanmaguaifi ya u fanmapunu’ kalang metcha.
Cha’-miyu hahassu i manmasusedi gi manmaloffan siha na tiempu,
cha’-miyu kumunsidedera atyu siha na kosas i åpmam esta
desdi ki masusedi;
atan ha’, sa’ mannuebu siha fina’tinånas-su!
På’gu nai manmasusesedi, ada ti en lili’i’?
Mama’chålan Yu’ gi disiettu,
mama’sadduk Yu’ gi anglu’ na tånu’.
Ma’o’onra Yu’ ni manmachålik siha na gå’ga’,
ga’lågun halumtånu’ yan ‘ostrich’ siha,
sa’ Hu po’luyi hånum i disiettu
yan sadduk gi anglu’ na tånu’
para u fanggimin i maninatyek-ku na tåotåo siha,
Un råsan tåotåo ni Hu fotma para iyok-ku,
kosa ki siña ma’anunsia i matunå-hu.
I finu’ i Saina.
INEPPIN I SÅTMU Ps 126, 1-2. 2-3. 4-5. 6
R. MANDÅNGKULU SIHA FINA’TINÅS-ÑA I SAINA PARA HITA:
YA MAMBULA HIT MINAGUF.
Anai Ha konni’ tåtti i Saina atyu siha i manmapreresu giya Sion,
kalang hit atyu siha na tåotåo i manmangguiguifi.
Atyu nai bula chålik gi pachot-ta;
yan mangånta minaguf i hila’-ta.
INEPPI…..
Pues masångan gi entri i nasion siha,
“Mandångkulu siha fina’tinas-ña i Saina para siha.”
Mandångkulu siha fina’tinås-ña i Saina para hita;
Mansen maguf hit magåhit!
INEPPI…..
Na’ta’lu tåtti i suettin-måmi, Asaina,
kalang i anglu’ na fondun sadduk giya Negeb.
Atyu siha i manmanånanum gi trinisti
u fanessalåo minaguf yanggin manmango’ku’.
INEPPI…..
Maskiseha mangåkati mientras manhåhanåo mo’na,
makikilili i kestat simiya,
U fana’lu tåtti mane’essalåo minaguf,
ma’u’uma i manohun kusetcha.
INEPPI…..
SIGUNDU NA TINAITAI Phil 3, 8-14
Un tinaitai ginin i Kattan San Pablo para i taotåo Philippi
Hafañe’lus:
Ya åhi’ ti atyu ha’ siha na kosas; sinoki hu rialisa lokkui’ na enteru manmalingu yanggin ma’akumpåra yan atyu i mås guaha balin-ñiha, era i tiningu’ put i Kristo Jesus i Saina-hu. Put Guiya na hu yuti’ todu atyu siha; ya på’gu hu kunsidedera na kalang basula atyu siha, kosa ki siña måttu i Kristo giya guåhu ya bai hu dañña’ kabålis yan Guiya. Esta tåya’ på’gu tininas ni måfattu ginin guahu ha’, atyu na klåsi ni måfattu put i hu o’ósgi i Lai. Gaigi giya guåhu på’gu atyu na tininas ni manåna’i i taotåo ginin i hininggen-ña gi Kristo, atyu na tininas ni måfattu ginin as Yu’us sigún gi hinenggi. Hokkuk ha’ malago’-hu i para bai hu tungu’ i Kristo yan para bai hu ekspirensia i fuetsan i luma’lå’-ña ta’lu, yan para bai hu såonåo gi pinadisi-ña yan para bai hu parehu yan Guiya gi finatai-ña, ya hu angongokku na bai hu mana’lå’la’ ta’lu ginin i finatai.
Åhi’, ti ilelek-ku na esta hu kumpli osino esta yu’ sen måolik. Sigi ha’ di hu cho’gui kuåntu i siña para bai hu gånna atyu na premiu i esta ha ganåyi yu’ guatu giya Guiya i Kristo Jesus. Gi magåhit, mañe’lu-hu, ti siguru yu’ kåo esta hu gånna; låo estigui’ una kosa i para bai hu maleffa ni atyu i manmaloffan ya bai hu cho’gui kuåntu i siña para bai hu hagu’ i mamamaila’. Intonsis kumarerera yu’ para i chi-hu kosa ki siña hu gånna i premiu, atyu i lina’la’ gi sanhilu’ ni ha ågang yu’ si Yu’us ginin i Kristo Jesus.
I finu’ i Saina.
IBANGHELIU Jn 8, 1-11
R. (Todus) U matuna Håo, Asaina Jesukristo, Rai i taihinekkuk na gloria!
V. (Tetcha) Bira håo mågi giya Guåhu yan todu i kurason-mu
sa’ kariñosu yan yo’asi’ Yu’.
+ Un tinaitai ginin i såntu Ibangheliu sigun i tinigi’ San Juan
Humånåo si Jesus para i Eksu’ Ulibas. Anai manana umannuk ta’lu gi uriyan i templu: ya anai sigi ha’ manmåttu i taotåo guatu giya Guiya, matå’chung påpa’ ya Ha tutuhun fuma’nå’gui siha. I ManEskribas yan MamFarisehu makonni’ hålum un palåo’an ni magacha’ umadutteteriu. Mana’tohgi gui’ guennåo gi me’nan todu. Ilik-ñiha as Jesus, “Ma’estru, esti na palåo’an magacha’ umadutteteriu. Gaigi gi lai na manotdin si Moises na esti na klåsin famalåo’an u fanma’åtchu’. Håfa siña Un sångan put esti na kåosa?” (Maprisenta esti na kuestion para laimi, kosa ki u guaha para u masokni Gui’). Dumiluk ha’ påpa’ si Jesus ya Ha tutuhun månggi’ gi edda’ ni kalulot-ña. Anai ma’insisti put i finaisin-ñiha, tumachu hulu’ ya ilek-ña, “Sotta ya atyu i tai isao gi entalu’-miyu fine’na u dinaggao gui’ ni atchu’.” Dumiluk ta’lu påpa’ ya månggi’ gi edda’. Pues i maniståtaba guennåo adumididi’ maritira siha, i manåmku’ fine’na. Pues tåya’ sopbla guennåo sino ki Guiya ha’ yan i palåo’an, ni tumotohgi ha’ guennåo gi me’nå-ña. Tumachu ta’lu si Jesus ya ilek-ña nu guiya. “Palåo’an, manhanåómanu siha? Tåya’ kumundena håo?” Manoppi gui’, “Tåya’, Siñot.” Ilek-ña si Jesus, “Ni Guåhu ti bai Hu kundena håo. Hånåo. Låo desdi på’gu para mo’na, suhåyi esti na isao.”
I Ibangheliun i Saina.
