FINE’NA NA TINAITAI Jb 7, 1-4. 6-7
Un tinaitai ginin i Lepblun Job
Kumuentus si Job, ilelek-ña:
Na ada ti na’o’sun i lina’la’ i taotåo guini gi tanu’?
Na ada ti kalang hutnaleru ha’ i lina’lå’-ña?
Isklåbu atyu na tåotåo i tumåtanga i nihung,
hutnaleru atyu na tåotåo i numanangga i suetdon-ña.
Intonsis esta ma’apunta para guåhu mesis siha na pinadesi,
tåya’ para guåhu sino ki prublema ha’ gi puengi.
Yanggin hu sångan gi kattrek-ku, “Ngai’an nai para bai kahulu’?”
pues ennåo nai umanånakku’ i puengi;
ya sigi ha’ yu’ di hu bira gi kattrek-ku asta i chatanmak.
Chaddekña i lina’lå’-hu ki i haguha ni mama’titinas magågu;
måfattu i uttimonña sin inangokku.
Hahassu na i lina’lå’-hu kalang i manglu’;
ti bai fanli’i’ minaguf ta’lu.
I finu’ i Saina.
INEPPIN I SÅTMU Ps 147, 1-2. 3-4. 5-6
- (3) TINA I SAINA NI MUNA’HOHOMLU’ I PINITIN KURASON.
Måolik ta silebra i Yi’os-ta gi kanta;
bunitu para ta nå’i Gui’ dinanchi na tinina.
I Saina humåtsa di nuebu iya Hirusalen,
Ha na’fandanña’ ta’lu i manmachalapun na tåotåo Israhet.
INEPPI…..
Ha na’maguf i pinitin kurason
yan Ha be’i i hiridan-ñiha,
Ha tungu’ i mineggai istreyas siha,
ya Ha å’agang kada unu ni na’ån-ña.
INEPPI…..
Må’gas i Saina-ta yan metgut i fuetsån-ña,
tåya’ uttimonña i tinemtom-ña.
I Saina Ha susteteni i mamopbli,
låo i manailayi Ha dådaggåo påpa’ gi edda’.
INEPPI…..
SIGUNDU NA TINAITAI 1 Cor 9, 16-19, 22-23
Un tinaitai ginin i fine’na na Kattan San Pablo para i taotåo ‘Corinth’
Hafañe’lus:
Åhi’, tåya’ dirichok-ku para bai hu banidosu put i sumesetmun yu’ ni ibangheliu. Mina’ taiguini esti sa’ ma’otdin yu’ para bai hu setmun. Ya siempri ti måolik para guåhu yanggin ti sumetmun yu’! Yanggin hu cho’gui i che’cho’-hu gi minagof-fu ha’, pues siña hu nangga na bai hu ma’apåsi; låo hu cho’gui esti kumu ubligasion-hu, sa’ Ha ingkåtga yu’ si Yu’us ni esti na cho’chu’. Intonsis håfa para apås-su? Hokkuk ha’ apås-hu i pribilehiu para bai hu setmunñaihun i Maolik na Nutisia sin bai hu ma’apåsi, sin bai hu fangopbla ni dirichok-ku gi che’cho’-hu put i ibangheliu. Libri yu’ na tåotåo, tåya’ ni unu gái isklåbu yu’; låo hu po’lun maisa yu’ kumu isklåbun todu kosaki siña hu gånna kuåntu i siña na mineggai tåotåo. Gi entri atyu siha i manñaba’ gi hinenggi guåhu lokkui’ ñaba’ yu’ parehu yan siha, kosaki siña hu bensi siha. Intonsis, mama’todu klåsi yu’ para todu i taotåo siha, kosaki siña hu såtba unus kuåntu giya siha gi maseha taimanu na manera. Hu cho’gui todu esti siha put i ibangheliu, kosaki siña yu’ såonåo gi bendision ginin i ibangheliu.
I finu’ i Saina.
IBANGHELIU Mk 1, 29-39
ÅLELUIA (Mat 8, 17)
- Åleluia. I KRISTO KUMÅTGA I CHETNOT-TA
YAN HA NA’FANHOMLU’ HIT NI MANMALÅNGU.
- Åleluia
+ Un tinaitai ginin i såntu Ibangheliu sigun i tinigi’ San Marcos
Anai madingu i sinagoga, humålum si Jesus gi gima’ Simon yan Andres mañisiha yan si Santiago yan Juan. Iståba na umå’assun i sogrån-ña si Simon sa’ malångu, kalentura, ya ennåo fine’na macho’gui i para u masangåni Gui’ put guiya. Malak guatu giya guiya si Jesus ya Ha go’ti i kånnai-ña ya Ha na’kahulu’, ya sumuha i kalentura. Insigidas ha tutuhun sumetbi siha.
Despues di måchum i atdao, ya esta puepuengi, makonni’i Gui’ ni todu i manmalångu yan atyu siha i manhinatmi ni manganiti. Ti åpmam todu i taotåo i sengsung manetnun gi me’nan i gima’. Meggai atyu siha i Ha na’fanhomlu’, ni difirentis klåsin chetnut-ñiha, yan meggai lokkui’ na aniti Ha dulalak. Låo ti Ha petmiti na u fanguentus i aniti siha, sa’ matungu’ håyi Gui’.
Tåftaf gi sigenti ogga’an kumahulu’ si Jesus, ya humånåo para un sasahngi na lugåt gi disiettu; ya guennåo nai duru manåyuyut. Si Simon yan i manga’chong-ña manhånåo ma’ispipiha Gui’; ya anai ma sodda’ Gui’, ilik-ñiha nu Guiya, “Enteru i taotåo siha ma’ispipiha Håo.” Ilek-ña nu siha, “Nihi ta fanhånåo para i sengsung siha gi uriya kosaki siña Hu pruklåma i Maolik na Nutisia guennåo lokkui’. Ennagui’ para bai Hu cho’gui na måttu Yu’.” Intonsis humålum gi sinagogan-ñiha sumesetmun put i Maolik na Nutisia ya mandudulalak aniti gi todu siha giya Galileha.
I Ibangheliun i Saina.
