FINE’NA NA TINAITAI Is 58, 7-10
Un tinaitai ginin i Lepblun i Prufeta as Isaias
Esti ilek-ña i Saina:
Na’fanmañagi i manñålang ni aggun-miyu, na’fanlihing i mañatsaga yan i manai-gima’;
Na’fanminagågu i mangesnuda yanggin en li’i’ siha, ya cha’-miyu bibira i tattalu’-miyu kontra i mismu tåotåo-miyu.
Pues i kandit-miyu u fanina taiguihi i chatanmak ya i chetnut-miyu u gusi’ mågung.
I tininas-miyu u fofo’na gi me’nan-miyu, ya i glorian i Saina u guåtdia i tattin-miyu.
Dispues para en agang i Saina, ya Guiya en fanineppi, en fanmanggågåo ayudu, ya Guiya u åluk: Gaigi Yu’ guini!
Yanggin en na’fañuha gi entalu’-miyu i chinatsaga, i dakun na akusasion yan malisiosu na kuentus;
Yanggin en na’i åggun i manñålang, ya in na’fansatisfetchu i manmasåsa’pit;
Pues u kahulu’ para hamyu un kåndit gi hinemhum, ya i ha’ånin trinisti u fama’taiguihi
I talu’åni para hamyu.
I finu’ i Saina.
INEPPIN I SÅTMU Ps 112, 4-5. 6-7. 8-9
R. (4) I TINAS NA TÅOTÅO UN KÅNDIT GI HALUM HOMHUM
PARA I MANMÅOLIK.
Manma’lak siha gi halum homhum, un kåndit siha para i manunas; mangariñosu, manyo’asi’, yan manunas siha.
Siempri todu måolik para i manggeftåo yanggin manna’ayåo, ni makundudukta i bidan-ñiha kun hustisia.
INEPPI…
Ni nga’ian nai u fandimålas;
u fanmahahassu i manunas todu i tiempu.
Ti u fanma’å’ñåo ni baba na nutisia;
fitmi kurason-ñiha, ma’angokku i Saina.
INEPPI…
Trangkilu kurason-ñiha, sin mina’å’ñåo.
Manggeftåo manmannå’i para i mamopbli;
i guinahan-ñiha u dinira para todu i tiempu;
i diknidåt-ñiha u fanmahåtsa takkilu’ kun onru.
INEPPI…
SIGUNDU NA TINAITAI 1 Cor 2, 1-5
Un tinaitai ginin i fine’na na Kattan San Pablo para i taotåo Corinth
Mañe’lu-hu, anai måttu yu’ giya hamyu, put i para bai hu setmun put i sikretu na minagåhit Yu’us, ti hu usa i manmapput na palåbra siha yan i manåddung na tiningu’. Anai iståba yu’ na manhihita hu disidi na tåya’ ottru kosas para bai hu hassu fuera di si Jesukristo yan ispesiåtmenti put i finatai-ña gi hilu’ i kilu’us. Put ennåo na debit yu’ anai måttu yu’ giya hamyu yan manlålaolåo interu i tataotåo-hu put i mina’a’ñåo-hu, ya i fina’na’guek-ku yan i minsåhi ti manmasågan gi manmapput na palåbra siha yan manåddung na tiningu’, låo siña mangumbensi prueba ginin i fuetsan i Espiritun Yu’us. Intonsis, taigui i hinenggin-miyu gi hilu’ i tiningu’ tåotåo låo gaigi gi hilu’ i fuetsan Yu’us.
I finu’ i Saina.
IBANGHELIU Mt 5, 13-16
ÅLELUIA Jn 8, 12
R. ILEK-ÑA I SAINA, GUÅHU I KANDIT I TANU’.
HÅYI NI TUMATTITIYI YU’ U GAIGI GIYA SIHA I ININAN I LINA’LA’.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus ni mandisipulu-ña:
“Kalang hamyu asiga para todu i taotåo siha. Låo yanggin malingu sabot-ña i asiga, ti siña un na’ta’lu tåtti. Tumaibali; pues siempri madåggåoñaihun huyung ya u magatcha’ nu i taotåo siha.
Kalang hamyu kåndit para todu i tanu’. I siudå ni gaigi gi eksu’ ti siña manå’na’. Tåya’ sumosonggi i fallut ya para u po’lu gi papa’ tason; Inlugåt, siempri ha po’lu gi sagan fållut, anai siña ha chalapun i ininå-ña gi todu i halum guma’. Taiguini ha’ lokkui’ i kandit-miyu debidi u fañila’ gi me’nan tåotåo, kosaki siña mali’i’ i manmåolik siha na bidan-miyu ya ginin esti nai u matuna i Tatan-miyu ni gaigi gi langit.”
I Ibangheliun i Saina.
