FINENE’NA NA TINAITAI Rv 7, 2-4. 9-14
Un tinaitai ginin i Lepblun Rebelasion
Guåhu, si Juan, hu li’i’ kokokolu’ ottru ånghit ginin hahaya ha chuchuli’ i seyun i lala’la’
na Yu’us. Ha essalågui a’gang i kuåttru na manånghit ni mannina’i as Yu’us fuetsa para u mana’dåñu i tanu’ yan i tasi. Ilek-ña i anghit, “Cha’-mu na’dådañu i tanu’, i tasi, osino i trongku siha, asta ki ta måtka ni seyu i ha’in i sitbentin Yu’us siha.” Ya masangåni yu’ na sientu kuarentaikuåttru mit numirun-ñiha atyu i manmamåtka ha’in-ñiha ni seyun Yu’us.
Esti siha mangginin i dossi na rasan Israhet.
Dispues di esti manatan yu’, ya iståba guennao un dångkulu na linahyan–tåya’ siña
tumufung todu i taotåo siha! Mangginin todu i familia, råsa, nasion, yan lingguåhi ya
manotohgi gi sanme’nan i tronu yan i Kinilu, manminagågagu magågun å’paka’
manmanggogo’ti råmus gi kannai-ñiha. Manessalåo a’gang, “Måttu i satbasion ginin i
Yi’os-ta, ni matåta’chung gi tronu, yan ginin i Kinilu!” Todu i manånghit manohgi gi uriyan i tronu, i manåmku’, yan i kuåttru ni manlåla’la’ na nina’huyung. Dispues manoppup påpa’ gi me’nan i tronu ya ma’adora i Yi’us, ilik-ñiñiha, “Åmen! Tinina, gloria, tinemtum, agradesimentu, onru, pudet, yan minetgut iyun i Yi’os-ta para todu i tiempu! Åmen!” Unu gi manåmku’ mamaisin, “Håyi esti siha na tåotåo i manminagågagu å’paka’, ya mangginin manu siha?” Manoppi yu’, “Ti hu tungu’, siñot. Hågu tumungu’.” Ilek-ña nu guåhu, “Esti siha na tåotåo atyu i manhuyung såfu ginin i makkat na pinitsigi. Esta mafa’gåsi i magagun-ñiha ya mana’å’paka’ ni haga’ i Kinilu.”
I finu’ i Saina.
INEPPIN I SÅTMU Ps 24, 1-2 3-4 5-6
R. ASAINA, SIHA ESTI NA TÅOTÅO NI TUMÅTANGA PARA U MALI’I’ I MATÅ-MU.
Iyun i Saina i tanu’ yan i guinaha-ña,
i tanu’ yan todu i mañåsaga guennåo.
Sa’ Ha kåhat hulu’ gi halum tåsi,
yan Ha istapblesi gi halum sadduk.
INEPPI…..
Håyi siña kahulu’ gi sabånan i Saina?
Osino håyi siña tumohgi gi santus na lugåt-ña?
“Atyu i manai isao kannai-ñiha yan manggåsgas kurason-ñiha,
ni ti manmama’titinas mamfåtsu na prumesa.
INEPPI…..
Siempri marisibi bendision ginin i Saina,
un premiu ginin as Yu’us i nana’librin-ñiha.
Ennagui’ na rasan tåotåo ni gumofli’i’ i Saina,
ni umispipiha i matan i Yi’us Jacob.”
INEPPI…..
SIGUNDU NA TINAITAI 1 Jn 3, 1-3
Un tinaitai ginin i fine’na na Kattan San Juan
Hafañe’lus:
Atan ha’ kuåntu chiña guinaiyan-ña si Yu’us nu hita! Tatfoi i guinaiyan-ña nu hita asta manma’å’agang hit famagu’on-ña–put ennåo na hunggan magåhit, famagu’on-ña hit. Esti i rason na i tanu’ ti ha tungu’ håyi hit: sa’ ti ha tungu’ håyi si Yu’us. Hafañe’lus, mamfamagu’un Yu’us hit på’gu, låo trabiha ti klålaru håfa para ta fanhuyung. Låo ta tungu’ na yanggin umannuk i Kristo, siempri mamparehu hit yan Guiya, sa’ siempri ta li’i’ Gui’ kumu Guiya mismu. Kada tåotåo ni gaigi esti na disehu gi Kristo ha na’gågasgas gui’, taimanu ha’ na gåsgas i Kristo.
I finu’ i Saina.
IBANGHELIU Mt 5, 1-12a
ÅLELUIA (Mt 11, 28)
R. Åleluia. ILEK-ÑA I SAINA, FANMAMAILA’ GIYA GUÅHU, TODU HAMYU NI MANMACHO’CHU’ YAN MANGKATGÅDU, YA GUÅHU BAI HU NA’FANDISKÅNSA HAMYU.
R. Åleluia.
+ Un tinaitai ginin i såntu Ibangheliu sigun i tinigi’ San Mateo
Anai Ha li’i’ si Jesus i linahyan tåotåo, humånåo hulu’ gi eksu’ ya matå’chung påpa’. Pues i mandisipulu lokkui’ manetnun gi uriyå-ña, ya Ha tutuhun fuma’nå’gui siha:
“Manmaguf atyu siha i mamopbli hinalum-ñiha: u iyun-ñiha i Rainun i langit!
Manmaguf atyu siha i mampininiti: si Yu’us u fangkininsuela!
Manmaguf atyu siha i manhumitdi: siha u rinisibi i prinimetin Yu’us!
Manmaguf atyu siha i tumåtanga para u macho’gui mås takkilu’ i minalagu’ Yu’us: siempri nina’fanggof satisfetchu as Yu’us!
Manmaguf atyu siha i manyo’asi’ ni ottru tåotåo: si Yu’us u yo’asi’ nu siha!
Manmaguf atyu siha i manggåsgas kurason-ñiha: siha u mali’i’ si Yu’us!
Manmaguf atyu siha i muna’kekeguaha pås gi taotåo siha:
u faninagang as Yu’us famagu’on-ña!
Manmaguf atyu siha i manmamadedesi put i machocho’gui i minalagu’ Yu’us: u iyun-ñiha i Rainun i langit!
Manmaguf hamyu yanggin manma’insutta pat manmapitsigi, pat manmasångan todu klåsin dinagi kontra hamyu sa’ put i mandisipulu-hu hamyu.
Fanmaguf sa’ un dångkulun premiu numanangga hamyu gi langit.”
I Ibangheliun i Saina.
