FINENI’NA NA TINAITAI A
Un tinaitai ginin i Lepblun i Prufeta as Daniel Dn 7, 9-10, 13-14
Mientras si Daniel ha a’atan:
Manmahåtsa tronu siha ya i Amku’ humånåo para i tronu-ña. Ma’lak kalang niebi i magagu-ña, ya i gaputilu-ña acha’apaka’ yan magagun låna; Ma’lak kalang finañila’ guåfi i tronu-ña, ya i ruedå-ña mañiñila’ guåfi. Mimilalak napun guåfi ginin i ta’chong-ña; Mit yan mit sumesetbi gui’, katdumi yan katdumi umasisisti gui’. Matutuhun i kotti ya manmababa i lepblu siha.
Mientras sisigi mo’na i na’manman na lini’i’ gi puengi, hu li’i’ unu kalang Lahin i taotåo mamamaila’, gi hilu’ mapagåhis i langit; Anai måttu guatu gi Amku’ maprisenta Gui’ gi me’nå-ña, Ha risibi fuetsa, gloria, yan rainu; nasion yan tåotåo siha ni difirentis lingguåhi masetbi Gui’. I fuetsån-ña fuetsan taihinekkuk ni ti para u machuli’ ginin Guiya, i rainon-ña ti u madistrosa.
I finu’ i Saina.
INEPPIN I SÅTMU Ps 97, 1-2. 5-6. 9
R. I SAINA RAI GUI’, I MÅS TAKKILU’ GI HILU’ TODU I TANU’.
I Saina rai Gui’; sotta ya u maguf i tanu’;
sotta ya u fanmaguf i isla siha.
Mapagåhis yan hinemhum umaridundeha i Saina;
hustisia yan tininas haligin i tronu-ña.
INEPPI….
I sabåna siha manlagu’ kalang dangis gi me’nan i Saina,
gi me’nan i Sainan todu i tanu’.
I langit Ha pruklåma i hustisian Yu’us;
ya todu i taotåo siha mali’i’ i gloriå-ña.
INEPPI….
Hågu, Asaina, i Mås Takkilu’ gi hilu’ todu i tanu’,
i Mås Takkilu’ gi entri i yi’us siha.
INEPPI….
SIGUNDU NA TINAITAI 2Pt 1, 16-19
Un tinaitai ginin i sigundu na Kattan San Pedro
Mangginefli’e’-hu:
Ti in dipendi ham ni fina’ istoria para en tingu’ i na’manman na finattun i Saina-ta as Jesukristo. I attaduk-måmi mismu lumi’i’ i tinakkilo’-ña. Maniståba ham guihi anai inenra yan tinina Gui’ as Yu’us Tåta, anai hongga i bos giya Guiya ginin i Mås Takkilu’ na Gloria, ilelek-ña,
“Guiya esti i kiridu na Lahi-hu, ni muna’mamaguf Yu’!” Hami mismu humunguk esti na bos i måttu ginin i langit, anai manhahami yan Guiya gi santus na oksu’ sabåna. Intonsis mås metgut na kumfiånsa gaigi giya hami put i minsåhi ni mapruklåma ni mamprufeta. Ennåo na måolik para hamyu yanggin en ékkunguk i minsåhi, sa’ kalang un kåndit ni mani’ina gi halum homhum asta ki machakchak kattan yan manina i puti’un chatanmak gi kurason-miyu.
I finu’ i Saina.
IBANGHELIU Mt 17, 1-9
ÅLELUIA Mt 17, 5c
Åleluia GUIYA ESTI I HU GOFLI’I’ NA LAHI-HU, I MUNA’MAMAGUF YU’ –
EKKUNGUK GUI’!
Åleluia
+ Un tinaitai ginin i såntu Ibangheliu sigun gi tinigi’ San Mateo
Dispues di sais dihas Ha konni’ si Jesus si Pedro, yan i dos chume’lu as Juan yan Santiago, hulu’ gi un takkilu’ na oksu’ sabåna mañisiha ha’ na maisa. Mientras ma’a’atan Gui’, matulaika figurå-ña: muma’lak i matå-ña taiguihi i atdao, ya umå’paka’ i magagu-ña kalang kåndit. Dispues, i tres na mandisipulu mali’i’ si Moises yan Elias manguekuentus yan si Jesus. Intonsis kumuentus si Pedro ya ilek-ña as Jesus, “Asaina, mansuetti sa’ manggaigi hit guini; yanggin malagu’ Håo, bai hu fanhåtsa tres na palapåla guini, unu para Hågu, unu para si Moises, yan unu para si Elias.” Mientras kumuekuentus, mantinampi siha ni un ma’lak na mapagåhis ya un bos ginin i mapagåhis ilek-ña: “Guiya esti i Hu gofli’i’ na Lahi-hu, i muna’mamaguf Yu’–ekkunguk Gui’!” Anai ma hunguk i bos ni mandisipulu nina’fansen ma’å’ñåo siha ya manoppup påpa’ gi edda’. Malak guatu si Jesus giya siha ya mampinatcha. Ilek-ña, “Fangahulu’, Cha’-miyu fanma’å’a’ñåo!” Pues anai manalakhilu’ tåya’ ottru lini’i’-ñiha fuera di si Jesus.
Anai manototunuk ginin i eksu’ sabåna maninetdin siha as Jesus, “Cha’-miyu fane’e’sangani ni håyi put esti i lini’i’-miyu asta ki mana’lå’la’ ta’lu i Lahin i Taotåo ginin i finatai.”
I Ibangheliun i Saina
