FINE’NA NA TINAITAI Sir 3, 2-6. 12-14
Un tinaitai ginin i Lepblun Sirach
Si Yu’us Ha na’ma’onra i tata entri i famagu’on-ña;
Ha aprueba i åoturidåt i nana gi entri i lalahi-ña siha.
Guiya ni umonra si tatå-ña ha apåsi i isåo-ña siha;
mamomo’lu guinahan riku guiya ni umo’onra si nanå-ña.
Guiya ni umonra si tatå-ña u nina’maguf ni famagu’un
ya yanggin manåyuyut siempri ma’ekkunguk.
Guiya ni umonra si tatå-ña u anåkku’ ha’ani-ña;
guiya ni muna’mamaguf si nanå-ña ha o’osgi si Yu’us.
Lahi-hu, fa’måolik si tatå-mu gi inamko’-ña;
mientras ha’ gagaigi mungnga mana’piniti.
Maseha esta ti manunungu’, na’gai kunsiderasion håo nu guiya;
mungnga madispresia gui’ gi brinabu-mu.
Sa’ i minesngun kontra i tata ti siña mamaleffanñaihun,
sa’ sumetbi kumu un inifresi para isao—ya u fanhåli’ åpmam.
I finu’ i Saina.
INEPPIN I SÅTMU Ps 128, 1-2. 3. 4-5
R. MANMAGUF ATYU SIHA I MANMA’ÅÑÅO NI SAINA,
YAN MANMAMOMOKKAT GI CHALÅN-ÑA SIHA.
Manmaguf atyu siha i umo’osgi i Saina,
i chumocho’gui i tinagu’ Yu’us.
Sa’ siempri un kånnu’ i kusetchan i fina’chu’cho’-mu;
maguf håo ya un gefsaga:
INEPPI…..
Kalang meppa’ na råmas ubas
i asaguå-mu palåo’an gi halum i gimå’-mu,
i famagu’on-mu kalang tinanum ubas
gi uriyan i lamasa-mu.
INEPPI….
.
Atan ha’, sa’ taiguini u fanmabendisi
i lalåhi ni manma’å’ñåo ni Saina.
Puedi i Saina un binendisi ginin Sion,
todu i ha’ånin i lina’lå’-mu
kosaki un såonåo gi minaguf Hirusalen.
INEPPI…..
SIGUNDU NA TINAITAI Col 3, 12-21
Un tinaitai ginin i Kattan San Pablo para i taotåo ‘Colossae’
Hafañe’lus:
Hamyu i taotåo Yu’us; mangginefli’i’ hamyu ya esta Ha atyik hamyu para iyon-ña. Pues put ennåo na debidi en fanminagågu ni mina’åsi’, i kariñu, hinimitdi, suåbi yan pinasensia. Fanasungun unu yan ottru yan fana’asi’i yanggin guaha umugung kontra ottru. Debidi en fana’asi’i unu yan ottru taimanu ha’ na esta maninasi’i hamyu ni Saina. Na’yiyi ni ginefli’i’ esti siha, sa’ i ginefli’i’ muna’fandadañña’ todu gi prifektu na dinañña’. I pås ni måfattu ginin i Kristo en fangginiha gi disision ni en fa’titinas; sa’ put esti na pås na maninagang hamyu as Yu’us para en fandañña’ kumu un tatåotåo. Yan fanmannå’i agradesimentu. Debidi u gaigi gi kurason-miyu i mensåhin i Kristo yan todu i rikeså-ña. Fanáfa’na’gui unu yan ottru yan todu i tinemtum. Fangånta såtmu, himnu, yan mansagrådu na kånta; kantåyi si Yu’us kantan agradesimentu gi kurason-miyu. Put ennåo na maseha håfa i en che’gui pat en sangan, debidi en che’gui gi na’an i Saina as Jesus, mientras manmannåna’i hamyu gråsia ginin i Kristo para si Yu’us Tåta.
Famalåo’an, pe’lu hamyu gi papa’ i ginibetnan i asaguan-miyu, sa’ ennagui’ upbligasion-miyu gi Saina. Lalåhi, guaiya i asaguan-miyu yan cha’-miyu fantataklalu’ kontra siha. Famagu’un, upbligasion-miyu gi Saina para en esgi i mañainan-miyu todu i tiempu, sa’ esti muna’mamaguf si Yu’us. Mañaina, cha’-miyu istototba i famagu’un-miyu, sa’ siempri malingu ånimun-ñiha.
I finu’ i Saina.
A
IBANGHELIU Mt 2, 13-15. 19-23
ÅLELUIA Col 3, 15. 16
R. Åleluia. PUEDI I PÅS I KRISTO U FANGGUBETNA GI KURASON-MIYU
YAN I KABÅLIS NA MENSAHI-ÑA
U LÅ’LA’ GI SANHALUM-MIYU.
R. Åleluia
+ Un tinaitai ginin i såntu Ibangheliu sigun gi tinigi’ San Mateo
Dispues di manhånåo, finattoigui si Jose ni anghit i Saina gi guinifi-ña ya ilek-ña: “Kahulu’ ya un konni’ i patgun yan si nanå-ña ya en fanmalågu para Ihipto, ya en fañåga guennao asta ki hu sangåni hamyu. Si Hirodes ha ispipiha i patgun para u punu’.”
Pues kahulu’ si Jose, ha konni’ i patgun, yan si nanå-ña ya manhånåo puengi para Ihipto, ya mañåga guennåo asta i finatai Hirodes. Manmacho’gui esti siha para u makumpli i finu’ i Saina ni sinangan i prufeta:
“Hu ågang i Lahi-hu huyung ginin Ihipto.”
Dispues di i finatai Hirodes, finattoigui si Jose gi guinifi-ña ni un ånghit i Saina giya Ihipto, ya ilek-ña: “Kahulu’ ya un konni’ i patgun yan si nanå-ña ya en fana’lu tåtti gi tanu’ Israhet, sa’ manmåtai esta todu atyu siha i kumekepunu’ i patgun.” Intonsis kahulu’ si Jose ya ha konni’ i patgun yan si nanå-ña ya manhånåo tåtti para i tanu’ Israhet.
Låo anai ha hunguk si Jose na si Archelaus tumattiyi si tatå-ña kumu rai Hudeha muma’å’ñåo humånåo guatu. Pues put i masangåni ta’lu gi maigo’-ña, humånåo para Nasaret, un songsung giya Galileha ya u såga guennåo. Ha cho’gui esti put i para u makumpli i sinangan i prufeta,
“U ma’ågang Gui’ kumu tåotåo Nasaret.”
I Ibangheliun i Saina.
