SAGRÅDA FAMILIA

FINE’NA NA TINAITAI                                                                   Sir 3, 2-6. 12-14

Un tinaitai ginin i Lepblun Sirach 

Si Yu’us Ha na’ma’onra i tata entri i famagu’on-ña;

Ha aprueba i åoturidåt i nana gi entri i lalahi-ña siha.

Guiya ni umonra si tatå-ña ha apåsi i isåo-ña siha;

mamomo’lu guinahan riku guiya ni umo’onra si nanå-ña.

Guiya ni umonra si tatå-ña u nina’maguf ni famagu’un

ya yanggin manåyuyut siempri ma’ekkunguk.

Guiya ni umonra si tatå-ña u anåkku’ ha’ani-ña;

guiya ni muna’mamaguf si nanå-ña ha o’osgi si Yu’us.

Lahi-hu, fa’måolik si tatå-mu gi inamko’-ña;

mientras ha’ gagaigi mungnga mana’piniti.

Maseha esta ti manunungu’, na’gai kunsiderasion håo nu guiya;

mungnga madispresia gui’ gi brinabu-mu.

Sa’ i minesngun kontra i tata ti siña mamaleffanñaihun,

sa’ sumetbi kumu un inifresi para isao—ya u fanhåli’ åpmam.

I finu’ i Saina.

INEPPIN I SÅTMU                                                                           Ps 128, 1-2. 3. 4-5

1. MANMAGUF ATYU SIHA I MANMA’ÅÑÅO NI SAINA,

YAN MANMAMOMOKKAT GI CHALÅN-ÑA SIHA.

Manmaguf atyu siha i umo’osgi i Saina,

i chumocho’gui i tinagu’ Yu’us.

Sa’ siempri un kånnu’ i kusetchan i fina’chu’cho’-mu;

maguf håo ya un gefsaga:

INEPPI…..

Kalang meppa’ na råmas ubas

i asaguå-mu palåo’an gi halum i gimå’-mu,

i famagu’on-mu kalang tinanum ubas

gi uriyan i lamasa-mu.

INEPPI….

.

Atan ha’, sa’ taiguini u fanmabendisi

i lalåhi ni manma’å’ñåo ni Saina.

Puedi i Saina un binendisi ginin Sion,

todu i ha’ånin i lina’lå’-mu

kosaki un såonåo gi minaguf Hirusalen.

INEPPI…..

SIGUNDU NA TINAITAI                                                                             Col 3, 12-21

 Un tinaitai ginin i Kattan San Pablo para i taotåo Colossae 

 Hafañe’lus:

Hamyu i taotåo Yu’us; mangginefli’i’ hamyu ya esta Ha atyik hamyu para iyon-ña. Pues put ennåo na debidi en fanminagågu ni mina’åsi’, i kariñu, hinimitdi, suåbi yan pinasensia. Fanasungun unu yan ottru yan fana’asi’i yanggin guaha umugung kontra ottru. Debidi en fana’asi’i unu yan ottru taimanu ha’ na esta maninasi’i hamyu ni Saina. Na’yiyi ni ginefli’i’ esti siha, sa’ i ginefli’i’ muna’fandadañña’ todu gi prifektu na dinañña’. I pås ni måfattu ginin i Kristo en fangginiha gi disision ni en fa’titinas; sa’ put esti na pås na maninagang hamyu as Yu’us para en fandañña’ kumu un tatåotåo. Yan fanmannå’i agradesimentu. Debidi u gaigi gi kurason-miyu i mensåhin i Kristo yan todu i rikeså-ña. Fanáfa’na’gui unu yan ottru yan todu i tinemtum. Fangånta såtmu, himnu, yan mansagrådu na kånta; kantåyi si Yu’us kantan agradesimentu gi kurason-miyu. Put ennåo na maseha håfa i en che’gui pat en sangan, debidi en che’gui gi na’an i Saina as Jesus, mientras manmannåna’i hamyu gråsia ginin i Kristo para si Yu’us Tåta.

Famalåo’an, pe’lu hamyu gi papa’ i ginibetnan i asaguan-miyu, sa’ ennagui’ upbligasion-miyu gi Saina. Lalåhi, guaiya i asaguan-miyu yan cha’-miyu fantataklalu’ kontra siha. Famagu’un, upbligasion-miyu gi Saina para en esgi i mañainan-miyu todu i tiempu, sa’ esti muna’mamaguf si Yu’us.  Mañaina, cha’-miyu istototba i famagu’un-miyu, sa’ siempri malingu ånimun-ñiha.

I finu’ i Saina.

IBANGHELIU                                                                                                      Lk 2, 41-52

ÅLELUIA   Col 3, 15. 16

1. Åleluia. PUEDI I PÅS I KRISTO U FANGGUBETNA GI KURASON-MIYU

YAN I KABÅLIS NA MENSAHI-ÑA

U LÅ’LA’ GI SANHALUM-MIYU.

1. Åleluia.

+  Un tinaitai ginin i såntu Ibangheliu sigun gi tinigi’ San Lucas

Manhåhanåo i mañainan Jesus para Hirusalen para i giput i Påsgua.  Anai dossi åñus sakkån-ña i patgun manhånåo ta’lu para i giput kumu machocho’gui.  Anai makpu’ i giput manhånåo siha tåtti para i gima’-ñiha låo i patgun as Jesus sumåga ha’ giya Hirusalen.  Låo ti matungu’ ni mañaina-ña; hinassun-ñiha na såsaonåo ha’ Gui’ gi tropån tåotåo, låo dispues di un diha na karera ma tutuhun ma ispiha Gui’ entri i mamparentis yan manátungu’. Anai ti ma sodda’ Gui’ mana’lu tåtti giya Hirusalen. Gi mina’tres dihas masodda’ Gui’ gi Templu matåtachung yan i ma’estrun i ManHudihos, Ha e’ekunguk yan Ha fafaisin siha kuestion. Todu i humunguk Gui’ nina’fanmanman ni minalate’-ña yan i manomtum na inippen-ña. Nina’fanmanman i mañaina-ña anai mali’i’ Gui’, ya ilek-ña si nanå-ña nu Guiya, “Ihu, håfa na Un cho’gui esti nu hami?  Gof chathinassu ham yan si tatå-mu ni in kekesedda’ Håo.” Låo ilek-ña nu siha, “Håfa na en aliligåo Yu’?  Ti en tingu’ ada na debidi bai Hu gaigi gi gima’ Tatå-hu?”  Låo ti ma kumprendi håfa mansinangåni siha. Pues manhånåo siha tåtti yan si Jesus para Nasaret, ya umosgun Gui’ para siha.  Si nanå-ña ha po’lu todu esti siha na sinisedi gi kurason-ña.  Si Jesus dumångkulu yan mumalåti’, ya mås guinaiya Gui’ as Yu’us yan i taotåo siha.

I Ibangheliun i Saina.