PÅSGUA I RESUREKSION I SAINA BIHILIAN PÅSGUA

FINE’NA NA TINAITAI                                                                      Gn 1, 1. 26-31a

Un tinaitai ginin i Lepblun Genesis

Gi tutuhun anai si Yu’us Ha fa’tinas i langit yan i tanu’, ilek-ña, “Nihi ta fa’tinas i taotåo gi imahen-ta, yan gi pinarihu-ta.  Ya u fanggubetna gi hilu’ todu i guihan gi tasi, i påharu gi airi, i guaka, yan i manmachålik siha na gå’ga, yan todu atyu siha na gå’ga i mangukunánaf gi tanu’.”

Si Yu’us Ha fa’tinas i taotåo gi imahen-ña,

sagrådu na imahen-ña Ha fa’tinas gui’,

i lahi yan i palåo’an Ha fa’tinas siha.

Si Yu’us Ha bendisi siha ya ilek-ña: “Fanmåmta’, na’bula i tanu’ ya en gubetna i guihan siha gi tasi, i påharu siha gi airi, yan todu i manlåla’la’ siha na kosas gi hilu’ tånu’.” Ilek-ña si Yu’us lokkui’, “Atan ha’, Hu intrega hamyu nu todu i manggai simiya na trongku gi hilu’ tånu’ yan todu atyu siha na trongku i manmanonokcha’ fruta para nengkannu’-miyu; yan para todu i ga’ga’ gi tanu’, i guihan gi tasi, i påharu gi airi yan todu i manlåla’la na gå’ga’ ni mangukunanaf gi edda’, Hu nå’i siha ni mambetdi na tinanum para nengkannu’-ñiha. “Ya todu esti manmasusedi. Si Yu’us Ha atan todu siha i fina’tinås-ña ya nina’gof maguf Gui’.

                        I finu’ i Saina. 

INEPPIN I SÅTMU                                                               Ps 33, 4-5,6-7,12-13,20-22

R. (5) BULA I TANU’ NI MINAOLIK I SAINA.

Sa’ tunas i finu’ i Saina;

ya todu i che’cho’-ña siha angokkuyun.

I Saina Ha guaiya i hustisia yan tininas

yan Ha na’bula i tanu’ ni minaolek-ña.

INEPPI…..

Gi finu’ i Saina långit siha mafa’tinas;

 gi guinaifin i pachot-ña manmafa’tinas i manånghit gi langit.

 Ha na’etnun i hanum i tasi gi un munton;

ya gi budega nai Ha po’lu i mattingan.

INEPPI…..

Maguf i nasion ni ha yå’hu si Yu’us kumu Saina,

            i taotåo siha ni Ha atyik kumu iyon-ña.

Ginin i langit i Saina Ha atan påpa’;

            Ya Ha li’i’ todu i taotåo siha.

 INEPPI…..

I anti-ta ha nanangga i Saina,

            Guiya i ayudantet-ta yan pruteksion-ta.

 Puedi u gaigi giya hami i yine’ase’-mu, Asaina;

hami ni pumopo’lu i inangokkun-måmi giya Hågu.

INEPPI…..

II

MINA’DOS NA TINAITAI                                                               Gn 22, 1-2, 9a, 10-13, 15-18

Un tinaitai ginin i Lepblun Genesis

Put i para u chinagi si Abrahan as Yu’us inagang gui’, “Abrahan!  Manoppi si Abrahan, “Listu yu’,” Pues ilek-ña si Yu’us, “Konni’ i lahi-mu as Isaac, i uniku na lahi-mu ni un guaiya, ya un hånåo para i tanu’ Moriah. Guennåo nai un ufresi gui’ kumu sakrifision masosonggi gi hilu’ i eksu’ ni para Hu fanu’i håo

            Anai måttu siha gi lugåt ni sinangåni gui’ as Yu’us, mama’tinas si Abrahan åttat guennåo pues ha arekla i hayu gi hilu’ i attat. Dispues ha hakut i se’si’ para u punu’ i lahi-ña, låo i tentagu’ Yu’us inagang gui’ ginin i langit. “Abrahan, Abrahan!” Manoppi gui’, “Hunggan, Asaina,” Ilek-ña i tentågu’, “Cha’-mu na’fåfattu i kannai-mu gi patgun.” “Cha’-mu chomocho’gui ni håfa nu guiya.” Hu tungu’ på’gu taimanu tinaddong-ña i dibusion-mu gi as Yu’us. Sa’ ti un puni Yu’ ni mismu un guaiya na lahi-mu.” Anai manatan si Abrahan gi uriya, ha li’i’ un kinilu ni iståba gåggaddun kanghilon-ña gi trongku. Pues ha konni’ i kinilu ya ha ufresi kumu sakrifisiun masosonggi, inlugåt di i lahi-ña.

            I tentågu’ i Saina ha ågang ta’lu ginin i langit si Abrahan ya ilek-ña: “Bai Hu fanhula giya Guåhu ha’ na maisa, Ha diklåra i Saina, ya put i ti un chatagui Yu’ ni un gofli’i’ na lahi-mu mismu, bai Hu bendisi håo abundånsia, ya i tinattem-mu u chameggai yan i puti’un siha gi langit yan i grånun unai siha gi kantun tåsi, i tinattem-mu siha u fanhålum gi trangkan i inimigun-ñiha; ya ginin siha, todu i nasion siha u fanmañodda’ bendision; todu esti sa’ put un osgi i tinago’-hu”.

                        I finu’ i Saina.

INEPPIN I SÅTMU                                                                           Ps 16, 5.8.9-10.11

R. (1) HÅGU I PATTEK-KU, O ASAINA.

Asaina, Hågu i pattek-ku yan i taså-hu,

            Hågu gumogo’ti fitmi i pattek-ku.

Todu i tiempu gagaigi i Saina gi me’nå-hu;

yanggin gaigi Gui’ gi fi’on-hu ti bai hu ma’atburota.

INEPPI…..

Put esti na trangkilu i kurason-hu ya maguf i anti-hu;

 kun todu i tataotåo-hu gai kumfihånsa,

Sa’ ti para Un abandona i anti-hu para i sampapa’ na tånu’,

 yan ti para Un sedi i mamfiet na para u fanlamas.

INEPPI…..

Hågu para Un fanu’i yu’ ni chalan i lina’la’,

 kabålis na minaguf gi me’nå-mu,

 ya para todu i tiempu i minaguf gi agapa’-mu.

INEPPI…..

III

MINA’TRES NA TINAITAI                                                             Ex 14, 15 – 15, 1

Un tinaitai ginin i Lepblun Exodus

Ilek-ña i Saina as Moises, “Håfa na sigi ha’ håo umugung nu Guåhu” Sangåni i Israilitas siha ya u fansigi ha’ mo’na. Håtsa hulu’ i baston-mu ya un istira i kannai-mu gi hilu’ i tasi, na’adispatta i tasi gi talu’ kosaki siña i Israelitas siha ma’upus i tasi gi hilu’ ånglu’ na tånu’. Ya bai Hu na’fanåguaguat mås i taotåo Ihipto ya u matattiyi i Israelitas siha. Atyu nai bai Hu risibi i gloria ginin as ‘Pharaoh’, todu i sindalu-ña, i kaleså-ña siha, yan i taotåo kalesa siha. I taotåo Ihipto siempri u matungu’ na Guåhu i Saina.”

            I anghit Yu’us, ni gumigiha i linahyan Israilitas siha, humånåo ya malak i santattin i katdumi. I petput na homhum mapagåhis ni iståba gi sanme’na, humånåo lokkui’, ya malak i santatti gi entalu’ i taotåo Ihipto yan i Israilitas siha. Låo i mapagåhis mås humomhum ya ha chomma’ tulanotchi i linahyan tåotåo Ihipto na u fanhihut yan i Israilitas siha. Dispues ha istira si Moises huyung i kannai-ña gi hilu’ i tasi, ya i Saina Ha na’guinaifi tulanotchi ni un metgut na månglu’ ginin i sanhaya ya umånglu’ i tasi. Anai esta i tasi madibidi, i Israilitas siha manmåtcha gi entalu’ i tasi ni anglu’, i hanum gi ambus bånda kalang mohun mandångkulu na lugan guma’.

            I taotåo Ihipto mapetsigi ya matattiyi i Israilitas siha; todu i kabåyun ‘Pharaoh’, i kalesa yan i taotåo kalesa. Gi pupuengi, åntis di chatanmak, i Saina Ha na’låmlam i mapagåhis ya Ha na’fanma’åñåo i sindålun Ihipto, dispues Ha na’fanmafnut i ruedan i kalesa siha ya kana’ ha’ ti siña mangiluluk.  Ennåo mina’ i taotåo Ihipto mañeha gi me’nan i Israilitas siha sa’ i Saina mumumu put siha kontra i taotåo Ihipto. 

            Pues i Saina Ha sangåni si Moises, “Istira huyung i kannai-mu gi hilu’ i tasi, ya u milalak i hanum tåtti ya u fantinampi i taotåo Ihipto, yan i kalesan-ñiha yan i taotåo kalesa siha.” Si Moises ha istira huyung i kannai-ña gi hilu’ i tasi, ya gi chatanmak, i tasi milalak tåtti gi rigulåt na tinadong-ña. Manmalålagu i taotåo Ihipto siha guatu gi tasi, anai i Saina mamblinangku siha asta i talu’.  Ya anai milalak i hanum tåtti, mantinampi i kalesa siha yan i taotåo kalesa yan todu i sindålu ni tumattitiyi i Israilitas hålum gi tasi.  Ni unu giya siha umiskåpa.  Låo i Israilitas siha manmåtcha gi hilu’ i anglu’ na tånu’ gi entalu’ i tasi, ya i hanum kalang luga gi ambus bånda. Pues taiguini satbån-ña i Saina ni Israilitas siha ginin i fuetsan Ihipto guihi na ha’åni.  Anai mali’i’ ni Israilitas siha na manlalalacha’ gi kantun tåsi i manmåtai na tåotåo Ihipto ya mali’i’ i fuetsan i Saina ni Ha na’annuk kontra i taotåo Ihipto, manma’åñåo siha ni Saina ya manmanhonggi nu Guiya yan gi as Moises i tentago’-ña.

            Dispues si Moises yan i Israilitas siha makånta esti na kånta para i Saina:

Bai hu kånta para i Saina, sa’ gloriosu manggånna Gui’;

            Kabåyu yan kalesa Ha dåggåo huyung gi tasi.

                        I finu’ i Saina.

INEPPIN I SÅTMU                                                               Ex 15, 1-2,3-4.5-6.17-18

R. (1) NIHI TA KANTÅYI I SAINA,

            SA’ HA NA’BINALUTAN GUI’ NI GLORIA.

Bai hu kantåyi i Saina, sa’ gloriosu manggånna Gui’,

            kabåyu yan kalesa Ha dåggåo huyung gi tasi.

I Saina i fuetsåk-ku yan ånimu-hu,

yan Guiya i satbadot-tu.

            Guiya Yu’os-su, hu onra Gui’,

I Yi’us i tatå-hu, hu na’takkilu’ Gui’.

INEPPI…..

I Saina gumegera,

Saina i na’ån-ña!

I kalesan Pharaoh yan i sindalu-ña Ha dåggåo huyung gi tasi,

            i manmå’gas siha na ufisiåt-ña manmafondu gi Tasin Agaga’.

INEPPI…..

I milalak hånum mantinampi siha,

            Manmafondu siha kalang åtchu’.

I agapa’ na kannai-mu, Asaina, mifuetsa,

            I agapa’ na kannai-mu, Asaina, yumayamak i inimigu.

INEPPI…..

Un konni’ hålum siha i taotåo ni Un såtba,

            Ya Un po’lu siha gi eksu’ i irensiåm-mu

I lugåt anai matåta’chung Håo, Asaina,

            I santuåriu, ni mismu kannai-mu umistapblesi.

I Saina u fanggubetna para todu i manaihinekkuk na tiempu.

INEPPI….. 

IV

MINA’KUÅTTRU NA TINAITAI                                                 Is 54, 5-14

Un tinaitai ginin i Lepblun i Prufeta as Isaias

Atyu i mama’asaguå-mu Guiya muna’huyung håo;

            i na’ån-ña i Sainan i ehetsito siha;

I nana’librem-mu Guiya i Unu ni Såntus giya Israhet,

            ma’å’gang Gui’ Yi’us todu i tanu’.

Ina’agang håo as Yu’us tåtti,

            kalang i asagua ni mayuti’ yan pininiti espiritu-ña,

I palåo’an uma’asagua gi hiniben-ña dispues mayuti’,

            ilek-ña i Yi’os-mu.

Hu yuti’ñaihun håo un ratu,

            låo bai Hu konni’ håo tåtti yan bula kariñu.

Gi un mumentu na linalalo’-hu,

            Hu nå’na’ i matå-hu ginin hagu;

Låo muma’åsi’ Yu’ nu hågu ginin i taddung na guinaiyak-ku,

            ilek-ña i Saina, i nana’librem-mu.

Para guåhu kalang i ha’ånin Noah esti,

            anai manhula Yu’ na i hanum Noah

            ni ngai’an ta’lu na u na’dilubiu i tanu’;

Pues manhula Yu’ na ti bai Hu lalålu’ nu hågu,

            patsino bai lalåtdi håo.

Maseha u fañuha i sabåna siha gi sagan-ñiha

            ya u fanmayengyung i eksu’ siha,

ni ngai’an nai un diningu ni guinaiya-ku

            pat u mayengyung i kuntratå-hu pås,

            ilek-ña i Saina, ni gai ma’asi’ nu hågu.

O hågu ni mamadedesi, pinakyu yan tåya’ kunsuelu-mu,

            bai Hu fa’tinas i chalån-mu siha ni ‘carnelians’,

            yan i haligin i gimå’-mu ni ‘sapphires’;

Bai Hu fa’tinas i sagå-mu gumera ni ‘rubies’,

            i trangkåm-mu ni kriståt,

            yan todu i ligan gimå’-mu ni mangguaguan na åtchu’.

Todu i famagu’on-mu lalåhi u famfinanå’gui ni Saina,

            ya u dångkulu i pås i famagu’on-mu.

Un ma’istapblesi gi tininas,

            chågu’ ginin i mina’å’ñåo na un maså’pit,

            anai ti siña måttu i distrosu giya hågu.

I finu’ i Saina.

INEPPIN I SÅTMU                                                               Ps 30, 2. 4. 5-6, 11-12. 13 

R.  BAI HU TUNA HÅO, ASAINA, SA’ UN RISKÅTA YU’. 

Hu tuna Håo, Asaina, sa’ Un kåhat yu’ hulu’

            ya ti Un sedi na u fanmaguf i maninimigu-hu put guåhu. 

Asaina, Hågu muna’libri yu’ ginin i naftan;

 ti Un sedi na bai hu falak påpa’ gi sagan i manmåtai.

INEPPI…..

Kantåyi i Saina, hamyu ni mamfiet,

            ya nå’i agradesimentu i santus na na’ån-ña. 

Sa’ un råtu ha’ i yini’usan na lalalo’-ña;

 i yini’usan na minaolek-ña para todu i tiempu.

Kasao siha manmåfattu gi minatchum åtdåo;

låo minaguf gi chatanmak.

 INEPPI…..

Ekkunguk, Asaina, ya Un gai ma’asi’ nu guåhu;

            Hågu, Asaina, ayudantek-ku. 

Un tulaika i piniti-hu para minaguf;

            Asaina, Yu’os-su, bai hu nå’i Håo agradesimentu todu i tiempu.

INEPPI…..

V

MINA’SINGKU NA TINAITAI                                                        Is 55, 1-11

 Un tinaitai ginin i Lepblun i Prufeta as Isaias

Taiguini ilek-ña i Saina:

Todu hamyu ni manmå’hu,

            fanmåttu gi hanum!

Hamyu ni tåya’ salåppi’-miyu,

            fanmåttu, risibi i grånun trigu ya en fañotchu;

Fanmåttu, sin en fanmanapåsi, sin gåstu,

            fanggimin binu yan letchi!

Sa’ håfa na en gagasta i salåppi’-miyu gi ti manmamakannu’;

            i suetdun-miyu gi atyu i ti siña muna’fansatisfetchu hamyu?

Ekkunguk yu’ ya siempri mañotchu hamyu måolik,

            ya siempri gefsaga lina’la’-miyu.

Fanekkunguk yan fanmamaila’ tåotåo-hu,

            fanmåttu giya Guåhu ya en fanggai lina’la’.

Bai Hu rinueba yan hamyu i taihinekkuk na kuntråta,

            ya bai nå’i hamyu ni bendision ni Hu prumeti si David.

Hu na’må’gas gui’ para u dirihi i nasion siha,

            yan ginin guiya na Hu fa’nu’i siha ni fuetsåk-ku.

Siempri en agang ottru nasion siha:

            ni ginin un tiempu ti matungu’ hamyu,

            låo på’gu siempri manmalålagu guatu giya hamyu para u fañåonåo!

Guåhu i Saina, i Yi’us-miyu, i santus na Yu’us Israhet,

            Guåhu bai Hu na’fanmasusedi esti siha;

            bai Hu nå’i hamyu onru yan gloria.

Bira hamyu guatu gi Saina yan tåyuyut Gui’,

            sa’ hihut Gui’ på’gu.

I manailayi u ma tulaika i lina’la’-ñiha

            ya u ma bira hinassun-ñiha.

Sedi na u ma bira siha guatu gi Saina, i Yi’os-ta;

            yo’asi’ Gui’ yan listu man’asi’i.

Ilek-ña i Saina, “Ti parehu i hinassok-ku yan i hinassun-miyu,

            yan i che’cho’-hu ti parehu yan i che’chu’-miyu.

“Taimanu ha’ tinakkilo’ña i langit gi hilu’ tånu’,

            taiguennåo ha’ tinakkilo’ña i bidå-hu yan i hinassok-ku ki hamyu.

“I fino’-hu kalang niebi yan uchan

            ni mafåttu ginin i langit para u rega i tanu’.

Nina’dådangkulu i tinanum

            ya ha na’guaguaha simiya para matånmi para nengkannu’.

Taiguennåo ha’ lokkui’ i palabrås-su

            ti u måhñåo chumo’gui håfa planu-hu;

            siempri ha cho’gui todu i malago’-hu para u cho’gui.

                        I finu’ i Saina.

INEPPIN I SÅTMU                                                                           Is 12, 2-3.4.5-6

R (3)    UN MAGUF MANLUPUK HÅNUM GI BE’BU’ SATBASION.

Hunggan si Yu’us satbadot-tu;

            siguru yu’ yan ti ma’åñåo yu’.

Ginin i Saina na metgut yan båtbaru yu’,

            yan Guiya i satbadot-tu.

Siempri maguf håo manlupuk hånum

            gi fontin satbasion.

INEPPI…..

Nå’i gråsia i Saina, tuna i na’ån-ña;

            na’matungu’ i bidå-ña siha gi nasion,

            pruklåma na takkilu’ i na’ån-ña.

INEPPI…..

Kantåyi tinina i Saina put i gloriosu na che’cho’-ña;

            na’matungu’ esti gi todu i tanu’ siha.

Essalåo kun minaguf, O siudån Sion,

            sa’ gaigi giya hågu i ma’gas

            Guiya ni Såntus ginin Israhet!

INEPPI…..

VI

MINA’SAIS NA TINATAI                                                                Bar 3, 9-15. 32 – 4, 4

Un tinaitai ginin i Lepblun i Prufeta as Baruch

O Israhet, ekkunguk i tinago’-hu siha para lumå’la’:

    ekkunguk, ya en kumprendi håfa kumeke’ilekña tiningu’!

Sa’ håfa, Israhet,

    na manggaigi hamyu gi tanu’ i inimigun-miyu,

    mambihu ha’ hamyu gi istrangheru na tånu’,

Mañåsåonåo hamyu gi inapplacha’ i manmåtai,

    manmatufung hamyu yan atyu siha i manhånåo para i sampapa’ na tånu’?

En yiti’ i trongkun i tinemtum!

    Yanggin mohun en dalalaki i chalan Yu’us,

     mañåsaga hamyu på’gu gi taihinekkuk na pås.

Kesodda’ månu nai gaigi i tiningu’, månu nai gaigi i minetgut,

     månu nai gaigi i kinemprendi, ya en tingu’

     månu nai gaigi i anåkku’ na lina’la’,

     anai gaigi i kandit i attaduk, yan pås.

Håyi sumodda’ anai sumåsaga i tinemtum,

     håyi esta humåtmi ennåo na tesoru?

Atyu i tumungu’ todu i kosas siha Ha tungu’ gui’;

     esta Ha kumprendi ni titanos-ña.

Esta Ha istapblesi i tanu’ para todu i tiempu,

     ya Ha na’bula gui’ ni atyu siha i kuåttru patas-ñiha na gå’ga’;

Ha tågu’ i inina ya inesgi,

     Ha ågang ya manlålåolåo inekkunguk Gui’;

I puti’un siha gi sagang-ñiha

     manmañiñila’ yan manmamaguf;

Yanggin ha ågang siha, manmanoppi, “Estegui’ ham!”

     manmañiñila’ yan manmamaguf para i Muna’huyung siha.

Taiguennåo i Yi’os-ta;

     tåya’ ottru para ma’akumpåra yan Guiya:

Esta Ha midi todu i tiningu’,

     ya Ha nå’i si Jacob, i tentago’-ña,

     si Israhet, i kiridu na lahi-ña.

Desdi ennåo na tiempu umannuk Gui’ gi tanu’,

     yan kalalamtin gi halum tåotåo.

Guiya i lepblun i tinagu’ Yu’us siha,

     i lai ni dinidira para todu i tiempu;

Todu i mañechettun giya Guiya siempri manlå’la’,

     låo u fanmåtai atyu siha i yumuti’ Gui’.

O Jacob, bira håo ya un risibi Gui’:

     famokkat gi kandet-ña para guatu gi mina’lak.

Cha’-mu e’ena’i ottru ni gloriå-mu,

     pat i pribilehu-mu para i istrangheru na tåotåo.

O Israhet, manmabendisi hit;

     sa’ ta tungu’ atyu i na’maguf para si Yu’us!

                        I finu’ i Saina.

INEPPIN I SÅTMU                                                                           Ps 19, 8.9.10.11

R. (Jn 6,69)  ASAINA, GIYA HÅGU NAI GAIGI

                      I FINU’ I TAIHINEKKUK NA LINA’LA’.

Sen måolik i lai i Saina,

 Ha na’freresku i anti!

Angokkuyun i tinagu’ i Saina,

 Ha nåna’i tinemtum i mansinsiyu.

INEPPI…..

Manunas i tinagu’ i Saina,

            ha na’mamaguf i kurason;

Klåru i minandan i Saina,

            Ha na’lele’an i áttaduk .

INEPPI…..

Gåsgas i mina’å’ñåo gi Saina,

            mesngun para todu i tiempu;

I etdin i Saina manmagåhit,

            manunas interamenti.

INEPPI…..

 Mås mangguaguan siha ki i oru,

 ki i munton i mås gåsgas na oru,

 Mamesña ki i anibat

            pat i miet ni ginin i chenchun.

INEPPI…..

VII

MINA’SIETTI NA TINAITAI                                                                       Ez 36, 16-28

Un tinaitai ginin i Lepblun i Prufeta as Ezekiel

Ha kuentusi yu’ i Saina ya ilek-ña, “Låhi, anai mañåsaga i Israhelitas gi tanu’-ñiha, mana’applacha’ ginin i tailayin lina’la’ yan bidan-ñiha ha’ . Hu na’li’i’ siha ni linalalo’-hu sa’ put i manmamunu’ siha tåotåo guihi na tånu’ yan ma’adora i Yi’us i mampagånu siha. Hu kundena siha sa’ put i tailayin lina’la’ yan bidan-ñiha, ya Hu chalapun siha gi manistrangheru na tånu’. Masea manmalak månu mana’båbaba i santus na na’ån-hu gi todu i hinanao-ñiha. “Intonsis, nå’i i ManIsrailitas ni esti na nutisia ginin Guahu, i Mås Takkilu’ na Saina: Esti i para bai cho’gui åhi’ ti put hamyu ni ManIsrahelitas, låo put i santus na na’ån-hu, ni en disonra gi todu i tanu’ siha ni en hanågui. Anai Hu fa’nu’i i nasion siha ni sinantus i ma’gas na na’ån-hu — i na’an ni en disonra gi entri siha — pues taiguennåo na siempri u matungu’ na Guåhu i Saina. Guåhu, i Mås Takkilu’ na Saina, esta kumuentus. Bai Hu usa hamyu para bai fa’nu’i i nasion siha na såntus Yu’. Bai Hu konni’ hamyu tåtti ginin todu i nasion yan tånu’ siha para guatu gi tanu’-miyu mismu. Bai Hu såtpi hamyu ni gasgas na hånum ya en fangåsgas ginin i manapplacha’-miyu put i yi’us i manpagånu yan todu i pumalu siha ni muna’fanapplacha’ hamyu. Bai Hu nå’i hamyu nuebu na kurason yan hinassu. Bai Hu na’suha i mahettuk kalang åtchu’ na kurason-miyu ya bai nå’i hamyu ubidenti na kurason. Bai Hu po’luyi hamyu ni espiritu-hu para u na’siguru na en dalalaki i lai siha yan i tinagu’ ni Hu nå’i hamyu. Intonsis taiguini na siempri en fanlå’la’ gi tanu’ ni Hu nå’i i mañainan-miyu. Hamyu para tåotåo-hu, yan Guåhu para Yu’us-miyu.

                        I finu’ i Saina.

INEPPIN I SÅTMU                                                                 Ps 42, 3. 5; 43, 3. 4

R.(Ps 42, 2)     TAIGUIHI I BINÅDU NI HA MALAGUGU’I I FRESKU NA HÅNUM GI SADDUK, TAIGUENNÅO HA’ MAHÅHALANG YU’ NU HÅGU, O YU’US.

Måma’-hu yu’ nu Hågu, O Yu’us, i lala’la’ na Yu’us.

Ngai’an nai siña yu’ humånåo para bai hu li’i’ i matan Yu’us?

INEPPI…..

Anai såonåo yu’ gi likåo yan i linahyan,

Humånåo yu’ yan siha para i gima’ Yu’us,

Gi halum a’gang na essalåo agradesimentu,

yan i tropa ni mangguguput.

INEPPI…..

Na’fåttu i ininå-mu yan i minagahet-mu,

 ya siha u isgaihun yu’

Yan konni’ yu’ para i santus na sabanå-mu,

            anai sumåsaga Håo.

INEPPI…..

Ya bai hu fåttu gi attat Yu’us,

gi as Yu’us, i muna’mamaguf yu’.

Pues bai hu tuna Håo ni håtpa,

O Yu’us, Yu’os-su!

INEPPI…..

Yanggin guaha para u matakpångi, usa esti.

INEPPIN I SÅTMU                                                               Ps 51, 12-13.14-15.18-19

R. (12)     O YU’US, FA’TINAS UN GÅSGAS NA KURASON GIYA GUÅHU.

Fa’tinas un gåsgas na kurason giya guåhu, Yu’us;

            rinueba giya guåhu un fitmi na espiritu,

 Cha’-mu yu’ dudulalak ginin i me’nå-mu,

            patsino Un åmut yu’ ni santus na espiritu-mu.

INEPPI…..

Na’maguf yu’ ta’lu gi satbasion-mu;

susteni giya guåhu un ubidenti na espiritu.

 Bai hu fa’nå’gui i manailayi ni chalån-mu,

 ya u ma bira siha i mani’ísao guatu giya Hågu.

INEPPI…..

Sa’ ti Un diseseha sakrifisiu;

masosonggi na inifresi ti Un aksepta.

I sakrifisiok-ku, O Yu’us, sinetsut hinalum;

O Yu’us cha’mu chata’atan i mañotsut yan humitdi na kurason.

INEPPI…..

EPISTULA                                                                                                                 Rm 6, 3-11

Un tinaitai ginin i Kattan San Pablo para i taotåo Roma

Hafañe’lus:  Siguru na en tingu’ ha’ na anai manmatakpångi hit gi dinanña’ yan i Kristo Jesus, manmatakpångi hit gi dinanña’ yan i finatai-ña.  Intonsis, ginin i manmatakpanget-ta manmahåfut hit yan Guiya yan mañåonåo hit gi finatai-ña, kosaki, taimanu ha’ na mana’lå’la’ ta’lu i Kristo ginin i finatai ginin i gloriosu na nina’siñan i Tata, taiguennåo ha’ na hita lokkui’ siña manlå’la’ gi nuebu na lina’la’.

     Ya put i esta manunu hit yan Guiya put i mamparehu hit manmåtai yan Guiya, pues taiguennåo ha’ lokkui’ na siempri manunu hit yan Guiya yanggin mana’fanlå’la’ hit ta’lu parehu yan Guiya. Ya ta tungu’ na atyu i bihu na påtti giya hita esta måtai yan i Kristo gi kilu’us, kosaki i fuetsan i i’isao na påtti giya hita u ma distrosa, ya båsta hit manisklåbun i isao.  Sa’ yanggin måtai i taotåo ennåo nai masosotta gui’ ginin i fuetsan i isao. Ya put i esta manmåtai hit yan i Kristo, ennåo na ta honggi na siempri lokkui’ manlå’la’ hit yan Guiya.  Sa’ ta tungu’ na esta mana’lå’la’ ta’lu i Kristo ginin i finatai ya ti u måtai ta’lu—ti u fanggubetna i finatai ta’lu giya Guiya. Intonsis, put i måtai Gui’, tåya’ esta fuetså-ña i isao giya Guiya; ya på’gu nai låla’la’ Gui’ gi dinanña’ yan si Yu’us. Gi etmismu manera na debidi en kunsideranmaisa hamyu kumu esta manmåtai, era gi isao na bånda, låo manlåla’la’ hamyu gi dinanña’ yan Yu’us ginin i Kristo Jesus.

                                                        I finu’ i Saina.

INEPPIN I SÅTMU                                                                           Ps 118, 1-2, 16-17, 22-23

(R)  ÅLELUIA, ÅLELUIA, ÅLELUIA

Nå’i gråsia i Saina, sa’ måolik Gui’,

 sa’ i mina’ase’-ña para todu i tiempu.

 Po’lu i gima’ Israhet ya u åluk:

” I ginefli’i’ Yu’us dinidira todu i tiempu.”

INEPPI ……

I agapa’ na kannai i Saina makåhat hulu’;

 i agapa’ na kannai i Saina manyalibåo kun fuetsa.”

 Ti bai hu måtai låo bai hu lå’la’

ya bai hu diklåra i che’chu’ i Saina.

INEPPI ……

I atchu’ ni marichåsa ni atyu siha i manmanhåhatsa

mama’un åtchu’ ni imputtånti gi gima’.

I Saina muna’macho’gui esti;

mambunitu esti siha gi matå-ta.

INEPPI ……

     C

IBANGHELIU                                                                                               Lk 24, 1-12

+  Un tinaitai ginin i santu ibangheliu sigun i tinigi’ San Lucas

Gi primet diha gi simåna, gi chatanmak, manmåttu i famalåo’an gi naftan manmañuñuli’ påopåo ni mana’listu.   Masodda’ na mana’galilik tåtti i atchu’ ni iståba gi entrådan i naftan; låo anai manhålum gi naftan, ti ma sodda’ i tataotåo i Saina as Jesus.   Mientras ma kekehassu håfa esti sa’ nina’fanlachi hinassun-ñiha, umannuk gi uriyan-ñiha dos låhi ni låmlam magagun-ñiñiha.   Manekkun påpa’ gi edda’ sa’ nina’fansen ma’å’ñao siha.  Mansinangåni ni lalåhi:  “Håfa na en ispipiha Gui’ ni låla’la’ gi entalu’ i manmåtai?   Taigui Gui’ guini; esta mana’lå’la’ Gui’ ta’lu.  Hassu ha’ håfa ilek-ña nu hamyu anai iståtaba Gui’ giya Galileha—na i Lahin i Taotåo debidi u ma’intreganñaihun guatu gi kannai i mani’isao na tåotåo, ya u maklåba, ya gi mina’tres dihas u lå’la’ ta’lu.”  Ya mahassu i sinangån-ña si Jesus.   Pues mabira siha tåtti ginin i naftan ya ma’anunsia gi Onsi na mandisipulu yan i pumalu siha.   I famalåo’an siha era si Maria Magdalena, Joanna, yan si Maria i nanan Santiago; siha yan i ottru famalåo’an lokkui’ ma sangåni i manapostulis, låo i istorian-ñiha kalang tåya’ kumeke’ilekña ya ti manmalagu’ manmanhonggi. Intonsis, kahulu’ si Pedro ya malågu guatu gi naftan.  Numehung påpa’ låo tåya’ lini’e’-ña fuera di i balutan.  Pues humånåo tåtti gi gima’ sen manman put i håfa masusedi. 

                         I Ibangheliun i Saina.