FINENE’NA NA TINAITAI Is 62, 11-12
Un tinaitai ginin i Lepblun i Prufeta as Isaias
Atan ha’ sa’ i Saina Ha pruklåma
asta i puntan i tanu’;
Sangåni i hagan Sion,
mamamaila’ i Satbadot-mu!
Ha chuchuli’ i premiu,
I premiu ni gaigi gi me’nå-ña.
U fanma’ågang mansinantusan na tåotåo,
i mana’fanlibri ni Saina,
ya hågu un mafa’na’an “Sessu Mambisita,”
un siudå ni ti madidingu.
I finu’ i Saina.
INEPPIN I SÅTMU Ps 97, 1. 6. 11-12
R. UN KÅNDIT U INA HIT PÅ’GU NA HA’ÅNI: MAFAÑÅGU I SAINA PARA HITA.
I Saina rai Gui’; sotta ya u maguf i tanu’;
sotta ya u fanmaguf i isla siha.
I langit Ha pruklåma i hustisian Yu’us;
ya todu i taotåo siha mali’i’ i gloriå-ña.
INEPPI…..
Mañila’ i kandit para i manunas;
yan minaguf para i gasgas na kurason.
Fanmaguf gi Saina, hamyu ni manunas,
yan tuna i santus na na’ån-ña.
INEPPI…..
SIGUNDU NA TINAITAI Ti 3. 4-7
Un tinaitai ginin i Kattan San Pablo para si Tito
Mangginifli’e’-hu:
Dispues di manmafa’nu’i hit ni mina’åsi’ yan ginefli’i’ Yu’us i Satbadot-ta, Guiya muna’fanlibri hit. Åhi’ ti put i guaha måolik che’cho’-ta, låo ginin i mina’ase’-ña ha’ na Ha na’fanlibri hit, ginin i Espiritu Såntu, ni numå’i hit nuebu na finañågu yan nuebu na lina’la’ anai Ha fa’gåsi hit. Si Yu’us Ha chudå’i hit misin ni Espiritu Såntu ginin as Jesukristo i Satbadot-ta, kosa ki ginin i grasiå-ña siña hit mana’fanunas yan Yu’us ya ta fanhålum gi taihinekkuk na lina’la’ ni ta nanangga.
I finu’ i Saina.
IBANGHELIU Lk 2, 15-20
ÅLELUIA Lk 2, 14
R. Åleluia. UMATUNA SI YU’US GIYA HULULU’ GI LANGIT,
PÅS PARA TODU SIHA I TAOTÅO TÅNU’ ANAI
HA SOSODDA’ SI YU’US I MINAGOF-ÑA.
R. Åleluia.
+ Un tinaitai ginin i såntu Ibangheliu sigun gi tinigi’ San Lucas
Anai mandiningu siha ni manånghit ya manhånåo guatu gi langit, ilik-ñiha i pastoris
entri siha, “Nihi ta fanmalak Bilen ya ta li’i’ håfa masusedi ni Ha sangåni hit i Saina.”
Mampinalålala i pastoris siha guatu giya Bilen ya masodda’ si Maria, si Jose yan i neni umå’assun gi sagan nengkannu’ gå’ga’. Anai mali’i’ esti, makumprendi atyu i manmasangånin-ñiha put esti na påtgun. Ya todu atyu siha i humunguk manmanman put todu atyu siha i sinangan i pastoris. Låo si Maria ha nå’na’ ha’ esti siha na sinangan ya ha kunsideran mamaisa gi kurason-ña. I pastoris mana’lu tåtti giya siha matutuna yan ma’o’onra si Yu’us put atyu siha i hininguk-ñiha yan lini’i’-ñiha, sigun i manmasangånin-ñiha.
I Ibangheliun i Saina
