FINE’NA NA TINAITAI Is 52, 7-10
Un tinaitai ginin i Lepblun i Prufeta as Isaias
I na buninitu gi hilu’ i eksu’ siha i adding atyu
siha i chumuchuli’ manmåolik na nutisia siha,
Mananununsia pås, mañuñuli’ måolik na nutisia,
mananununsia satbasion, ya ha sangångani iya Sion,
“Rai i Yi’os-mu!”
Ekkunguk! I guatdian-miyu siha manessalåo,
todu mane’essalåo gi minaguf-ñiha,
Sa’ mali’i’ direktamenti, gi me’nan i matan-ñiha,
i Saina ni humahåtsa ta’lu iya Sion.
Fangånta kumu un bos hamyu,
ni manmayulang Hirusalen.
Sa’ i Saina Ha kunsuesuela i taotåo-ña,
Ha na’lilibri iya Hirusalen.
I Saina Ha na’kesnuda i santus na kannai-ña
gi me’nan todu i nasion siha;
Todu i puntan i tanu’ siha u mali’i’
i satbasion i Yi’os-ta.
I finu’ i Saina.
INEPPIN I SÅTMU Ps 98, 1. 2-3. 3-4. 5-6
R. TODU I PUNTAN TÅNU’ SIHA ESTA MALI’I’ I SASATBA NA NINA’SIÑAN YU’US.
Kantåyi i Saina un nuebu na kånta,
sa’ esta Ha cho’gui manna’manman na fina’tinas,
i agapa’ na kannai-ña yan i santus na kodu-ña,
muna’fanggånna Gui’.
INEPPI…..
I SainaHa na’matungu’ na manggånna Gui’;
gi me’nan i nasion siha Ha na’matungu’ i sasatba na fuetsån-ña,
Esta Ha hassu na fiet i guinaiyan-ña
para i gima’ Israhet.
INEPPI…..
Todu i puntan tånu’ esta mali’i’
i satbasion ginin i Yi’os-ta.
Fangånta kun minaguf para i Saina, todu i tanu’;
kantåyi tinina yan essalåo minaguf.
INEPPI…..
Fangånta tinina para i Saina nu i håtpa,
nu i håtpa yan mambunitu na són.
I trumpeta yan i sunidun i kilu’,
fanessalåo kun minaguf gi me’nan i Rai, i Saina.
INEPPI…..
SIGUNDU NA TINAITAI Heb 1, 1-6
Un tinaitai ginin i Katta para i ManHibrehu
Hafañe’lus:
Gi manmaloffan na tiempu meggai na biåhi na Ha kuentusi si Yu’us i mañaina-ta gi difirentis manera ginin i mamprufeta, låo guini gi uttimu siha na ha’åni Ha kuentusi hit ginin i Lahi-ña. Put Guiya na Ha na’huyung si Yu’us i tanu’, Guiya inatyik as Yu’us para u iyon-ña todu i kosas gi uttimu. Guiya i ispehus anai a’annuk i mina’lak i glorian Yu’us yan Guiya ni mås ni menus i imåhin Yu’us, ni sumusteteni i tanu’ ni fuetsån-ña. Dispues di Ha gånna i ma’asi’in i isao i taotåo siha, matå’chung Gui’ gi langit gi agapa’ na båndan Yu’us, i Mås Takkilu’ na Fuetsa.
Mana’takkilo’ña i Lahi-ña ki i manånghit, taimanu ha’ i na’an ni nina’i Gui’ as Yu’us na takkilo’ña ki i na’an i manånghit siha.
Tåya’ si Yu’us nai Ha sangåni i mananghet-ña,
“Hågu i lahi-hu;
på’gu na ha’åni nai Guåhu tatå-mu.”
Ni tåya’ nai si Yu’us Ha sangåni ni unu gi manånghit,
“Guåhu para tatå-ña,
ya guiya para lahi-hu.”
Låo anai para u na’hånåo si Yu’us i primirisa na Lahi-ña para i tanu’, ilek-ña,
“Todu i manånghit Yu’us debidi Un ma’adora.”
I finu’ i Saina.
IBANGHELIU Jn 1, 1-18
ÅLELUIA
R. Åleluia. UN SINANTUSAN NA HA’ÅNI MÅTTU GIYA HITA.
FANMAMAILA’ NASION SIHA YA EN ADORA I SAINA.
PÅ’GU NA HA’ÅNI UN DÅNGKULU NA ININA MÅTTU GI TANU’.
R. Åleluia.
+ Un tinaitai ginin i såntu Ibangheliu sigun gi tinigi’ San Juan
Gi tutuhun iståba i Finihu’;
i Finihu’ iståba yan si Yu’us,
i Finihu’ si Yu’us.
Iståba Gui’ gi as Yu’us gi tutuhun.
Ginin Guiya na manmafa’tinas todu i kosas siha,
ya sin Guiya tåya’ mana’huyung.
Maseha håfa ni mafa’tinas giya Guiya, mañodda’ lina’la’,
lina’la’ para kåndit i taotåo siha.
Mani’ina i kandit gi halum homhum,
ya ti hinilat ni esti na klåsin hinemhum.
Iståba un tåotåo ni nina’hånåo as Yu’us ya i na’ån-ña si Juan,måttu kumu tistigu
para u tistiguyi i inina, kosa ki ginin guiya todu i taotåo siha u fanmanhonggi låo
hokkuk ha’ ni para u tistiguyi i inina, sa’ ti guiya mismu i inina.
I magåhit na inina ni numåna’i kåndit todu i taotåo siha para u fåttu gi tanu’.
Iståba Gui’ gi tanu’,
ya ginin Guiya na mafa’tinas i tanu’,
låo i tanu’ ti ha tungu’ håyi Gui’.
Måttu Gui’ gi taotåo-ña låo ti marisibi Gui’.
Atyu siha i umaksepta Gui’; Ha nå’i siha pudet para u famfamagu’un Yu’us.Estigui’
atyu siha i manmanhonggi gi na’ån-ña ni ti manmafañågu ginin i haga’,pat sino ginin
i minalagu’ i sensin, pat ginin i minalagu’ tåotåo, sino ki ginin i minalagu’ Yu’us.
I Finihu’ mama’tåotåo
ya sumåga gi entalo’-ta,
ya ta li’i’ i gloriå-ña:
i glorian i uniku na Lahin i Tata,
misin gråsia yan minagåhit.
Tumistigu si Juan put Guiya anai ha pruklåma, “Put Guiya esti atyu i hu sångan,
‘Atyu i para u fåttu dispues di guåhu takkilo’ña ki guahu, sa’ mo’na Gui’ ki guahu.’ “
Ginin i minisen-ña todu hit manggái patti, guinaiya tinattitiyi gi hilu’ ottru guinaiya.
Maseha ginin as Moises mågi i lai na rigålu, ginin as Jesukristo i mesngun na guinaiya.
Tåya’ lumi’i’ si Yu’us. Si Yu’us Lahi-ña, ni sumåsaga gi fi’un i Tata, muna’matungu’ Gui’.
I Ibangheliun i Saina.
