FINE’NA NA TINAITAI Is 42, 1-4 . 6-7
Un tinaitai ginin i Lepblun i Prufeta as Isaias
Taiguini ilek-ña i Saina:
I sitbintek-ku ni Hu susteteni,
i inatyek-ku ni giya guiya nai mumammaguf yu’,
Gi hilo’-ña nai Hu po’lu i espiritu-hu;
guiya chumuchuli’ i tininas para i nasion siha,
Ti umå’agang huyung, ti ume’essalåo,
ti ha na’mahuhunguk i bos-ña gi katsåda.
I malåssas na pi’ao ti para u yamak,
ya i mañiñila’ na metcha ti para u punu’,
Asta ki ha istapblesi i tininas gi tanu’;
i kantun tåsi siha u manangga i finana’gueñ-ña.
Guåhu, i Saina, esta Hu ågang håo para i tininas ni manggånna,
esta Hu go’ti i kannai-mu;
Hu fotma håo, ya Hu po’lu håo
kumu kuntråtan i taotåo,
un kåndit para i nasion siha,
Para un baba i matan i mambåtchit,
para un na’fanhuyung i presuneru siha ginin i kalabosu,
ya ginin i papa’ såtgi, atyu siha ni manggaigi gi hinemhum.
I finu’ i Saina.
INEPPIN I SÅTMU Ps 29, 1-2. 3-4. 3. 9-10
R. I SAINA U BENDISI I TAOTÅO-ÑA SIHA NI PÅS.
Nå’i i Saina, hamyu ni manlinangitan,
nå’i i Saina ni gloria yan minetgut;
Nå’i i Saina ni gloria ni direchoñ-ña i na’an Yu’us.
Adora i Saina gi santus na magagu-ña!
INEPPI…..
I bos i Saina gaigi gi hilu’ i tasi siha;
i Saina gaigi gi hilu’ i taichi’ na tåsi siha.
Minina’siña i bos i Saina;
må’gas i bos i Saina.
INEPPI…..
Huhulu i glorian Yu’us,
todu i manggaigi gi palåsyu ilik-ñiha, “Gloria!”
Matå’chung i Saina gi hilu’ i dilubiu!
Manggubetna i Saina kumu rai para todu i tiempu!
INEPPI…..
SIGUNDU NA TINAITAI Acts 10, 34-38
Un tinaitai ginin i Bidan i Manapostulis
Ha tutuhun kumuentusi siha si Pedro i MamPagånu ni esti siha na palåbra: “På’gu ha’ hu tututuhun kumumprendi na magåhit na tåya si Yu’us Ha fabureresi ni unu. Inlugåt di ennåo, si Yu’us Ha aksesepta maseha håyi na nasion tåotåo ni ma’å’ñåo nu Guiya yan måolik bidåda-ña. Estigui’ i mensåhi ni Ha nå’i i famagu’un Israhet, i Maolik na Nutisian pås ni mapruklåma ginin as Jesukristo ni Sainan todu . Gi hinassok-ku na en tingu’ ha’ håfa masåsangan gi todu iya Hudeha put si Jesus i taotåo Nasaret, ni matutuhun giya Galileha put i båotismu ni ha setmunñaihun si Juan; håfa taimanu si Yu’us na Ha olius Gui’ ni Espiritu Såntu yan pudet. Lumålåoya Ha chocho’gui manmåolik na cho’chu’ yan Ha na’fanhohomlu’ todu atyu siha i manggaigi gi papa’ i nina’siñan i aniti, ya gaigi si Yu’us giya Guiya.”
I finu’ i Saina.
A
IBANGHELIU Mt 3, 13-17
ÅLELUIA. See Mk 9, 6
R. Åleluia. MABABA I LANGIT YAN MAHUNGUK I BOS I TATA:
GUIYA ESTI I HU GOFLI’I NA LAHI-HU NI MUNA’MAMAGUF YU’.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Humånåo si Jesus ginin Galileha para Hotdån ya måttu gi as Juan para u tinakpångi. Låo si Juan ha cho’gui kuåntu i siña para u kétulaika i hinassun Jesus. Ilek-ña si Juan, “Guåhu i debidi Un takpångi ya Hågu i måttu giya guåhu!” Låo manoppi si Jesus, “Sotta ha’ fan un råtu taiguini. Ya gi taiguini nai ta kumpli i minalagu’ Yu’us.” Pues kumumfotmi si Juan. Gigun munhåyan tinakpångi as Juan, humuyung si Jesus ginin i hanum. Dispues mababa i langit ya ha li’i’ i Espiritun Yu’us gi figuran paluma tottunuk ya tumohgi gi hilo’-ña. Pues un bos oppan ginin i langit, “Guiya esti i Hu gofli’i na Lahi-hu ni muna’mamaguf Yu’.”
I Ibangheliun i Saina
