Å
FINENE’NA NA TINAITAI Acts 2, 14a . 36-41
Un tinaitai ginin i Bidan i Manapostulis
Tumohgi si Pedro yan i Onsi na manapostulis ya ha håtsa i bos-ña ya ha kuentusi i taotåo siha: “Put ennåo na, Ha na’siguru sin duda na todu i gima’ Israhet u matungu’, na si Jesus mismu ni en klaba gi kilu’us, Saina yan Misihas.”
Anai mahunguk esti mansen luhan siha. Mafaisin si Pedro yan i ottru apostulis, “Håfa para en che’gui håfañe’lus?” Manoppi si Pedro, “Debi di kada unu giya hamyu u fañotsut yan u matakpångi gi na’an Jesukristo, ya kosa ki siña ma’asi’i håo ni isåo-mu; dispues nai un risibi i nina’in i Espiritu Såntu. I prumesa mafa’tinas para hamyu yan i famagu’un-miyu, yan todu atyu siha lokkui’ i manchåchagu’ ha’ trabiha låo maninagang lokkui’ as Yu’us.” Put i para u supotta esti na testimoniu ha usa si Pedro meggai siha na atgumentu ya sigi ha’ di ha insisti, “Na’fanlibri hamyu ginin esti na hinerasion ni esta manabak.” Todu atyu siha i umaksepta i fina’na’guen-ña manmatakpångi; guaha tres mit na tåotåo mås manma’aksepta guihi na ha’åni.
I finu’ i Saina.
INEPPIN I SÅTMU Ps 23, 1-3. 3-4. 5. 6
R. (1) I SAINA I PASTOT-TU, TÅYA’ U FÅTTA GIYA GUÅHU.
I Saina i pastot-tu; tåya’ u fåtta giya guåhu.
Ha påpastu yu’ gi betdi na paståhi;
Ha kokonni’ yu’ guatu gi fi’un i mannåna’i diskånsu na hånum;
Ha na’tata’lu tåtti i fuetsåk-ku.
INEPPI…
Ha gigiha yu’ gi dinanchi na chålan put i na’ån-ña.
Achukka’ mamomokkat yu’ gi hemhum na kañåda,
tåya’ tailayi ma’å’ñåo-hu sa’ gaigi Håo gi fi’on-hu;
Un gogo’ti i galuti-mu yan i baston-mu ni numåna’i yu’ ånimu.
INEPPI…
Un plånta i lamasa gi me’nå-hu
gi me’nan i maninimigu-hu;
Un olius låña i ilu-hu;
ya i taså-hu esta machuchuda’.
INEPPI…
I minaolik ha’ yan mina’åsi’ tumattitiyi yu’
todu i lina’lå’-hu;
Ya bai hu såga gi gima’ i Saina
gi manmamamaila’ siha na såkkan.
INEPPI…
SIGUNDU NA TINAITAI 1 Pt 2, 20-25
Un tinaitai ginin i fine’na na Kattan San Pedro
Mangginifli’e’-hu:
Yanggin en singun i minaså’pit achukka’ put en che’gui i tinas, siempri mambinendisi hamyu as Yu’us put ennåo. Put esti na maninagang hamyu as Yu’us, sa’ si Jesukristo mismu mamadesi put hamyu yan mannina’i hamyu un ihemplu, kosa ki en dalalaki i fina’pos-ña.
Tåya’ Ha kumiti isao, yan ni unu guaha nai ha hunguk dinagi humuyung ginin i pachot-ña.
Anai ma’insutta, ti Ha oppi tåtti yan insuttu; anai maså’pit, ti manispånta, låo Ha po’lu i inangukkoñ-ña gi as Yu’us, i tinas na Hues. I Kristo mismu Ha kåtga i isåo-ta gi tataotåo-ña para i kilu’us, kosa ki siña hit manmåtai para i isao yan ta fanlå’la’ gi tininas. Ginin i hiridå-ña na esta mana’mågung håo. Iståba kalang kinilu hamyu ni manabak, låo på’gu esta manmakonni’ hamyu tåtti para en dalalaki i Pastot yan i Guatdian i antin-miyu.
I finu’ i Saina.
IBANGHELIU Jn 10, 1-10
ÅLELUIA Jn 10, 14
R. Åleluia. ILEK-ÑA I SAINA, GUÅHU I MAOLIK NA PASTOT;
HU TUNGU’ I GA’-HU KINILU SIHA, YA SIHA MATUNGU’ YU’.
R. Åleluia.
+ Un tinaitai ginin i såntu Ibangheliu sigun gi tinigi’ San Juan
Ilek-ña si Jesus, “Åmen, åmen, bai Hu asigura hamyu ni minagåhit: Atyu i humålum gi fangkiniluyan sin umisgin i trångka osino umisgin ottru bånda ya ha håtmi, guiya ennåo i sakki ni lumålåoya. Atyu i umisgin i trångka guiya ennåo i pastot i kinilu. I guåtdia ha bababa i trångka para guiya, ya i kinilu siha mahuhunguk i bos-ña yanggin maninagang ni na’an-ñiha ya mangkinekenni’ siha huyung. Yanggin esta ha konni’ huyung todu atyu siha i ga’-ña, mamomokkat gui’ gi sanme’nan-ñiha, ya i kinilu siha madalalalaki gui’ sa’ matungu’ i bos-ña. Ti u madalalaki un istrangheru; masuhåyi ennåo siempri, sa’ ti matungu’ i bos-ña.” Achukka’ Ha usa si Jesus esti siha na fina’akumparasion, ti makumprendi håfa mangkinekesangani siha.
Pues ennåo muna’ilek-ña nu siha ta’lu: “Åmen, åmen, bai Hu sangåni hamyu ni minagåhit:
Guåhu i trangkan i fangkiniluyan. Atyu siha i manmofo’na ki Guahu, siha ennåo i mansakki ni manlålåoya ni ti manine’esgi ni kinilu.
Guåhu i trångka. Maseha håyi ni umisgin iya Guåhu u såfu gui’. U libri humuyung-hålom,ya u fañodda’ påstu.
I sakki måfattu, hokkuk ha’ ni para u fañåkki, para u famunu’, yan para u fandistrosa, låo Guåhu måttu Yu’ kosa ki u fanggái lina’la’ ya u kabålis i lina’la’-ñiha.
I Ibangheliun i Saina.
