FINE’NA NA TINAITAI Acts 4, 8-12
Un tinaitai ginin i Bidan i Manapostulis
Bumula si Pedro ni Espiritu Såntu, ya kumuentus, “Hamyu ni manmå’gas yan manåmku’! Yanggin debidi en kuntesta på’gu put un måolik na fina’tinas ni macho’gui gi un inutit na tåotåo ya para bai in esplika taimanu na humomlu’ gui’, pues hamyu yan todu i taotåo Israhet debidi en rialisa na macho’gui esti gi na’an Jesukristo i taotåo Nasaret ni hamyu klumåba gi kilu’us ya nina’lå’la’ Gui’ as Yu’us ginin i finatai. Ginin i fuetsan ennåo na nå’an na tumotohgi esti na tåotåo gi me’nan-miyu ya kabålis i hinemlo’-ña. Guiya si Jesus i atchu’ ni marichåsa ni manmanhåhatsa ya mama’un åtchu’ ni imputtånti gi gima’. Tåya’ satbasion gi ottru nå’an, sa’ tåya’ ottru nå’an gi interu i tanu’ ni manå’i i taotåo ni siña sumåtba hit.”
I finu’ i Saina.
INEPPIN I SÅTMU Ps 118, 1. 8-9. 21-23. 26. 28. 29
R. (22) I ATCHU’ NI MARICHÅSA NI MANMANHÅHATSA
MAMA’UN IMPUTTÅNTI NA ÅTCHU’ GI GIMA’.
Na’i gråsia i Saina sa’ måolik Gui’,
sa’ i mina’ase’-ña dinidira todu i tiempu.
Måolek-ña lumihing gi Saina
ki manangoku tåotåo.
Måolek-ña lumihing gi Saina
ki manangoku gi prinsipi siha.
INEPPI…..
Bai hu nå’i Håo gråsia, sa’ Un oppi yu’
sa’ Hågu i satbadot-tu.
I atchu’ ni marichåsa ni atyu siha i manmanhåhatsa
mama’un åtchu’ ni imputtånti gi gima’.
I Saina muna’macho’gui esti;
mambunitu esti siha gi matå-ta.
INEPPI…..
U matuna Gui’ ni mamamaila’ gi na’an i Saina,
in bendisi Håo ginin i gima’ i Saina.
Bai hu nå’i Håo gråsia, sa’ Un oppi yu’
sa’ Hågu i satbadot-tu.
Nå’i gråsia i Saina sa’ måolik Gui’,
sa’ i ginefli’e’-ña dinidira todu i tiempu.
INEPPI….
SIGUNDU NA TINAITAI 1 Jn 3, 1-2
Un tinaitai ginin i fine’na na Kattan San Juan
Mangginifli’e’-hu:
Atan ha’ kuåntu chiña guinaiyan-ña si Yu’us nu hita! Tatfoi i guinaiyan-ña nu hita asta manma’å’agang hit famagu’on-ña–put ennåo na hunggan magåhit, famagu’on-ña hit. Esti i rason na i tanu’ ti ha tungu’ håyi hit: sa’ ti ha tungu’ håyi si Yu’us. Hafañe’lus, mamfamagu’un Yu’us hit på’gu, låo trabiha ti klålaru håfa para ta fanhuyung. Låo ta tungu’ na yanggin umannuk i Kristo, siempri mamparehu hit yan Guiya, sa’ siempri ta li’i’ Gui’ kumu Guiya mismu.
I finu’ i Saina.
IBANGHELIU Jn 10, 11-18
ÅLELUIA Jn 10, 14
R. Åleluia. ILEK-ÑA I SAINA, GUÅHU I MAOLIK NA PASTOT;
HU TUNGU’ I GA’-HU KINILU SIHA, YA SIHA MATUNGU’ YU’.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Ilek-ña si Jesus:
“Guåhu i maolik na pastot; i maolik na pastot Ha nå’inñañaihun i lina’lå’-ña para i ga’-ña kinilu siha. Atyu i hutnaleru–put i ti pastot gui’ ni ti ga’-ña i kinilu–anai ha li’i’ na mamamaila’ i lobu
malågu ya ha dingu i kinilu para u fanhinabbao yan u fanchinalapun ni lobu. Mina’ taiguini esti sa’ macho’cho’chu’ gui’ put åpas; tåya’ intires-ña para i kinilu. Guåhu i maolik na pastot. Hu tungu’ i ga’-hu kinilu siha ya siha matungu’ Yu’ gi parehu na manera na Ha tungu’ Yu’ i Tata ya Guåhu Hu tungu’ si Tatå-hu; ya put esti siha na kinilu na bai Hu nå’inñaihun i lina’lå’-hu. Guåha ottru siha ga’hu kinilu ni ti mañåsåonåo guini na inetnun. Debi di bai Hu konni’ siha lokkui’, ya siempri u mahunguk i bos-su. Ya siempri unu ha’ na inetnun kinilu yan unu ha’ na pastot. Ha gofli’i’ Yu’ si Tåta put esti: put i Hu nå’inñaihun i lina’lå’-hu låo para bai Hu chuli’ ha’ ta’lu tåtti. Tåya’ ni unu umåmut Yu’; sinoki Hu nå’inñaihun buluntåriamenti. Guaha fuetsåk-ku para bai Hu nå’inñaihun, yan guaha fuetsåk-ku para bai Hu chuli’ ta’lu tåtti. Hu risibi esti na tinagu’ ginin as Tatå-hu.
I Ibangheliun i Saina.
