FINE’NA NA TINAITAI 1 Sm 16, 1b. 6-7. 10-13a
Un tinaitai ginin i primet na Lepblun Samuel
Ilek-ña i Saina as Samuel: “Na’bula låña i kanghilung, ya un sigi gi hinanåo-mu. Bai Hu tågu’ håo guatu gi as Jesse giya Belen, sa’ esta Hu atyik i rai-hu gi entalu’ i lalahi-ña siha.”
Anai manmåttu si Jesse yan i lalahi-ña siha gi sakrifisiu, ha atan si Samuel si Eliab ya manhassu, “Esta siguru na atyu i Ha utdena i Saina gaigi guini gi me’nå-ña.” Låo ilek-ña i Saina as Samuel: “Mungnga mahusga ginin i hichuran i tatåotåo-ña pat ginin i linekkå’-ña, sa’ esta Hu richåsa gui’. Ti manlili’i’ si Yu’us taiguihi i lini’i’ tåotåo, sa’ i taotåo ha lili’i’ i håfa a’anuk låo si Yu’us Ha a’atan hålum i kurason.” Gi etmismu manera si Jesse ha prisenta i sietti na lalahi-ña gi me’nan Samuel, låo ilek-ña si Samuel as Jesse, “Tåya’ inatyek-ña i Saina ginin esti siha.” Dispues finaisin si Jesse as Samuel, “Kåo esti ha’ famagu’on-mu lalåhi?” Manoppi si Jesse, “Guaha ha’ ta’lu, i mås påtgun, ha pupulan i kinilu.” Ilek-ña si Samuel as Jesse, “Na’ma’ågang gui’; ti ta tutuhun i silebrasion i sakrifisiu astaki måttu gui’.” Manågu’ si Jesse ya ha na’makonni’ i hebin na låhi guatu gi entri siha. Atagga’ fasu-ña, un hobin ni bunitu ma’atan yan gåtbu kuetpon-ña. Ilek-ña i Saina, “Ennagui’ – utdena, sa’ guiya esti!” Intonsis ha chuli’ i kanghilung låña si Samuel ya ha utdena gui’ gi entalu’ i mañe’lu-ña; ya desdi ennåo na ha’åni hinatmi si David ni espiritun i Saina.
I finu’ i Saina.
INEPPIN I SÅTMU Ps 23, 1-3. 3-4. 5. 6
R. (l) I SAINA I PASTOT-TU, TÅYA’ U FÅTTA GIYA GUÅHU.
I Saina i pastot-tu; tåya’ u fåtta giya guåhu.
Ha påpastu yu’ gi betdi na paståhi;
Ha kokonni’ yu’ guatu gi fi’un i mannåna’i diskånsu na hånum;
Ha na’tata’lu tåtti i fuetsåk-ku.
INEPPI…..
Ha gigiha yu’ gi dinanchi na chålan put i na’ån-ña.
Achukka’ mamomokkat yu’ gi hemhum na kañåda,
tåya’ tailayi ma’a’ñåo-hu sa’ gaigi Håo gi fi’on-hu;
Un gogo’ti i galuti-mu yan i baston-mu ni numåna’i yu’ ånimu.
INEPPI…..
Un plånta i lamasa gi me’nå-hu
gi me’nan i maninimigu-hu;
Un olius låña i ilu-hu;
ya i taså-hu esta machuchuda’.
INEPPI…..
I minaolik ha’ yan mina’åsi’ tumattitiyi yu’
todu i lina’lå’-hu;
Ya bai hu såga gi gima’ i Saina
gi manmamamaila’ siha na såkkan.
INEPPI…..
SIGUNDU NA TINAITAI Eph 5, 8-14
Un tinaitai ginin i kattan San Pablo para i taotåo Ephesus
Hafañe’lus: Maniståba hamyu gi halum homhum, låo desdi ki manhålum hamyu manåotåo i Saina, manggaigi hamyu på’gu gi halum i inina. Pues debi di en fanlå’la’ taiguihi i taotåo siha ni manggaigi gi halum i inina, sa’ i inina muna’fåfattu bula na kusetchan todu klåsin minaolik, tininas, yan minagåhit. Che’gui kuåntu i siña para en tingu’ håfa muna’mamaguf i Saina. Suhåyi todu i manaibali na chocho’ hinemhum; inlugåt di esti, laknus huyung gi inina, sa’ sen na’mamahlåo achukka’ para mamensiona atyu i machocho’gui gi sikretu; ya yanggin manmalaknus huyung todu gi papa’ i inina, pues siempri annuk klåru i magåhit na naturåt-ñiha; sa’ maseha håfa ni mana’annuk klåru gi papa’ i inina pues ennåo siempri humuyung inina.
Put ennåo na masångan na,
“Fakmåta, hågu ni mamaigu’,
ya kahulu’ ginin i finatai,
ya siempri manina i Kristo giya hågu.”
I finu’ i Saina.
IBANGHELIU Jn 9, 1-41
(Todus) U matuna Håo, Asaina Jesukristo, Rai i taihinekuk na gloria!
(Tetcha) Ilek-ña i Saina, Guåhu i ininan i tanu’:
I taotåo ni dumalalalaki Yu’ u manå’i ni ininan i taihinekuk na lina’la’.
+ Un tinaitai ginin i såntu Ibangheliu sigun gi tinigi’ San Juan
Mientras mamomokat mo’na si Jesus, Ha li’i’ un tåotåo ni batchit desdi i mafañagu-ña.
Mafaisin Gui’ ni mandisipulu-ña,
“Rabbi, håyi umisåo na mafañågu gui’ båtchit? Kåo isåo-ña ha’ pat isao i mañaina-ña?”
Manoppi si Jesus,
“Ni unu, ni ottru, ti put i isåo-ña osino i isao i mañaina-ña. Låo put i para u mali’i’ fuetsan Yu’us giya guiya, debi di ta cho’gui i che’chu’ atyu i muna’hånåo Yu’ mientras mananana.
Mamamaila’ i puengi anai tåya’ siña macho’chu’. Mientras gagaigi Yu’ gi tånu’, Guåhu i kandit i tanu’.”
Gi esti tumo’la si Jesus gi edda’, ya mama’tinas fachi’ ni te’la’-ña,
ya Ha palala’i i matan i taotåo ni fachi’.
Dispues Ha sangåni gui’, “Hånåo ya un fa’gåsi håo gi hanum Siloam.”
(Esti na nå’an kumeke’ilek-ña “atyu i mana’hånåo”.)
Intonsis, humånåo i taotåo ya ha fa’gåsi gui’, ya måttu tåtti siña esta manli’i’.
I bisinu-ña yan i taotåo siha ni mampåyun mali’i’ gui’ ume’egagåo manmamaisin,
“Ada ti guiya esti, atyu i sessu matå’chung ya ume’egagåo?”
Guaha siha umå’aluk, “Hunggan guiya”;
ottru siha ma’åluk na, “Åhi’ ti guiya sinoki ottru tåotåo ni uma’achuli’ yan guiya.”
I taotåo mismu umåluk, “Hunggan guåhu atyu.”
Intonsis mafaisin gui’, “Håfa taimanu na siña håo på’gu manli’i’?”
Manoppi gui’,
“Atyu na tåotåo i ma’å’agang Jesus mama’tinas dididi’ fachi’, ya Ha palala’i i atadok-ku,
ya Ha tågu’ yu’ para bai hu hånåo para Siloam ya bai hu fa’gåsi.
Pues humånåo yu’, ya gigun ha’ hu fa’gåsi, sumiña yu’ manli’i’.”
Mafaisin i taotåo, “Månggi Gui’?
Manoppi, “Ti hu tungu’.”
Dispues, makonni’ i taotåo ni ginin båtchit desdi i mafañagu-ña guatu gi MamFarisehu. (Ha hassu na era i Sabaf na ha’åni anai mama’tinas fachi’ si Jesus ya Ha na’fanli’i’ i taotåo.) Intonsis, i MamFarisehu matutuhun mafaisin gui’ håfa taimanu na manli”i’ gui’ ta’lu’.
Mansinangåni siha,
“Ha nå’yi fachi’ i atadok-ku. Hu fa’gåsi, ya på’gu siña yu’ manli’i’.”
Esti sumu’un i MamFarisehu para u masångan,
“Ti siña na ginin as Yu’us mågi esti na tåotåo sa’ ti ha guåguatdia i Sabaf na ha’åni.”
I ottru siha makontra esti,
“Yanggin i’isåo i taotåo, håfa taimanu para cho’guen-ña ni esti siha na siñåt?” Put ennåo na gumuaha dinibidi gi entalu’-ñiha.
Pues makuentusi i batchit ta’lu:
“Yå ki binaba i atadok-mu ni esti na tåotåo, håfa siña un sångan put Guiya?”
Manoppi, “Prufeta Gui’.”
Ti manmalagu’ i ManHudihos mahonggi na ginin båtchit gui’ ya på’gu siña manli’i’, asta ki ma’ågang i mañainan esti na tåotåo ni på’gu siña manli’i’.
Mafaisin siha,
“Kåo lahin-miyu esti, ya yanggin hunggan, kåo manhula hamyu na mafañågu gui’ båtchit? Ya håfa siña en sangan put taimanu na siña gui’ manli”i’ på’gu?”
Manoppi i mañaina-ña:
“Hami tumungu’ na lahin-måmi gui’, yan in tingu’ na mafañågu gui’ båtchit. Låo ti in tingu’ håfa taimanu na siña gui’ manli”i’ på’gu, ni ti in tingu’ håyi muna’mågung i bachet-ña.
Faisin gui’. Esta gui’ gái idåt, ya siña ha’ gui’ manoppi. (“Masångan taiguini ni mañaina-ña sa’ manma’å’ñåo siha ni ManHudihos, sa’ esta manguntråta na maseha håyi sumångan na manhonggi gui’ na Guiya i Kristo, u madulalak ginin i sinagoga. Put ennåo na ilik-ñiha i mañaina-ña, “Esta gui’ gái idåt, faisin gui’.”)
Ma’ågang ta’lu tåtti put sigundu biåhi i taotåo ni batchit desdi i mafañagu-ña ya ilik-ñiha nu guiya,
“Nå’i gloria si Yu’us! Fine’na, put i in tingu’ na i’isåo esti na tåotåo i muna’fanli’i’ håo.”
Manoppi i taotåo,
“Ti hu tungu’ kåo i’isåo Gui’ pat åhi’.
Una kosa hu tungu’: iståba båtchit yu’, ya på’gu manlili’i’ yu’.”
Mafaisin gui’ di nuebu,
“Håfa bidå-ña nu hågu. Håfa taimanu na nina’fanli’i’ håo ta’lu?”
Manoppi i taotåo,
“Esta munhåyan hu sangåni hamyu, ya ti manmalagu’ hamyu manékkunguk.
Sa’ håfa na manmalagu’ hamyu na en hinguk ta’lu?
Buenti hamyu lokkui’ manmalagu’ manhålum mandisipulu-ña?”
Ma’insutta gui’ yan ilik-ñiha,
“Hågu disipulun ennåo na tåotåo, låo hami mandisipulun Moises.
In tingu’ na si Yu’us Ha kuentusi si Moises; låo ni ti in tingu’ ginin manu mågi ennåo na tåotåo!”
Manineppi siha,
“Gof na’manman esti! Ti en tingu’ ginin manu Gui’ mågi, låo Ha na’fanli’i’ yu’ ta’lu!
Ta tungu’ ha’ na si Yu’us ti Ha e’ékkunguk i mani’isåo siha;
låo Ha e’ékkunguk i taotåo siha ni rumispepeta Gui’ yan chumocho’gui håfa malago’-ña.
Tåya’ nai mahunguk na un tåotåo u na’fanli’i’ un båtchit desdi i mafañagu-ña. Yanggin ti ginin as Yu’us esti na tåotåo, tåya’ ni håfa siña ha cho’gui.”
Manessalåo siha,
“Ha? Tåddung na isao nai gaigi håo desdi i mafañagu-mu,
ya hågu para un setmuni ham?”
Ennåo mina’mago’ti gui’ ya madåggåoñaihun huyung.
Anai Ha hunguk si Jesus na madulalak gui’ huyung, Ha ispiha gui’ ya Ha faisin,
“Kåo manhonggi håo gi Lahin i Taotåo?”
Manoppi ya ilek-ña,
“Siñot, håyi ennåo, kosaki bai hu fanhonggi nu Guiya?”
Manoppi si Jesus,
“Esta un li’i’ Gui’. Guiya i kumuentutusi håo på’gu’.”
Ilek-ña,
“Hunggan manhonggi yu’ Asaina,” ya ha na’tekkun i ilu-ña påpa’ para u adora Gui’.
Pues ilek-ña si Jesus.
“Måttu Yu’ guini na tånu’ para bai fanhusga,
para bai Hu na’fanmanli’i’ i mambåtchit
ya i manmanlili’i’ u fambåtchit.”
Guaha unus kuåntus MamFarisehu maniståba guennåo yan Guiya ya mahunguk na Ha sångan esti ya mafaisin Gui’,
“Siguru na ti kumeke’ilek-mu na mambåtchit ham lokkui’?”
Manoppi si Jesus:
“Yanggin mambåtchit hamyu
pues tåya’ isao guennåo.
Låo ilik-miyu, ‘Manmanlili’i’ ha’ ham,’
pues gagaigi ha’ i isao-miyu.”
I Ibangheliun i Saina.
