B
FINENI’NA NA TINAITAI 2 Sm 7, 1-5. 8b-12. 14a. 16
Un tinaitai ginin i sigundu na Lepblun Samuel
Anai sumåga i Rai as David gi palasyoñ-ña, ya i Saina nina’libri gui’ ginin i inimigu-ña ginin todu i bånda, ilek-ña nu i prufeta as Nathan, “Estigi’ na sumåsaga yu’ gi un guma’ ni mafa’tinas ginin i ‘cedar’ na tåpbla låo i Atkan Aliånsan Yu’us gaigi gi palapåla!” Ha oppi si Nathan i rai, “Hånåo ya un cho’gui håfa gaigi gi hinassom-mu, sa’ gaigi i Saina giya hågu.” Låo atyu na puengi kinuentusi si Nathan nu i Saina ya ilek-ña: “Hånåo ya un sångani i tentago’-hu as David, ‘Ilek-ña i Saina: Kåo para hågu un hatsåyi Yu’ un guma’ nai para bai såga?
” ‘Guåhu kumonni’ håo ginin i paståhi anai iståba håo un asisisti i kinilu para un gubetna i taotåo Israhet. Gagaigi Yu’ giya hågu maseha månu hinanåo-mu, yan Hu distrosa i maninimigu-mu gi me’nan i matå-mu. Ya Guåhu bai Hu na’matungu’ håo gi todu i tanu’ taiguihi i manakkilu’ siha na tåotåo. Bai Hu pripåra un lugåt para i taotåo-hu siha Israilitas; bai Hu plånta siha kosa ki siña mañåga gi sagan-ñiha sin u fanma’istotba. Ni ti u faninatåka lokkui’ ni manailayi taiguihi i bidan-ñiha gi antigu na tiempu, anai manapunta Yu’ hues fine’na na biåhi para i taotåo-miyu. Bai Hu nå’i håo diskånsu ginin todu i maninimigu-mu siha. I Saina lokkui’ mansinangåni hamyu na para en fannina’i famagu’un-miyu. Yanggin måttu i tiempun-miyu ya manmahåfut hamyu yan i mañainan-miyu, bai Hu håtsa hulu’ unu gi lahin-miyu ya bai Hu na’fitmi i rainoñ-ña. Guåhu bai Hu Tåta para guiya ya guiya u lahi-hu gui’. I famagu’un-miyu yan i rainun-miyu para u sisigi ha’ para todu i tiempu gi me’nå-hu; i tronun-miyu para u fanachu fitmi para todu i tiempu.'”
I finu’ i Saina.
INEPPIN I SÅTMU Ps 89, 2-3. 4-5. 27. 29
R. (2) BAI HU KÅNTA I MINAOLIK I SAINA TODU I TIEMPU.
Bai hu kånta todu i tiempu i fabot ni ginin i Saina,
bai hu pruklåma na fiet Håo para todu i hinerasion siha.
Sa’ esta ilek-mu, “I guinaiyak-ku esta ma’istapblesi para todu i tiempu;
esta Un kumfitma gi langit na fiet Håo.
INEPPI….
Mama’tinas Yu’ kuntråta yan i maninatyek-ku na tåotåo;
Esta manhula Yu’ gi as David i tentago’-hu:
Bai Hu na’tachu tinattem-mu para todu i tiempu
yan bai Hu istapblesi i tronu-mu para todu i hinerasion siha.”
INEPPI…..
Siempri ha ågang Yu’, Hågu, Tatå-hu,
i Yi’os-su, i Atcho’-hu, ni muna’fanggånna yu’!
Bai Hu guiaya gui’ todu i tiempu;
ya i kuntratå-hu yan guiya u tachu fitmi.
INEPPI…..
SIGUNDU NA TINAITAI Rom 16, 25-27
Un tinaitai ginin i Kattan San Pablo para i taotåo Roma
Hafañe’lus:
Nihi ya ta tuna si Yu’us! Ha na’siña muna’fanohgi hamyu fitmi gi hinenggi, sigun gi Maolik na Nutisia ni hu setmunñaihun put si Jesukristo yan put atyu i mana’matungu’ na sikretu na minagåhit ni åpmam di manå’na’ gi manmaloffan na tiempu. Låo på’gu esta esti na minagåhit mana’annuk ginin i tinigi’ i mamprufeta; yan ginin i otdin i taihinekkuk na Yu’us mana’matungu’ gi todu i nasion, kosa ki todu u fanmanhonggi yan u fanmanosgi. Para i uniku na Yu’us ni Guiya i mås tomtum, Guiya u matuna ginin as Jesukristo para todu i tiempu! Åmen.
I finu’ i Saina.
IBANGHELIU Lk 1, 26-38
ÅLELUIA Lk 1, 38
R. Åleluia. GUÅHU I TENTÅGU’ I SAINA;
PUEDI U MACHO’GUI I MINALAGO’-ÑA GIYA GUÅHU.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
I anghit as Gabriel nina’hånåo as Yu’us guatu gi un songsung giya Galileha ni mafa’nana’an Nasaret, para un bithen ni para u assagua yan un låhi ni na’ån-ña si Jose, ginin i gima’ David. Maria na’ån-ña esti na bithen. Måttu i anghit giya guiya ya ilek-ña, “Na’maguf håo, O sen matuna na finañågu. Matuna håo entri todu i famalåo’an.” Gof inistotba si Maria ni sinangan i anghit, ya nina’manman håfa esti siha na palåbra kumeke’ilek-ña. Sinangåni ni anghit, “Cha’-mu ma’å’a’ñåo, Maria, sa’ sen måolik si Yu’us nu hågu.
Siempri mapotgi’ håo ya un fañågu un påtgun låhi, ya un fa’na’an Gui’ Jesus. U takkilu’ Gui’ ya u ma’ågang Lahin i Mås Takkilu’. I Saina as Yu’us u nina’i Gui’ ni tronun David, i tatå-ña. Ya u rai Gui’ para i famagu’un Jacob para todu i tiempu ya i rainon-ña u tai finakpu’.” Ilek-ña si Maria nu i anghit, “Taimanu para u masusedi esti sa’ tåya’ tåotåo pumapatcha yu’?” Manoppi i anghit, “I Espiritu Såntu u tunuk påpa’ gi hilo’-mu, ya i fuetsan i Todu Ha Na’siña un tinampi; put esti na rason i santus na påtgun u ma’ågang Lahin Yu’us. Hahassu i parintes-mu as Isabel. Masångan na ti siña gui’ gumai patgun; låo esta sais mesis mapotgi’, achukka’ sen amku’ gui’. Sa’ para si Yu’us tåya’ ti Ha na’siña.” Ilek-ña si Maria, “Guåhu i tentågu’ i Saina. U macho’gui giya guåhu taimanu ha’ i sinangån-mu.” Pues diningu gui’ ni anghit.
I Ibangheliun i Saina.
