FINENE’NA NA TINAITAI Mi 5, 1-4a
Un tinaitai ginin i Lepblun i Prufeta as Micah
Taiguini ilek-ña i Saina:
Hågu, iya Belen-Ephrathah
mampus dikiki’ para un såonåo gi rasan Hudah,
Ginin hagu nai para u huyung para Guåhu
unu ni para u ma’gåsi iya Israhet;
Guiya ni tutuhon-ña desdi åntis na tiempu,
desdi i antigu na tiempu siha.
Pues put ennåo na i Saina u fansinetta asta atyu na tiempu
anai atyu i para u fañågu u funhåyan mañågu,
Yan i pumalu siha na mañe’lu-ña u mabira siha tåtti
para i famagu’un Israhet.
U tohgi fitmi ya u påstu i ga’-ña siha
ginin i minetgut i Saina,
gi mina’gas i na’an i Saina, i Yi’os-ña;
Ya u fañåga taiguennao,
sa’ pågu nai i mina’gås-ña u fåttu gi puntan tånu’;
guiya para pås gui’.
I finu’ i Saina.
INEPPIN I SÅTMU Ps 80, 2-3. 15-16. 18-19
R. ASAINA, BIRA HAM GUATU GIYA HÅGU,
NA’LI’I’ HAM NI MATÅ-MU YA IN FANMASÅTBA.
O Pastot Israhet, ékkunguk,
ginin i tronu-mu gi hilu’ i kerubin na’annuk Håo
Yalibåo i fuetsåm-mu,
fåttu ya Un såtba ham.
INEPPI…..
Bira Håo ta’lu, Asainan i ihetsitu siha;
talakpapa’ ginin i langit ya Un li’i’;
Atendi esti na tinanum,
yan prutehi håfa tinanom-ña i agapa’-mu,
i lahin i taotåo ni Hågu mismu muna’metgut.
INEPPI…..
Puedi i ayudu-mu u gaigi gi taotåo gi agapa’-mu,
sumisiha yan i lahin i taotåo ni Hågu mismu muna’metgut.
Pues ennåo na ni nungka ta’lu nai in fañuha ginin Hagu;
nå’i ham nuebu na lina’la’, ya bai in agang i na’ån-mu.
INEPPI…..
SIGUNDU NA TINAITAI Heb 10, 5-10
Un tinaitai ginin i Katta para i ManHibrehu
Hafañe’lus:
Put esti na rason na anai esta ha’ para u fåttu i Kristo gi tånu’, ilek-ña as Yu’us:
“Ti sakrifisiu yan inifresi siha malago’-mu
låo un tåtaotåo ni Un pripåra para Guåhu.
Ti nina’maguf Håo ni ga’ga’ siha ni manmasonggi interu gi attat
osino i sakrifisiu ni para u funas i isao siha.
Dispues ilek-ku, ‘Estigui’ Yu’,
para bai Hu cho’gui i pinto’-mu, O Yu’us,
taimanu ha’ na matugi’ put Guåhu gi lepblun i Lai.’ “
Fine’na ilek-ña, “Ti ya-mu yan ni ti nina’mamaguf håo ni sakrifisiu yan inifresi siha patsino i ga’ga’ ni manmasonggi gi hilu’ i attat yan i sakrifisiu siha ni para u funas i isao siha.” Maseha todu i sakrifisiu manma’ufreresi sigun gi Lai. Dispues ilek-ña, “Estigui’ Yu’, O Yu’us, para bai Hu cho’gui i pinto’-mu. ” Pues ennåo na Ha na’tinahgui si Yu’us todu i sakrifisiu siha ni sakrifisiun i Kristo. Ya put i Ha cho’gui i Kristo håfa malago’-ña si Yu’us, ennåo na mana’fanggåsgas hit ginin i isao ginin i inifresi ni Ha cho’gui gi tataotåo-ña put una bes.
I finu’ i Saina.
IBANGHELIU Lk 1, 39-45
ÅLELUIA Lk 1, 38
R. Åleluia. GUÅHU I TENTÅGU’ I SAINA:
I MINALAGO’-ÑA U MACHO’GUI GIYA GUÅHU.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Chumaddik si Maria guatu gi sengsung giya Hudeha ni gaigi gi eksu’. Humålum gi gima’ Zechariah ya ilek-ña as Isabel, “Håfa dai che’lu-hu.” Anai hininguk i bos-ña as Isabel manggaloppi i patgun gi halum tiyån-ña. Inina si Isabel ni Espiritu Såntu ya kumuentus á’gagang, “Matuna håo entri todu i famalåo’an! Matuna i patgun ni para un fañågu! Håfa i rason na u fåttu giya guåhu esti na dångkulun onru, na i nanan i Saina-hu u fåttu mågi para u bisita yu’? Gigun hu hunguk i bos-mu, manggaloppi i patgun gi halum tiyån-hu ni minagof-ña. U matuna håo sa’ un honggi na u makumpli giya hågu i sinangan i Saina.”
I Ibangheliun i Saina.
