FINE’NE’NA NA TINAITAI Dt 18, 15-20
Un tinaitai ginin i Lepblun Deuteronomy
Ha kuentusi si Moises i taotåo siha, ilelek-ña: “I Saina, i Yi’us-miyu, para u kåhat hulu’ un prufeta parehu yan guåhu ginin i entalu’ i parentis-miyu; guiya para en ékkunguk. Guiya esti mismu atyu i finaisin-miyu ni Saina, i Yi’us-miyu, giya Horeb guihi na ha’åni anai manetnun hamyu, anai ilik-miyu, ‘Mungnga hit humunguk ta’lu i bos i Saina, i Yi’os-ta, osino para ta li’i’ esti na dångkulun guåfi ta’lu, sa’ siña ha’ manmåtai hit.’ Ya ilek-ña i Saina nu guåhu, ‘Måolik esti na sinangan. Bai Hu kåhat hulu’ un prufeta para siha ni parehu yan hågu ginin i entalu’ i parentis-ñiha, ya bai Hu po’lu i palabrås-su gi pachot-ña; guiya para u fansinangåni siha ni todu i Hu tågu’ gui’. Yanggin guaha tåotåo ti malagu’ ha ékkunguk i palabrås-su ni ha såsangan gi na’ån-hu, guåhu mismu bai hu gågåo gui’ kuenta put ennåo. Låo yanggin i prufeta ha usa i na’ån-hu sin i petmisu-hu ya mama’tinas profesiha ni ti hu tågu’ gui’, osino para u kuentus gi na’an ottru yu’us siha, guiya siempri u måtai.’ ”
I finu’ i Saina.
INEPPIN I SÅTMU Ps 95, 1-2. 6-7. 7-9
R. (8) YANGGIN EN HINGUK I BOS-ÑA PÅ’GU NA HA’ÅNI,
CHA’-MIYU MUNA’FANMAHEHETUK I KURASON-MIYU.
Fanmamaila’, nihi ya ta fanmaguf kumantåyi i Saina;
nihi ya ta onra i atchu’ i satbasion-ta.
Maila’ ya ta taggam Gui’ ni kantan minaguf,
nihi ya ta fanmaguf mangånta såtmu para Guiya.
INEPPI…..
Fanhålum ya ta fanmañaluda ya ta fanmanadora;
maila’ ya ta fandimu gi me’nan i Saina ni fuma’tinas hit.
Sa’ Guiya i Yi’os-ta,
ya hita i taotåo-ña ni Ha påpastu, i inetnun ni Ha gigiha.
INEPPI…..
Ai, ya på’gu na ha’åni nai en hinguk i bos-ña:
“Cha’-miyu muna’fanmahehetuk i kurason-miyu
taiguihi anai maniståba hamyu giya ‘Meribah’,
taiguihi i tiempun ‘Massah’ gi disiettu,
guihi anai matenta Yu’ ni mañainan-miyu;
machagi Yu’ achukka’ esta mali’i’ i che’cho’-hu siha.”
INEPPI…..
SIGUNDU NA TINAITAI 1 Cor 7, 32-35
Un tinaitai ginin i fine’na na kattan San Pablo para i taotåo Corinth
Hafañe’lus:
Ti ya-hu na en fanggái atburotu. I sutteru ha chocho’gui i che’chu’ i Saina, sa’ ha chocho’gui kuåntu i siña para u na’mamaguf i Saina. Låo i kassåo na låhi chachathinassu ni kosas esti na tånu’, sa’ malagu’ gui’ muna’maguf i asaguå-ña; ya hinahala gui’ ambus bånda. I suttera osino i bithen ha chocho’gui i che’chu’ i Saina, sa’ malagu’ na u kunsågra i tataotåo-ña yan i esperitu-ña; låo i kasáo na palåo’an chachathinassu ni kosas esti na tånu’, sa’ malagu’ muna’maguf i asaguå-ña. Hu såsangan esti sa’ malagu’ yu’ umayuda hamyu. Åhi’ ti hu keke’utut i minalagu’-miyu. Inlugåt di esti, malagu’ yu’ na en che’gui i tinas yan dinanchi, ya para en na’in maisa hamyu kabålis gi setbisiun i Saina.
I finu’ i Saina.
IBANGHELIU Mk 1, 21-28
ÅLELUIA (Mat 4.16)
R. Åleluia. I TAOTÅO NI MANGGAIGI GI HINEMHUM U FANMANLI’I’ UN DÅNGKULU NA KÅNDIT; U FANININA UN MA’LAK KÅNDIT ATYU SIHA NA TÅOTÅO I MAÑÅSAGA GI HEMHUM NA TÅNU’ FINATAI.
R. Åleluia.
+ Un tinaitai ginin i såntu Ibangheliu sigun gi tinigi’ San Marcos
Manhånåo si Jesus yan mandisipulu-ña para ‘Capernaum’. Humålum si Jesus gi sinagoga gi Sabaf na ha’åni ya Ha tutuhun mama’nå’gui. Nina’fanmanman i taotåo siha ni fina’na’guen-ña sa’ mama’nå’na’gui kun åoturidåt ya ti parehu Gui’ yanggin mama’nå’gui yan i eskribas siha.
Måttu un tåotåo gi sinagogan-ñiha ni gái applacha’ na espiritu ni gumigigik, “Jesus, tåotåo Nasaret, håfa malago’-mu nu hami? Kåo måttu Håo para Un distrosa ham? Hu tungu’ na Hågu i Sinantusan ginin as Yu’us!” Inetdin gui’ as Jesus, “Famatkilu! Huyung ginin ennåo na tåotåo!”
Anai Ha sångan esti, i applacha’ na espiritu ha na’fañåggui’ duru i taotåo ya humuyung ginin i taotåo ya gumigigik a’gang. Todu i manmana’atan nina’fanmanman. Ya matutuhun manáfaisin entri siha, “Håfa esti kumeke’ilekña? Gof nuebu na fina’nå’gui esti kun åoturidåt! Ha o’otdin i manapplacha’ na espiritu siha ya ma’o’osgi Gui’!” Desdi ennåo na tiempu chaddik machalapun i maolik na na’ån-ña gi todu i uriyan Galileha.
I Ibangheliun i Saina.
