FINE’NA NA TINAITAI Jer 1, 4-5. 17-19
Un tinaitai ginin i Lepblun i Prufeta as Jeremiah
Gi tiempun Josiah måttu i finu’ i Saina giya guåhu:
Åntis di Hu fotma håo gi tiyan nanå-mu esta Hu tungu’ håo,
åntis di un mafañågu esta Hu kunsågra håo.
Hu apunta håo para prufetan i nasion siha.
Kahulu’ ya un minagågu;
tohgi ya un sangåni siha
ni Hu tågu’ håo.
Cha’-mu ma’å’añao nu siha,
sa’ siempri Guåhu bai Hu na’ma’å’ñåo håo nu siha;
Sa’ Guåhu mismu på’gu na ha’åni
esta Hu fa’siudå håo ni manå’yi åtmas,
Un haligin luluk, un lugan bronsi,
kontra todu i tanu’ siha:
Kontra i manrai yan mamprinsipin Hudah,
kontra i mamale’-ña yan i taotåo-ña siha.
Siempri manmumu kontra hamyu, låo ti en fanmagånna,
sa’ gaigi Yu’ giya hamyu para bai Hu na’fanlibri hamyu,
ilek-ña i Saina.
I finu’ i Saina.
INEPPIN I SÅTMU Ps 71, 1-2. 3-4. 5-6. 15.17
R. BAI HU KANTÅYI I INADAHI-MU NU HAMI.
Giya Hågu, Asaina, nai lumilihing yu’;
nungka nai un sedi na bai hu mana’mamåhlåo.
Akudi yu’ ginin i tininås-mu yan na’såfu yu’;
na’talak magi i talanga-mu, ya un såtba yu’.
INEPPI…..
Fa’atcho’-hu Håo anai uma’attuk yu’,
Un sagan lumihing ni muna’såsafu yu’,
sa’ Hågu i atcho’-hu yan i fanliheng-hu.
Yu’os-su, na’libri yu’ ginin i kannai i manailayi.
INEPPI…..
Sa’ Hågu i inangukkok-ku, Asaina;
O Yu’us, Hågu i inangukkok-ku desdi i pinatgon-hu.
Giya Hågu nai hu dipependi yu’ desdi i mafañagu-hu;
desdi i tiyan nanå-hu Hågu i minetgot-tu.
INEPPI…..
I pachot-tu u diniklåra i tininås-mu,
yan i satbasion-mu kada diha.
O Yu’us, un fa’nå’gui yu’ desdi i pinatgon-hu,
ya asta på’gu hu pruklålama i manna’manman na
che’cho’-mu.
INEPPI…..
SIGUNDU NA TINAITAI 1 Cor 12, 31-13, 13
Un tinaitai ginin i fine’na na Kattan San Pablo para i taotåo Corinth
Hafañe’lus:
Intonsis, na’fañettun i kurason-miyu gi atyu i mås manimputtånti na rigålu siha. Låo diseha i mås måolik na rigålu, ya bai hu fa’nu’i hamyu ni mås manmåolik.
Yanggin siakåsu na siña yu’ kumuentus ni lingguåhin todu i taotåo yan kuntodu i lingguåhin manånghit, låo yanggin tåya’ ginefli’i’ giya guåhu, tåya’ baliña i kuentos-su, kalang ha’ yu’ un burukentu na palångpang osino un kampåna ni dumådandan sin pinto’-ña. Yanggin siakåsu na manå’i yu’ ni rigålun prufisiha; yanggin siakåsu na hu tugi’ yan hu kumprendi todu i sikretu; yanggin siakåsu na manå’i yu’ ni todu i hinenggi ni manisisita para bai hu muebi i eksu’ sabåna siha–låo yanggin tåya’ ginefli’i’ giya guåhu, tåya’ bali-hu. Yanggin siakåsu hu nå’inñaihun todu i guinaha-hu, yan hu nå’inñaihun i tataotåo-hu para u masonggi–låo yanggin tåya’ ginefli’i’ giya guåhu, tåya’ baliña esti siha para guåhu.
I ginefli’i’, pasensia yan kariñosu; ti hohosguan ti banidosu; i ginefli’i’, ti benggatibu, ti ambientu, ti chaddik lalålu’; i ginefli’i’ ti ha tutufung i linachi siha; i ginefli’i’ ti mumamaguf gi tailayi, låo mumamaguf gi minagåhit. I ginefli’i’ ti hohokkuk siningon-ña; ya i hinenggen-ña, i inangukkon-ña yan i pinasensiån-ña ni nungka nai u påra. I ginefli’i’ taihinekkuk. Guaha bensiyun na prufisiha låo tempuråriu ha’ esti siha; guaha siha rigålu para kumuentus gi istrangheru na lingguåhi, lao siempri u famåra; guaha siha tiningu’ låo siempri u få’pus. I rigålun tiningu’ yan prufisiha ni manmanå’i hit ti kabålis; låo yanggin måttu atyu i prifektu, siempri atyu i ti kabålis u falingu. Anai påpatgun yu’, i kuentos-su, yan i sinientek-ku, yan i hinassok-ku todu kalang påtgun; låo på’gu sa’ esta gai idåt yu’, ti hu nisisita esta esti i che’chu’ påtgun. Håfa i ta lili’i’ på’gu na figura kalang maya’ gi halum ispehus; låo siempri ta li’i’ gi me’nan matå-ta. Esti i tiningo’-hu på’gu ti kabålis; låo siempri kumabålis–u kabålis taiguihi i tiningo’-ña si Yu’us nu guåhu. Mientras tåntu esti i tres u fanggagaigi ha’: i hinenggi, i ninangga, yan i ginefli’i’; ya i mås takkilu’ gi entri esti siha, i ginefli’i’.
I finu’ i Saina.
IBANGHELIU Lk 4, 21-30
ÅLELUIA
R. Åleluia. I SAINA MUNA’HÅNÅO YU’ PARA BAI HU CHULI’I
I MAMOPBLI NI MAOLIK NA NUTISIA,
YAN LINIBRI PARA I MANMAPRERESU. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Pues Ha tutuhun si Jesus sumångani siha, “På’gu na ha’åni nai makumpli esti na sinangan i en hinguk.” Todu i maniståba guennao manmåolik sinangan-ñiha put Guiya; nina’fanmanman ni manna’maguf na finihu’ ni manhuhuyung ginin i pachot-ña. Manmamaisin siha lokkui’, “Na ada ti Guiya esti i lahin Jose?” Ilek-ña nu siha, “Sin duda teniki en sangåni Yu’ ni atyu i masåsangan, ‘Hågu ni mediku, na’homlu’ maisa Håo,’ ya en aluk nu Guåhu, ‘Cho’gui guini gi tano’-mu atyu siha na fina’tinas, ni in hinguk na Un cho’gui giya Capernaum.’ ” Ha kuntenuha si Jesus ya ilek-ña, “Åmen, Hu sangångani hamyu, tåya’ prufeta ma’aksesepta gi mismu tano’-ña. Intonsis, maila’ ya bai Hu na’fanmanhassu hamyu, maniståba meggai na mambi’uda giya Israhet gi tiempun Elias anai tres åñus i media mahuchum i langit ya mumåmta’ gi tanu’ un dångkulun ha’ilas. Låo ti mana’hånåo si Elias guatu guini siha na mambi’uda, sino ki mana’hånåo gui’ guatu gi un bi’uda giya Zarephath gi fi’un iya Sidon. Hassu fan lokkui’, i linahyan nasarinu giya Israhet gi tiempun i prufeta as Elisha; låo ni unu mana’homlu’ fuera di si Naaman tåotåo Syrian.” Nina’fambubu todu i taotåo siha ni mane’ékkunguk gi halum i sinagoga ni esti na fino’-ña. Mangahulu’ ya madulalak Gui’ ginin i sengsung, makonni’ Gui’ guatu gi hilu’ oksu’ anai makåhat i sengsung, sa’ para u machonnik Gui’ påpa’ gi kantit. Låo maloffan ha’ Gui’ gi entalu’-ñiha ya mamokkat Gui’ huyung.
I Ibangheliun i Saina.
